विश्वकप फुटबलको उपाधि अर्जेन्टिनालाई 

काठमाडौं, ३ पुस । फ्रान्सलाई पेनाल्टी सुटआउटमा हराउँदै अर्जेन्टिनाले तेस्रोपटक विश्वपको उपाधि जितेको छ । फ्रान्सका किंग्सले कोमान र औरेलियन टुअमानीले पेनाल्टी मिस गरेपछि अर्जेन्टिना ४–२ गोलअन्तरले विजयी बन्यो ।
सन् १९८६ पछि अर्जेन्टिनाले पहिलोपटक विश्वकपको उपाधि जितेको हो । त्यसअघि सन् १९७८ मा अर्जेन्टिनाले आफ्नो घरेलु मैदानमा उपाधि जितेको थियो ।

लुसेल स्टेडियममा भएको १२० मिनेटको रोमाञ्चक खेलपछि दुवै टोली ३–३ को बराबरीमा रोकिएका थिए । पहिलो हाफमा लियोनेल मेस्सी र एंखल डि मारियाको गोलको मद्दतले अर्जेन्टिनाले २ गोलको अग्रता बनाएको थियो । तर, किलियान एम्बाप्पेले दोस्रो हाफमा दुई मिनेटको अन्तरमा दुई गोल गर्दै खेल २–२ को बराबरी गरे ।

निर्धारित ९० मिनेटमा बराबरी भए पछि खेल अतिरिक्त समयमा पुगेको थियो । अतिरिक्त समयमा १०८ औँ मिनेटमा मेस्सीले पुनः अर्जेन्टिनालाई अग्रता दिलाए पनि एम्बाप्पेले पेनाल्टीमार्फत ह्याट्रिक गर्दै खेल ३–३ को बराबरीमा पुर्‍याएका थिए । त्यसपछि कुनै गोल हुनसकेन र खेल पेनाल्टीमा पुगेको थियो ।
 

फिफा विश्वकपको फाइनल खेलेर सन्यास लिने अर्जेन्टिनी स्टार मेस्सीको घोषणा

एजेन्सी । अर्जेन्टिनी सुपर स्टार लियोनल मेसीले कतारमा जारी फिफा विश्वकपको फाइनल खेलेसँगै सन्या स लिने घोषणा गरेका छन् । मंगलबार राति सेमिफाइनलमा क्रोएसियालाई ३–० ले हराउँदै जित निकालेर फाइनल पुगेपछि ३५ वर्षीय मेसीले अर्को विश्वकप आफूले नखेल्ने बताएका हुन् ।

‘फाइनल खेलेर मेरो विश्वकप यात्रा टुंग्याउन पाउँदा म खुसी छु,’ मेसीले अर्जेन्टेनी मिडिया डायरिओ डेपोर्टिभो ओलेसँगको कुराकानीमा भनेका छन् । अर्को विश्वकप आउन चार वर्ष बाँकी रहेको र त्यतिबेला आफूले अहिलेजस्तै खेल्न नसक्ने भन्दै मेसीले आफ्नो विश्वकप यात्रा सकिने बताएका हुन् ।

अर्जेन्टिनाले सन् १९८६ पछि विश्वकपको उपाधि उचाल्न पाएको छैन । दुई पटकको विश्व विजेता अर्जेन्टिनाले मेस्सीको नेतृत्वपछि विश्वकप उपाधि जित्न सकेका छैन । यसपालि तेस्रो उपाधिको नजिक आइपुगेको अर्जेन्टिनाले बुधबार राति हुने मोरक्को र फ्रान्सबीचको सेमिफाइनल विजेतासँग आइतबार उपाधिका लागि प्रतिस्पर्धा गर्नेछ ।

सन् २००५ देखि सिनियर अन्तर्राष्ट्रिय फुटबल खेल्दै आएका मेस्सीले गत वर्ष मात्र कोपा अमेरिका जितेर सिनियर राष्ट्रिय टोलीमा उपाधि खडेरी टारेका थिए । मेस्सीले खेलेयता अर्जेन्टिना कोपा अमेरिकामा सन् २००७, २०१५, २०१६ र २०२१ मा फाइनल पुगेको छ भने विश्वकपमा २०१४ मा पनि फाइनल पुगेको थियो ।

ब्राजिलका मुख्य प्रशिक्षकले छाडे पद 

काठमाडौं, २४ मंसिर । ब्राजिलको राष्ट्रिय फुटबल टोलीका मुख्य प्रशिक्षक टिटेले पद छाडेका छन् । कतार विश्व कपको क्वाटरफाइनलबाट ब्राजिल बाहिरिएपछि मुख्य प्रशिक्षक टिटेले राजीनामा दिएका हुन् । गएराति भएको खेलमा ब्राजिललाई क्रोएसियाले पेनाल्टी सुटआउटमा ४–२ गोलले हराएको थियो ।
 

विश्वकप फुटवलः आजबाट क्वाटरफाइनलका खेलहरु शुरु

काठमाडौं, २३ मंसिर ।  कतारमा जारी फिफा विश्वकप २०२२ मा आजदेखि क्वाटरफाइनलका खेलहरु सुरु हुँदैछन् । जारी विश्वकपको क्वाटरफाइलको खेलसँगै रोचक प्रतिश्पर्धा हुने देखिएको छ ।
कतारको एजुकेसन सिटी स्टेडियममा हुने पहिलो क्वाटरफाइनल क्रोएसिया र ब्राजिलबीच राति पौने ९ बजे सुरु हुनेछ भने पौने १ बजे सुरु हुने दोस्रो क्वाटरफाइनलमा नेदरल्याण्ड्स र अर्जेन्टिना आमने–सामने हुनेछ । यी मध्ये एक टोलीले सेमिफाइनलमा खेल्न पाउनेछ ।
अघिल्लो खेलमा बलियो टिम स्पेन पराजित भएसँगै रोचक बनेको विश्वकप विगतको विश्व विजेता अर्जेन्टिना र नेदरल्याण्ड्सको खेल हेर्न संसारभरका अरवौं खेलप्रेमी प्रतिक्षारत छन् । सधैको विश्वकप फुटवलको दावेदार टिमहरु अर्जेटिना र ब्राजिल छुट्टा छुट्टै टिमसँग भिड्ने यो खेल को नतिजाले आगामी खेलहरु झन् रोचक बनाउनेछ ।
फिफा वरीयतामा विश्व एक नम्बर रहेको ब्राजिल ब्राजिलले २००२ पछि उपाधि जित्न भने सकेको छैन ।
फिफा वरीयतामा तेस्रो स्थानमा अर्जेन्टिना रहेको लिओनल मेसीको सम्भावित अन्तिम विश्वकपको खेलको नतिजा हेर्न संसारभरका खेलप्रेमी उत्साहित छन् ।

विश्वकपमा आज इङ्ल्यान्ड र इरान, सनेगल र नेदरल्यान्ड तथा अमेरिका र वेल्सबीच प्रतिस्पर्धा हुने

काठमाडौं, ५ मंसिर ।  कतारमा जारी फिफा विश्वकप फुटबल २०२२ अन्तर्गत आज सोमबार तीन खेलहरू हुँदैछन् । आज हुने पहिलो खेलमा इङ्ल्यान्ड र इरानको हुने छ । आज नै हुने समूह ‘ए’ को खेल सनेगल र नेदरल्यान्ड् बीच हुँदै छ । दुई टोलीबीचको खेल नेपाली समय अनुसार राति ९ः४५ मा सुरु हुनेछ ।

समूह ‘बी’ अन्तर्गतको अर्को खेल अमेरिका र वेल्सबीच हुनेछ । अमेरिका र वेल्सबीचको खेल राति १२ः४५ बजे सुरु हुनेछ । हिजोको खेलमा आयोजक कतारलाई २–० ले हराएर इक्वेडरले विजयी सुरुआत गरिसकेको छ ।

नेपालले जित्यो यूएईसँगको एकदिवसीय शृंखला

काठमाडौं, २ मंसिर । यूएईलाई हराउँदै नेपालले एकदिवसीय शृंखला हात पारेको छ । शुक्रबारको तेस्रो तथा अन्तिम खेलमा यूएईलाई छ विकेटले हराउँदै नेपालले शृंखला जितेको हो ।
यूएईले दिएको एक सय ७७ रनको लक्ष्य नेपालले ४० ओभर १ बलमा चार विकेट गुमाएर भेटायो । नेपालका लागि आसिफ शेखले नटआउट ८८ रन र ज्ञानेन्द्र मल्लले ६४ रन बनाए । बलिङतर्फ यूएईका हजरत बिलाल र आयान अफजल खानले एक/एक विकेट लिए ।
यसअघि त्रिवि क्रिकेट मैदानमा टस हारेर पहिला ब्याटिङ गरेको यूएईले निर्धारित ५० ओभरमा नौ विकेट गुमाएर एक सय ७६ रन बनायो । यूएईका लागि आयान अफजल खानले नटआउट ५४ रन र अलिशान शराफुले ३३ रन बनाए । बलिङतर्फ नेपालका गुलशन झा, कुशल भुर्तेल र दीपेन्द्रसिंह ऐरीले दुई÷दुई विकेट लिए ।
नेपाल पहिलो खेलमा ८४ रनमा पराजित हुँदा दोस्रो खेलमा पुनरागमन गर्दै नेपालले यूएईलाई तीन विकेटले हराएको थियो । यो जितसँगै नेपालले शृङ्खला दुई–एकले आफ्नो पक्षमा पारेको हो ।  यूएईले अघिल्लो महिना अस्ट्रेलियामा विश्व कप खेलेको थियो । नेपालले सन् २०१८ मा विश्व कप छनोटबाट एक दिवसीय अन्तर्राष्ट्रिय मान्यता पाएको थियो । त्यसयता नेपालले घरेलु मैदानमा यो दोस्रो पटक शृंखला खेलेको हो ।

इंग्ल्याण्डले जित्यो टी–२० विश्वकप उपाधि

काठमाडौं, २७ कात्तिक । पाकिस्तानमाथि ५ विकेटको जित रच्दै इंग्ल्याण्डले आईसीसी टी–२० विश्वकपको उपाधि जितेको छ । इंग्ल्याण्डले टी–२० विश्वकप जितेको यो दोस्रोपल्ट हो । यसअघि सन् २०१० मा उपाधि जितेको थियो ।

मेलवर्न क्रिकेट मैदानमा पाकिस्तानले दिएको १३८ रनको लक्ष्य इंग्ल्याण्डले एक ओभर बाँकी छँदै पूरा गरेको हो । इंग्ल्याण्डलाई जिताउन बेन स्टोक्सले नट आउट ५२ रन बनाए । ४५ रन हुँदा ३ विकेट गुमाएर दबावमा रहेको इंग्ल्याण्डलाई उनले जितसम्म पु¥याएका हुन् । यस्तै जोस बट्लरले २६ तथा ह्यारी ब्रुकले २० रनको योगदान दिए ।

यसअघि टस हारेर पहिला ब्याटिङ गरेको पाकिस्तानले २० ओभरमा ८ विकेट गुमाएर १३७ रनमात्र बनाउन सक्यो । सेमिफाइनलमा न्युजिल्याण्डविरुद्ध शतकीय साझेदारी गरेका ओपनिङ जोडी कप्तान बाबर आजम र मोहम्मद रिजवान छिट्टै आउछ हुँदा पाकिस्तान इनिङ्सको सुरुवातदेखि नै रक्षात्मक बन्न पुगेको थियो ।

नेपालले यू–१९ क्रिकेट विश्वकप आयोजना गर्ने

काठमाडौं, २७ कात्तिक । नेपाल पहिलो पटक आईसीसी यू-१९ महिला विश्वकप आयोजना गर्न पाउने भएको छ। अन्तर्राष्ट्रिय क्रिकेट परिषद (आईसीसी) को बैठकले सन् २०२७ को यू-१९ महिला विश्वकप नेपालले आयोजना गर्ने निर्णय गरेको हो। यो प्रतियोगिता नेपालसँगै बाङ्लादेशले संयुक्त रुपमा आयोजना गर्ने आईसीसी बोर्डको आइतबार बसेको बैठकले निर्णय गरेको छ।

आईसीसी बोर्डको बैठकले सन् २०२४ देखि २०२७ सम्म हुने विभिन्न प्रतियोगिताको आयोजकको राष्ट्र घोषणा गरेको हो। जसमा नेपालले पनि बाङ्लादेशसँगै २०२७ को यू-१९ विश्वकप आयोजना गर्ने मौका पाएको हो।

त्यस्तै, सन् २०२५ को यू-१९ महिला विश्वकप भने मलेसिया र थाइल्यान्डले संयुक्त रुपमा आयोजना गर्नेछन्।

यसैगरी, सन् २०२४ को यू-१९ पुरुष विश्वकप आयोजनाको जिम्मा श्रीलंकाले पाएको छ। त्यसपछि सन् २०२६ को यू-१९ पुरुष विश्वकप भने जिम्बाबे र नामिबियाले संयुक्त रुपमा आयोजना गर्न पाउने भएका छन्।

यससँगै आईसीसी बोर्ड बैठकले सन् २०२७ को पुरुष विश्वकपमा १४ टोली सहभागी हुने तय गरेको छ। जसमध्ये चार टोली अन्तर्राष्ट्रिय छनोट प्रतियोगिताबाट तय हुनेछन्। बाँकी १० टोलीमध्ये दक्षिण अफ्रिका र जिम्बाबे आयोजकका रुपमा र आठ टोली एकदिवसीय वरियताका आधारमा तय हुनेछन्।

त्यस्तै, सन् २०२४ को महिला टी-२० विश्वकपमा १० टोली प्रतिस्पर्धा गर्नेछन्।
 

सन्दीप लामिछानेलाई थप ५ दिन थुनामा राखेर अनुसन्धान गर्न अनुमति

काठमाडौं, २७ असोज । सन्दीप लामिछानेलाई थप ५ दिन थुनामा राखेर अनुसन्धान गर्न अदालतले अनुमति दिएको छ। बलात्कारको अभियोगमा प्रहरी हिरासतमा रहेका लामिछानेलाई आज प्रहरीले जिल्ला अदालतमा उपस्थित गराएको थियो।
अदालतले उनलाई थप ५ दिन थुनामा राखेर अनुसन्धान गर्न अनुमति दिएको हो । असोज २० गते पक्राउ परेका क्रिकेटर लामिछानेलाई यसअघि अदालतले ७ दिनको म्याद दिएको थियो। गत भदौ ५ गते १७ वर्षीय नाबालिगमाथि जबरजस्ती करणी गरेको भन्दै भदौ २१ गते प्रहरी वृत्त गौशालामा सन्दीपबिरुद्ध जाहेरी परेको थियो।
 

सन्दीप लामिछानेलाई एक साता हिरासतमा राख्न अदालतको अनुमति

काठमाडौं, २४ असोज । क्रिकेटर सन्दीप लामिछानेलाई सात दिन हिरासतमा राखेर अनुसन्धान गर्न काठमाडौं जिल्ला अदालतले अनुमति दिएको छ । नाबालिगमाथि बलात्कार गरेको आरोप लागेका सन्दीपलाई विमानस्थलबाट २० असोजमा प्रहरीले पक्राउ गरेको थियो ।

यद्यपी दशैं बिदाका कारण अदालत बन्द हुँदा सोमबार उनलाई अदालतमा उपस्थित गराइएको हो । काठमाडौं जिल्ला अदालतले अनुसन्धान गर्न २० गतेबाट गणना हुने गरि ७ दिनका लागि म्याद थप गरेको छ । अनुसन्धानको लागि लिइएको म्याद असोज २७ गते, बिहीबार सकिनेछ ।

भदौ ५ गते १७ वर्षीया नाबालिगलाई बलात्कार गरेको आरोप लागेका नेपाली राष्ट्रिय क्रिकेट टोलीका पुर्व कप्तान लामिछाने विगत एक महिनादेखि विदेशमा रहेका थिए । पक्राउ पूर्जी जारी भएको करिब एक महिनापछि मात्र उनी नेपाल आएका हुन् ।