31 Shrawn, 2079 / 16 August , 2022

Logo
Newsajako
Social Icon
Social Icon
Secondary Top

समाचार


काठमाडौंमा २३५ जनासहित नेपालमा थप ८४८ जनामा कोरोना संक्रमण पुष्टि

काठमाडौंमा २३५ जनासहित नेपालमा थप ८४८ जनामा कोरोना संक्रमण पुष्टि


काठमाडौं, ३१ साउन । पछिल्लो २४ घण्टामा देशभरमा थप ८४८ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित अपटेड अनुसार मंगलबार एक जना कोरोना संक्रमितको ज्यान गएको छ ।


एक दिनमा कुल पाँच हजार ६१९ कोरोना परीक्षण हुँदा २ हजार ७२२ पीसीआर परीक्षण र २ हजार ८९७ एन्टिजेन परीक्षण भएको थियो । यसरी पीसीआर परीक्षण गर्दा ३९९ जना र एन्टिजेन परीक्षण गर्दा ४४९ जनामा संक्रमण पाइएको हो ।

आज थपिएका संक्रमितमध्ये काठमाडौंका २३५ जना, ललितपुरका २९ जना र भक्तपुरका सात जना छन् ।

मन्त्रालयका अनुसार मंगलबार ५२६ जनाले संक्रमण जितेका छन् । अहिले नेपालमा कुल पाँच हजार २५९ सक्रिय संक्रमित रहेका छन् ।
 


८८८ संक्रमित थपिए

८८८ संक्रमित थपिए


काठमाडौं, ३० साउन ।  नेपालमा थप ८८८ जनामा कोरोना संक्रमण पुष्टि भएको छ।  गत २४ घण्टामा एन्टिजेन र पीसीआर विधिबाट ५ हजार ७३७ जनाको नमूना परीक्षण गर्दा सोमबार ८८८ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ। 
मन्त्रालयका अनुसार ३ हजार १५५ जनाको पीसीआर परीक्षण गर्दा ४२७ जनामा संक्रमण पुष्टि भएको हो। यस्तै, २ हजार ५८२ जनाको एन्टिजेन परीक्षण गर्दा ४६१ जनामा पोजेटिभ देखिएको मन्त्रालयले जानकारी दिएको छ।
 
एन्टिजेन परीक्षणको नतिजामा एसएमएस र ईमेलबाट प्राप्त विवरण समेत समावेश गरिएको मन्त्रालयले जानकारी दिएको छ। पछिल्लो २४ घण्टामा काठमाडौं उपत्यकामा २६४ जना कोभिड १९ संक्रमित थपिएका छन् । आज काठमाडौंमा १९८, भक्तपुरमा २४ र ललितपुरमा ४२ जना संक्रमित थपिएका हुन् । योसँगै उपत्यकामा सक्रिय संक्रमितको संख्या तीन हजार २५७ पुगेको छ । 

सक्रिय संक्रमितको संख्या ५ हजार ३८७ पुगेको छ। २४ घण्टाको अवधिमा ४७४ जना संक्रमित संक्रमण मुक्त (निको) भएका मन्त्रालयले जानकारी दिएको छ। 

पछिल्लो २४ घण्टाको अवधिमा कोरोना संक्रमणबाट १ जनाको मृत्यु भएको विवरण प्राप्त भएको मन्त्रालयले जानकारी दिएको छ। नेपालमा हालसम्म कोरोना संक्रमणबाट मृत्यु हुनेको संख्या ११ हजार ९८९ पुगेको छ।


बीमा विधेयक २०७९ प्रतिनिधि सभाबाट पारित

बीमा विधेयक २०७९ प्रतिनिधि सभाबाट पारित


काठमाडौं, २९ साउन ।  प्रतिनिधि सभाबाट ‘बीमा सम्बन्धी कानूनलाई संशोधन र एकीकरण गर्न बनेको ‘बीमा विधेयक २०७९’ पारित भएको छ । अर्थमन्त्री जनार्दन शर्माले संसदमा पेश गरेको बीमा विधेयक २०७९ लाई पारित गरियोस् भन्ने प्रस्ताव पारित भएको हो ।

गत असार २ गते अर्थसमितिले संसदमा पेश गरेको बीमा विधेयकको दफा एकदेखि १२४ सम्मका बुँदाहरुलाई बिधेयकको अंग बनोस भन्ने प्रस्ताव संसदबाट पारित भएको छ । संसदले उक्त प्रस्ताव पारित गरे सँगै यस बाहेकका एक देखि १७२ सम्मका बुँदा तथा अनुसुची पनि संसोधन विधेयकको अंग बनोस भन्ने प्रस्ताव निर्णयार्थ पारित भएको छ ।

संसदले उक्त विधेयकको प्रस्तावना, विधेयकको नामलाई पनि पारित गरेको छ । यसरी संसोधित बुँदा, अनुसुची, प्रस्तावना र विधेयकको नाम संसदबाट पारित भए सँगै अर्थमन्त्री जनार्दन शर्माले ‘बीमा विधेयक २०७९’ पारित गरियोस् भन्ने प्रस्ताव गरेका थिए । यसरी शर्माले गरेको प्रस्ताव संसदबाट बहुमतले पारित भएको हो ।

प्रतिनिधिसभाबाट पारित भए सँगै अव यो विधेयक राष्ट्रिय सभामा पेश हुनेछ । राष्ट्रिय सभाले पनि पारित गरे पछि यो बल्ल कार्यान्वयनमा आउनेछ ।


थप ४५५ मा संक्रमण पुष्टि, २ जनाको मृत्यु

थप ४५५ मा संक्रमण पुष्टि, २ जनाको मृत्यु


काठमाडौं, २९ साउन । मुलुकभर पछिल्लो २४ घण्टामा ४५५ जनामा कोरोना भाइरस संक्रमण पुष्टि भएको छ। ४,८२९ परीक्षणमा ४५५ जनामा संक्रमण पुष्टि भएको स्वास्थ्य तथा जनसंख्या मन्त्रालयको तथ्यांकमा उल्लेख छ। 

२,३०८ पीसीआर परीक्षणमा ३०५ र २,५२१ एन्टिजेन परीक्षणमा १५० जनामा संक्रमण पुष्टि भएको हो। यस्तै पछिल्लो २४ घण्टामा कोरोना संक्रमणका कारण २ जनाको मृत्यु भएको छ। हाल देशभर कोरोना भाइरसको सक्रिय संक्रमितको संख्या पाँच हजार ४३५ रहेको छ। त्यस्तै ३०२ जना संक्रमणमुक्त भएका छन्।


सेवाग्राहीसँग घुस माग्ने मोहन्यालका अधिकृतविरुद्ध भ्रष्टाचारकाे मुद्दा दायर

सेवाग्राहीसँग घुस माग्ने मोहन्यालका अधिकृतविरुद्ध भ्रष्टाचारकाे मुद्दा दायर


काठमाडौं, २९ साउन ।  अख्तियार दुरुपयोग अनुसन्धान आयोगले कैलालीको मोहन्याल गाउँपालिकाका अधिकृत दीपेन्द्र बुढा क्षेत्रीविरुद्ध विशेष अदालतमा भ्रष्टाचारको मुद्दा दायर गरेको छ । अख्तियारका अनुसार क्षेत्रीलाई रकम भुक्तानी दिने क्रममा सेवाग्राहीसँग ३० हजार रुपैयाँ घुस लिँदै गरेको अवस्थामा १ साउनमा पक्राउ गरिएको हो । 

अनुसन्धानको सिलसिलामा उनले सामानको बिल भुक्तानी गर्न  सेवाग्राहीसँग घुस मागी गरी १४ हजार रुपैयाँ बैंक खातामा ट्रान्सफर गर्न लगाएको र ३० हजार साथबाट बरामद भएको पुष्टि भएको अख्तियारले जनाएको छ । निजविरुद्ध ४४ हजार रुपैयाँ बिगो कायम गरी मुद्दा दायर गरेको अख्तियारका प्रवक्ता श्यामप्रसाद भण्डारीले बताए ।  


कोरानाबाट दुई जनाको मृत्यु, थप २६३ मा संक्रमण पुष्टि

कोरानाबाट दुई जनाको मृत्यु, थप २६३ मा संक्रमण पुष्टि


काठमाडौं, २८ साउन । पछिल्लो २४ घन्टामा कोरोना संक्रमणबाट दुई जनाको मृत्यु भएको छ। ५०१ जना संक्रमणबाट मुक्त हुँदा दुई जनाको मृत्यु भएको स्वास्थ्य तथा जनसंख्या मन्त्रालयले जनाएको छ।

थप २६३ जनामा कोरोना भाइरस संक्रमण पुष्टि भएको छ।  सो अवधिमा देशभरबाट ३१६५ नमूना परीक्षण गर्दा २६३ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ।

मन्त्रालयका अनुसार पीसीआर विधिबाट १३९९ र एन्टिजेनबाट १७६६ नमूनाको परीक्षण गर्दा पीसीआरबाट १६२ र एन्टिजेनबाट १०१ नमूनाको रिपोर्ट पोजिटिभ आएको हो। हाल कोरोना सक्रिय संक्रमितको संख्या ५४३४ पुगेको छ।  
 


मेयर बालेनले भेटे निहारिका राजपुतलाई 

मेयर बालेनले भेटे निहारिका राजपुतलाई 


काठमाडौं, २८ साउन । काठमाडौँ महानगरपालिकाका मेयर बालेन्द्र शाह (बालेन) ले त्रिवि शिक्षण अस्पतालमा रहेकी निहारिका राजपुतलाई भेटेका छन्। मेयर शाहले आफ्नो सामिक सञ्जाल फेसबुकमार्फत् तस्बिर राख्दै भनेका छन्,‘आफ्नो बच्चाको डिएनए टेस्ट गरिदे मात्रै त भनेको रैछ। यति गर्न एउटी आमाले जल्न तयार हुनुपर्ने ? यो अत्ति हो। यो अत्याचार हो। कानुनीराज्य यस्तो हुँदैन। अभिभावक भनिने राज्य यस्तो हुनु हुँदैन।’

बलात्कारबाट जन्मिएको आफ्नो बच्चाको डिएनए परीक्षण गर्न माग गर्दै निहारिका काठमाडौँको माइतिघरमा लामो समयदेखि आन्दोलित थिइन्। उनले आफू बलात्कृत भएको र प्रशासनले कानूनी लडाइँमा सहयोग नगरेको भन्दै गुनासोसहित शुक्रबार राष्ट्रपति भवन शितल निवासअघि पुगेर आत्महत्या गर्ने प्रयास गरेकी थिइन्।

आत्महत्या प्रयास गरेकी निहारिका त्रिवि शिक्षण अस्पताल भर्ना भएकी थिइन्। उनलाई भेट्न आज मेयर शाह त्रिवि शिक्षण अस्पतालमा पुगेका थिए।


सरकारद्वारा मिटरब्याजीविरुद्ध उजुरी दिन आह्वान

सरकारद्वारा मिटरब्याजीविरुद्ध उजुरी दिन आह्वान


काठमाडौं, २८ साउन । सरकारले मिटरब्याजीविरुद्ध बढीभन्दा बढी तथ्य र प्रमाण जुट्ने गरी स्थानीय प्रशासन कार्यालयमा उजुरी दिन पीडितहरुमा आह्वान गरेको छ । मिटरब्याजी अपराध नियन्त्रणका लागि प्रधानमन्त्री शेरबहादुर देउवाको निर्देशनपछि शुक्रबार मात्रै गृहमन्त्रीस्तरीय निर्णयबाट मिटरब्याजी अपराध नियन्त्रणका सिफारिस गर्न गठित कार्यदलले शनिबार एक सूचना जारी गरी आगामी भदौ ५ गते भित्रमा उजुरी दर्ता गर्न आग्रह गरेको हो ।

‘देशभर नै मिटरब्याजीको जालो फैलिएको हुनसक्ने अवस्थालाई मध्यनजर गरी  मिटरब्याज पीडितबाट त्यस्ता मिटरब्याजीले गरेका अपराध र शोषणविरुद्ध आ–आफ्नो जिल्लास्थित प्रशासन कार्यालयमा आगामी भदौ ५ गतेभित्र यथासम्भव बढी तथ्य र प्रमाणसहित उजुरी दर्ता गर्न सार्वजनिक सूचना जारी गरिएको छ’, कार्यदलका संयोजक डा भीष्मकुमार भुसालद्वारा जारी सूचनामा भनिएको छ ।

मिटरब्याजीहरुले निरक्षर, गरिब तथा आर्थिकरुपले अफ्ठेरो परिस्थितिमा रहेका व्यक्तिमाथि गरेको शोषणको शृङ्खलाले सयौँ परिवारको बिचल्ली भएको समाचारहरु सार्वजनिक भइरहेका छन् । त्यस्ता आर्थिक अपराधमा संलग्नलाई कानुनको दायरामा ल्याई कारबाही गर्ने प्रक्रिया चलिरहेको गृहमन्त्रालयले जनाएको छ । अझै धेरै पीडितहरु आफ्नो पीडा सार्वजनिक गर्न वा कानुनी उपचारका लागि पहल गर्न नसक्ने अबस्थामा रहेको मन्त्रालयको निष्कर्ष छ ।

मन्त्रालयले कार्यदल गठन भएको एक घण्टा भित्रैमा नवलपरासी पश्चिमको प्रतापपुर र सुस्ता गाउँपालिकाबाट सङ्गठित भई काठमाण्डौ माइतीघर मण्डलामा धर्ना दिँदै आएका मिटरब्याज तथा ठगीविरुद्ध किसान, मजदुर सङ्घर्ष समितिसँग काठमाण्डौका प्रजिअ नेतृत्वको टोलीले वार्तासमेत गरिसकेको जनाएको छ । उक्त समस्या नवलपरासीमा मात्रै नभई अधिकांश जिल्लाहरुमा रहेको हुनसक्ने भएकाले स्थानीय प्रशासनमा उजुरी दर्ता गर्न आह्वान गरिएको हो ।


 


थप ७८१ जनामा कोरोना संक्रमण, दुई जनाको मृत्यु

थप ७८१ जनामा कोरोना संक्रमण, दुई जनाको मृत्यु


काठमाडौं, २८ साउन । पछिल्लो २४ घण्टामा थप ७८१ जनामा कोरोना संक्रमण पुष्टि भएको छ भने २ जनाको मृत्‍यु भएको छ । स्वास्थ्य तथा जनसंख्या मन्त्रालयका अनुसार ४ हजार ७१२ जनाको परीक्षणमा ७८१ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार २ हजार २१९ जनाको पीसीआर परीक्षण गर्दा ४१९ जना र २ हजार ४२२ जनाको एन्टिजेन परीक्षण गर्दा ३६२ जनामा संक्रमण देखिएको हो ।
 पछिल्लो २४ घण्टामा काठमाडौं उपत्यकामा २९४ जना कोभिड १९ संक्रमित थपिएका छन् । आज काठमाडौंमा २१२, भक्तपुरमा १९ र ललितपुरमा ६३ जना संक्रमित थपिएका हुन् ।

योसँगै उपत्यकामा सक्रिय संक्रमितको संख्या तीन हजार ८४५ पुगेको छ । उपत्यकाबाहिर सबैभन्दा धेरै आज कास्कीमा ६८ जना संक्रमित देखिएका छन् ।  कोरोना भाइरसको सक्रिय संक्रमितको संख्या ५ हजार ७७५ पुगेको छ । पछिल्लो २४ घण्टामा ५११ जना संक्रमणमुक्त भएका छन् । जसमध्‍ये ५ हजार ५६५ जना होम आइसोलेसनमा रहेका छन् भने २१० जना संस्थागत आइसोलेसन र ६३ जना आईसीयूमा छन् ।


जनैपूर्णिमा र गाईजात्रा पर्व मनाइँदै, भौतिक दूरीको ख्याल गर्न आग्रह

जनैपूर्णिमा र गाईजात्रा पर्व मनाइँदै, भौतिक दूरीको ख्याल गर्न आग्रह


काठमाडौं, २७ साउन ।  जनैपूर्णिमा र गाईजात्रा पर्व आज मनाइँदैछ । पूर्णिमाको दिन बिहानैदेखि वैदिक सनातन धर्मावलम्बीले नदी, ताल, तलाउ, पोखरीमा गइ स्नान गरेर गुरु पुरोहितबाट डोरो बाँध्ने गर्छन् । तागाधारीले गुरु पुरोहितले विधिपूर्वक मन्त्रिएको यज्ञोपवीत एवम् डोरो धारण गरेमा नकारात्मक तत्वबाट सुरक्षा प्राप्त हुने धार्मिक विश्वास छ ।

जप, तप र पूजा गरी मन्त्रिएको रक्षाबन्धन अर्थात डोरो वैदिक परम्पराको मन्त्रोच्चारण गर्दै ब्राह्मण पुरोहितले यजमानको नाडीमा बाँधिदिने गरिन्छ । आजकै दिन तागाधारीले आफ्नो जनै फेर्नुपर्ने विधान शास्त्रमा उल्लेख छ । अरुन्धतीसहित कश्यप, अत्रि, भारद्वाज, विश्वामित्र, गौतम, जमदग्नि, वशिष्ठ र अगस्त्य गरी आठ ऋषिलाई पूजा एवम् तर्पण गर्ने भएकाले आजको दिनलाई ऋषितर्पणी पनि भन्ने गरिन्छ ।

वैदिक गुरु परम्पराअनुसार यज्ञोपवीत अर्थात्त जनैलाई ब्रह्मसूत्र अथवा ज्ञानको धागो समेत भनिन्छ । रक्षाबन्धन बाँध्न एवम् नयाँ जनै फेर्न बिहानैदेखि पशुपतिनाथ मन्दिर परिसर, वसन्तपुरको अशोकविनायकलगायत वाग्मती नदीको किनार र देशभरका मठ मन्दिरमा भक्तजनको भिड लागेको छ । यस वर्ष नयाँ भेरियन्टसहितको कोरोना जोखिम कायमै रहेकाले भौतिक दूरी कायम गरी सांस्कृतिक पर्व मनाउन सरकारले आह्वान गरेको छ ।

तराई क्षेत्रमा भने आजकै दिन दिदीबहिनीले दाजुभाइलाई राखी बाँधेर मनाइँदैछ । यसबाट दिदी बहिनी र दाजुभाइका बीचमा प्रेमसम्बन्ध बढ्छ भन्ने सामाजिक मान्यता छ । काठमाण्डौको उत्तरपूर्वी भेगमा रहेको मणिचूड, रसुवाको गोसाइँकुण्ड, ललितपुरको कुम्भेश्वर, सिन्धुपाल्चोकको पाँचपोखरी, धनुषाको जनकपुरधाम, धनुषसागर र गङ्गासागर, जुम्लाको दानसाधु एवम् नवलपरासीको त्रिवेणीधामलगायतका ताल, पोखरी र कुण्डमा आज बिहानैदेखि मेला लागेको छ ।

आजै प्रतिपदा तिथि लाग्ने भएकाले गाईजात्रा पर्व पनि मनाइँदैछ । गाईजात्रा पर्व हरेक वर्ष भाद्र कृष्ण प्रतिपदादेखि अष्टमीसम्म आठदिन मनाइने गरिन्छ । एक वर्षभित्र दिवङ्गत भएका आफन्तको सम्झनामा आजका दिन गाई वा मानिसलाई गाईका रूपमा सिँगारी आआफ्ना क्षेत्रमा परिक्रमा गराउने र उनीहरूलाई श्रद्धालुद्वारा दूध, फलफूल, रोटी, चिउरा, दहीका साथै अन्न र द्रव्य दान गरिन्छ । यसरी नगरपरिक्रमा गर्नाले वर्षभरि मृत्यु भएका व्यक्तिहरू गाईको पुच्छर समाएर वैतरणी पार हुन्छन् भन्ने धार्मिक विश्वास छ ।

राजा प्रताप मल्लले पुत्रशोकले विह्वल भएकी आफ्नी रानीलाई दुनियाँले पनि यस्तै शोक बेहोर्नुपर्छ भन्ने देखाउन, “जनतालाई आआफ्नो घरका मरेका व्यक्तिका नाममा गाईजात्रा निकाली सहर परिक्रमा गराउनू” भनी आज्ञा दिएका आधारमा यो पर्व सुरु भएको ऐतिहासिक तथ्य छ । यसबाट पनि रानीको मन शान्त हुन नसकेकाले विभिन्न प्रकारका प्रहसन तथा व्यङ्ग्यात्मक कार्यक्रम गराउने आदेश दिएअनुरूप हास्यव्यङ्ग्यको प्रचलन चलेको हो भन्ने जनश्रुति पाइन्छ ।



Prabhu Side Bar



Sidebar Middle
Sidebar Bottom


Maruti