विमानस्थल भन्सारमा फेरिए प्रमुख 

काठमाडौं, ९ साउन । त्रिभुवन विमानस्थलको भन्सार कार्यालयका प्रमुख फेरिएका छन् । अर्थ मन्त्रालयले सहसचिव टोकराज पाण्डेलाई भन्सार कार्यालयको नयाँ प्रमुखको जिम्मेवारी दिएको छ ।

यसअघिका अरुण पोखरेलको स्थानमा पाण्डेलाई खटाइएको हो । उनी गत शनिबारसम्म राष्ट्रिय किताबखानाको महानिर्देशकको जिम्मेवारीमा थिए ।  

अपराधमा संलग्न सबैलाई कारबाहीको दायरामा ल्याउँछौँः  गृहमन्त्री

काठमाडौं, ९ साउन ।  उपप्रधानमन्त्री तथा गृहमन्त्री नारायणकाजी श्रेष्ठले अपराधमा संलग्न सबैलाई कानुनी दायरामा ल्याएरै छोडिने बताएका छन्। प्रेस सेन्टर नेपाल गोरखाद्वारा आज आयोजित पत्रकार सम्मेलनमा गृहमन्त्री श्रेष्ठले अपराधका घटनामा कमी ल्याउन प्रहरीले गम्भीर अनुसन्धान गरिरहेको बताए।

उनले भने, “ठूला, साना जो भए पनि दोषीलाई कानुनी दायरामा ल्याउँछौँ ।” तथ्य र प्रमाणका आधारमा मात्र पक्राउ गरी कारबाही पक्रिया अघि बढाइने उनको भनाइ थियो । त्रिभुन अन्तर्राष्ट्रिय विमानस्थलबाट पछिल्लो पटक भएको सुन तस्करीको घटनामा प्रहरीले गहिरो ढङ्गबाट अनसुन्धान गरिरहेको गृहमन्त्री श्रेष्ठले उल्लेख गरे।

“जरैसम्म पुग्ने गरी अनुसन्धान गर्न निर्देशन दिएको छु, दोषीलाई कुनै पनि हालतमा उम्कन दिइदैन”, उनले भने। भ्रष्टाचार विरुद्धको अभियान पनि दृढताका साथ अघि बढाइने गृहमन्त्री श्रेष्ठले बताए। आम जनताको जीवनस्तरमा परिवर्तन हुनेगरी सम्बृद्धिको आधार तयार पार्न सरकार प्रतिवद्ध भएर लागेको उनले उल्लेख गरे। पछिल्लो समय सरकारले थालेको भ्रष्टाचारविरुद्धको अभियानले नेपाली समाजमा आशा र विश्वास पैदा गरेको गृहमन्त्री श्रेष्ठले बताए।

कोसीमा नयाँ सरकार गठनविरुद्धको रिट अब पूर्ण इजलासमा

काठमाडौं, ८ साउन । कोसी प्रदेशको नयाँ सरकार गठनसम्बन्धी रिट अब पूर्ण इजलासमा गएको छ। नयाँ सरकार गठन प्रक्रिया अवैधानिक रहेको भन्दै सर्वोच्च अदालतमा गत २२ असारमामा रिट दायर भएको थियो। कोसी एमाले संसदीय दलका नेता हिक्मतकुमार कार्कीले रिट दर्ता गराएका थिए।
उक्त रिटमा आज सुनुवाइ गर्दै सुष्मालता माथेमा र तिलप्रसाद श्रेष्ठको संयुक्त इजलासले जटिल कानुनी प्रश्न समावेश रहेको भन्दै उक्त रिटलाई पूर्ण इजलासमा पठाउने आदेश दिएको हो। 
कांग्रेस संसदीय दलका नेता मुख्यमन्त्री उद्धव थापालाई चार दलको समर्थन थियो। तर, बहुमत पु¥याउन सभामुख बाबुराम गौतमको पनि हस्ताक्षर छ। रिटमा प्रदेश प्रमुख पर्शुराम खापुङ, मुख्यमन्त्री उद्धव थापा र प्रदेशका सभामुख बाबुराम गौतमलाई विपक्षी बनाइएको छ। रिटमा सभामुख पनि मतगणना गरिनु संविधानविपरीत भएको दाबी गरिएको छ।

सुन तस्करीमा राजनीतिक संलग्नता हुने भन्ने आरोपमा कुनै सत्यता छैनः वामदेव गौतम

काठमाडौं,६ साउन ।  नेकपा राष्ट्रिय एकता अभियानका संयोजक वामदेव गौतमले सुन तस्करीमा राजनीतिक संलग्नता हुने भन्ने आरोपमा कुनै सत्यता नभएको बताएका छन्।

रिपोटर्स क्लब नेपालले शनिबार काठमाडौंमा आयोजना गरेको साक्षात्कारमा गौतमले सुन तस्करीमा सिधै राजनीतिक संलग्नता जोडिने भन्दा पनि भन्सारमा खटिने कर्मचारी नै मुख्य रुपमा दोषी हुने समेत बताए।

आफू गृहमन्त्री हुँदा सुन काण्ड नभएको पनि दाबी गर्दै उनले सो समयमा आफुलाई सरकारबाट कसरी हटाउने भन्नेबारे आवाज उठाइएको जिकिर गरे। गौतमले आफु गृहमन्त्री भएका बेला शान्ति सुरक्षा थप बलियाे भएको र आफूले गरेका कामलाई सवैले प्रशंसा गरेको दाबी गरे।

सुन तस्करीको सवालमा अहिले यो सुन कुन देशबाट आयो भन्ने पनि महत्वपूर्ण विषय भएको र तस्करहरुले कस्तो जालो फैलाएका रहेछन भन्ने स्पष्ट भएको उनले बताए। फरक प्रसंगमा उनले समाजवादी मोर्चाको औचित्य पुष्टि हुन नसकेको बताए।

नले आफूलाई मोर्चामा सहभागी गराएको भए संविधानमा उल्लेख समाजवादलाई औचित्य पुष्टि गर्ने भए पनि आफूलाई नबोलाएको तर्क गरे।

अदालतको आदेश देखाएर पक्राउ परेको केही घण्टामै छुटेका देउजा पुनः समातिए

काठमाडौं, ५ साउन । ललिता निवास प्रकरणका आरोपित एक जनालाई प्रहरीले पक्राउ गरेको छ। यसअघि समातिएका डिल्लीबजार मालपोत कार्यालयका तत्कालीन कर्मचारी कलाधर देउजालाई प्रहरीको केन्द्रीय अनुसन्धान ब्यूरोले पक्राउ गरेको हो। देउजा यसअघि अदालतको अन्तरिम आदेशका कारण रिहा भएका थिए।
शुक्रबार सर्वोच्चले २०७९ साउन १९ मा जारी अन्तरिम आदेश खारेज गरेलगत्तै देउजा पक्राउ परेका हुन्। देउजा असार १२ मा पक्राउ परेर सोही दिन रिहा भएका थिए। देउजासहित १७ जनाले अन्तरिम लिएका थिए। उक्त आदेश शुक्रबार खारेज भएको हो।

सुन तस्करी प्रकरण: चार जनालाई अनुसन्धानका लागि ९ दिनको म्याद

काठमाडौं, ५ साउन । सुन तस्करी प्रकरणमा पक्राउ परेका चार जनालाई अदालतले अनुसन्धानका लागि म्याद दिएको छ।  उच्च अदालत पाटनले शुक्रबार चार जनाविरुद्ध अनुसन्धानका लागि ९ दिनको म्याद दिएको हो।
चिनियाँ नागरिक जीक्वाङ लिन, सुनसहितको सामग्री ल्याउने कार्गो ट्रान्स ग्लोबल सर्भिसका सञ्चालकहरु कृष्णकुमार श्रेष्ठ, पुष्कर भट्ट र एलिस ट्रान्स ग्रुपका सञ्चालक राजन श्रेष्ठविरुद्ध ९ दिनको म्याद अनुमति दिएको हो। 

सुन मेरो हो भनि प्रमाणित भए जुनसुकै सजाय भोग्न तयार छुः दीपक मल्होत्रा

काठमाडौं, ४ असार ।  नेपाल चेम्बर अफ कमर्सका उपाध्यक्ष एवं ब्यापारी दीपक मल्होत्राले आफूलाई सुनकाण्डमा मुछिएकोमा आपत्ती जनाएका छन् । 

आजको नयाँ पत्रिका दैनिकमा बुधवार समातिएको १ क्वीण्टल सुन दीपक मल्होत्राको रहेको भनि समाचार प्रकाशित गरेकोमा मल्होत्राले केहीबेर अघि पत्रकार सम्मेलन गरी सो कुराको खण्डन गरेका हुन् ।

उनले पत्रकार सम्मेलनमा उक्त सुन आफ्नो हो भन्ने प्रमाणित गर्न चुनौति दिँदै आफ्नो हो भन्ने प्रमाण भएमा जस्तो सुकै सजाय भोग्न पनि तयार रहेको बताए । उनले बिना कुनै आधार र प्रमाण गैरकानुनी कार्यमा संलग्न भएको आरोप लगाएर आफ्नो चरित्र हत्या गरिएको र यसबाट व्यवसायिक मर्यादाको घोर उल्लंघन भएको उनले पत्रकार सम्मेलनमा बताए ।

उनले आफू संलग्न हुँदै नभएको कार्यमा आफ्नो नाम जोडिएको भन्दैे समाचार प्रकाशित गर्ने मिडियालाई माफी माग्न र खण्डन प्रकाशन गर्न पनि माग गरे । पत्रिकाले माफी नमागे आफू कानुनी उपचारमा जाने चेतावनी उनले दिए ।
 

प्रधानमन्त्री दाहाल र कतारका राजदूतबीच शिष्टाचार भेट

काठमाडौं, ४ असार ।  प्रधानमन्त्री पुष्पकमल दाहालसँग नेपालका लागि कतारका राजदूत युसूफ बिन मोहम्मद अल–हइलले शिष्टाचार भेट गरेका छन्।

प्रधानमन्त्री निवास बालुवाटारमा बिहीबार बिहान भएको भेटमा द्विपक्षीय हित र चासोका विषयमा छलफल भएको प्रधानमन्त्रीको सचिवालयले जनाएको छ।

सो अवसरमा द्विपक्षीय सम्बन्ध र आपसी हितका विषय छलफल भएको बताइएको छ ।
 

७ लाख पार्टी सदस्य थप्न कांग्रेसले एक वर्षे अभियान चलाउने

काठमाडौं, २ असार । नेपाली कांग्रेसमा पार्टी सदस्य थप्न एक वर्षे अभियान चलाउने प्रस्ताव भएको छ । मंगलबारदेखि पार्टी केन्द्रीय कार्यालय सानेपामा शुरु भएको केन्द्रीय कार्यसमिति बैठकमा साङ्गठनिक तालिका प्रस्तुत गर्दै महामन्त्री गगनकुमार थापाले यस्तो प्रस्ताव गरेका हुन् ।

आउँदो एक वर्षभित्रमा सात लाख नयाँ पार्टी सदस्य बनाउने गरी ‘घर–घर जाऔँ, पार्टी सदस्य बनाऔँ’ अभियान चलाउने उनको प्रस्ताव छ ।

यस्तै महामन्त्री थापाले केन्द्रीय सदस्यहरूलाई असार महिनामा मात्रै पार्टीको कामबाट छुट्टी दिने प्रस्ताव पेस गरेका छन् । उनले अरू ११ महिना नेता तथा कार्यकर्ताहरू पार्टी काममा लाग्नुपर्ने तालिका पेस गर्नुभएको छ ।

असार महिना किसानको महिना भएको र खेतीको समय भएको भन्दै महामन्त्री थापाले पार्टीका नेता, कार्यकर्ताले त्यो महिनामा किसानलाई सहयोग गर्नुपर्ने बताए ।

महामन्त्री थापाले भदौ १५ गतेभित्र सबै विभागको गठन गरिसक्ने र पूर्णता दिइसक्ने कार्ययोजना पनि पेस गर्नुभएको छ । त्यस्तै समितिहरूले पनि भदौ १५ गतेसम्ममा पूर्णता पाउने प्रस्ताव छ । 
 

भाटभटेनीका सञ्चालक गुरुङसहित १५ जनालाई थप ५ दिन हिरासतमा राख्न अनुमति

काठमाडौं, ३१ असार । बालुवाटारस्थित ललिता निवास जग्गा प्रकरणमा पक्राउ परेकाहरुलाई थप पाँच दिन हिरासतमा राख्न अदालतले अनुमति दिएको छ । प्रहरीको केन्द्रीय अनुसन्धान ब्यूरो उनीहरुलाई म्याद थपका लागि अदालतमा पेस गरेको थियो ।

भाटभटेनी सुपरमार्केटका संचालक मीनबहादुर गुरुङसहित १७ जनालाई थप पाँच दिन हिरासतमा राखेर अनुसन्धान गर्न अदालतले अनुमति दिएको हो ।

उक्त प्रकरणमा सचिव कृष्णबहादुर राउत, पूर्वसहसचिव एवं निर्वाचन आयोगका पूर्वआयुक्त सुधीर कुमार शाहसति १७ जना अनुसन्धानका क्रममा पक्राउ परेका थिए ।

सुरुमा किर्ते सम्बन्धी कसुर लगाएर अनुसन्धान अगाडि बढाएको प्रहरीले संगठित अपराध जोडेर अनसन्धानका लागि अदालतसँग अनुमति मागेको थगियो ।

ललिता निवास जग्गा प्रकरणमा ४ सयभन्दा बढीलाई अनुसन्धानका लागि प्रहरीले अदालतबाट पक्राउ अनुमति दिएको छ । सरकारका नाममा रहेको बालुवाटारस्थित ललिता निवासको १४३ रोपनीभन्दा बढी जग्गा गिरोहले हडपेको प्रहरीले जनाएको छ।