मंगोलियाविरुद्ध नेपालको कीर्तिमानी जित

काठमाडौं, १० भदौ । कुशल मल्ल र दीपेन्द्रसिंह ऐरीको विश्व कीर्तिमानी प्रदर्शनमा नेपाली राष्ट्रिय क्रिकेट टोलीले चीनको हाङजाओमा जारी १९औं एसियाली खेलकुदमा सानदार सुरुआत गरेको छ। 

समूह चरणको पहिलो खेलमा नेपालले मंगोलियाविरुद्ध २ सय ७३ रनको कीर्तिमानी जित हासिल गरेको हो।  नेपालले दिएको ३ सय १५ रनको कीर्तिमानी लक्ष्य पछ्याएको मंगोलिया १३.१ ओभरमा ४१ रन बनाउँदा अलआउट भयो। 

मंगोलियालाई कम स्कोरमा रोक्न नेपालका करण केसी, अविनास बोहोरा र सन्दीप लामिछानेले समान २ विकेट लिए। सोमपाल कामी, कुशल भुर्तेल र दीपेन्द्र सिंह ऐरीले समान १ विकेट आफ्नो नाममा गरे। 

मंगोलियामा जमयानसुरेन दावासुरेनले बनाएको १० रन रन नै सर्वाधिक रह्यो। अन्य ब्याटरले दोहोरो अंकको स्कोर छुन सकेनन्।

एक ब्याटरले ३ रन थपे। अन्य तीन ब्याटरले १ रन जोडे। बाँकी पाँच ब्याटर शून्य रनमा पवेलियन फर्के। एक खेलाडी भने २ रनमा नटआउट रहे। 

त्यसअघि झेझियाङ युनिभर्सिटी अफ टेक्नोलोजी पिङफेङ क्रिकेट फिल्डमा मंगोलियाले टस जितेर फिल्डिङ रोजेपछि ब्याटिङ गरेको नेपालले निर्धारित २० ओभरमा ३ विकेटको क्षतिमा ३ सय १४ रनको कीर्तिमानी योगफल तयार पारेको थियो। 

नेपालले टी आईमा इतिहासकै उच्च योगफल तयार पारेको हो। यसअघि अफगानिस्तान र चेक रिपब्लिकनले समान २ सय ७८ रनको योगफल तयार बनाएका थिए। 

चौथो विकेटका लागि युवा ब्याटर कुशल मल्ल र कप्तान रोहित पौडेलले १ सय ९३ रनको कीर्तिमानी साझेदारी गरेपछि नेपालले विशाल लक्ष्य दिएको हो। कुनै पनि खेलमा तेस्रो विकेटका लागि नेपाली ब्याटरले गरेको यो अहिलेसम्मकै उच्च साझेदारी हो। 

मंगोलियाविरुद्ध कुशल र दीपेन्द्रले विश्व कीर्तिमानी प्रदर्शन गरे। ३४ बलमा शतक पूरा गरेका मल्लले विश्व कीर्तिमान आफ्नो नाममा गरे। यसअघि टी-२० आईमा सर्वाधिक छिटो शतक ३५ बलको थियो। 

५० बलको सामना गरेका कुशलले ८ चौका र १२ छक्का हान्दै १ सय ३७ रनमा नटआउट रहे। आक्रामक अलराउन्डर दीपेन्द्रसिंह ऐरीले ९ बलमा अर्धशतक पूरा गर्दै दुर्लभ विश्व कीर्तिमान आफ्नो नाममा गरे। यसअघि भारतीय ब्याटर युवराज सिंहले को बलमा अर्धशतक पूरा गरेका थिए। दीपेन्द्र ५२ रनमा नटआउट रहे।

रोहितले २७ बलमा २ चौका र ६ छक्का प्रहार गर्दै ६१ रनको योगदान दिए। ओपनर कुशल भुर्तेल १९ तथा आशिफ शेख १६ रनमा आउट भए। 

एसियाडमा समूह बीमा रहेको नेपालले आफ्नो दोस्रो खेलमा आइतबार मालदिभ्ससँग खेल्नेछ।
 

भारतसँग नेपाल १० विकेटले पराजित

काठमाडौं, १८ भदौ । श्रीलंकाको क्यान्डीमा भएको एसीसी एसिया कप अन्तर्गत भएको खेलमा नेपाल भारतसँग पराजित भएको छ। सोमबार साँझ भएको समूह चरणको अन्तिम खेलमा भारतसँग १० विकेटले पराजित भएसँगै नेपाल एसिया कपबाट बाहिरिएको छ। 

पहिलो खेलमा पाकिस्तानसँग पराजित भएको नेपाल सोमबार भारतसँग पनि पराजित हुँदै प्रतियोगिताबाट बाहिरिएको हो। यसअघि टस हारेर पहिले ब्याटिङ गरेको नेपालले भारतविरुद्ध ४८.२ ओभरमा सबै विकेट गुमाउँदै  २३० रन बनाएको थियो।

जवाफी २३१ रनको लक्ष्य पछ्याएको भारतले ब्याटिङ गर्दा वर्षा भएपछि खेल रोकिएको थियो। निरन्तर वर्षा भएपछि राति साढे १० बजेपछि मात्र खेल सुरु भयो। 

तर खेल २३ ओभरमा झारिएको थियो। उक्त ओभर अनुसार १४५ रनको लक्ष्य पाएको भारतले २०.१ ओभरमै लक्ष्य पूरा गर्‍यो। 

यसअघि एक खेलमा जित र एक खेलमा अंक बाँडेको पाकिस्तान सुपर फोरमा पुगिसकेको छ। नेपाललाई हराएसँगै भारत पनि सुपर फोरमा पुगेको छ। 

नेपालका लागि ओपनर आशिफ शेखले सर्वाधिक ५८ रनको योदान दिए भने सोमपाल कामीले ४८ रन जोडे। कुशल भुर्तेलले ३८ रन जोडेका थिए। मध्यक्रममा आएका अन्य ब्याटरले दोहोरो अंकमा रन जोड्न सकेनन्।

भारतका लागि कप्तान रोहित शर्मा र शुभमन गिलले अर्धशतकीय पारी खेले। नेपालविरुद्ध शर्माले ५९ बलको सामना गर्दै ७४ रन जोडे भने गिलले ६२ बलमा ७६ रन जोडे।

नेपाली बलर मध्ये पूर्व कप्तानसमेत रहेका सन्दीप लामिछाने महँगा सावित भए। उनले चार ओभर बलिङ गर्दै ३९ रन खर्चिए।

एसियन कप क्रिकेटः नेपालले भारतसँग भिड्दै

काठमाडौं,१८ भदौ । आज नेपाल र भारतका बीचमा ऐतिहासिक क्रिकेट प्रतिस्पर्धा हुँदैछ । ​एसियन कप क्रिकेट– २०२३ अन्तर्गत नेपालले भारतसँग ऐतिहासिक प्रतिस्पर्धा गर्न लागेको हो । 

सो ऐतिहासिक प्रतिस्पर्धा श्रीलंकाको पालेकेले इन्टरनेसल क्रिकेट स्टेडियममा हुनेछ । सो खेल नेपाली समय अनुसार दिउँसो ३ः ४५ बजेबाट सुरु हुनेछ ।

नेपालले भारतसँग पहिलो पटक यो उपल्लो स्तरको खेल खेल्न लागेको पहिलो पटक हो । नेपालले यसअघि पहिलो खेलमा पाकिस्तानसँग २ सय ३८ रनले पराजित भएको थियो, सो खेल पाकिस्तानको क्रिकेट मैदानमा भएको थियो । 
 

बहराइनमाथि नेपालको सानदार जित 

काठमाडौं, १५ भदौ । आईसीसी महिला टी-२० विश्वकप एसिया क्षेत्र छनोटमानेपालले बहराइनमाथि सानदार जित निकालेको छ । 

शुक्रबार भएको खेलमा नेपालले बहराइनमाथि १० विकेटको सानदार जित निकालेको हो । जितसँगै नेपालको सेमिफाइनल पुग्ने सम्भावना बलियो बनेको छ । 

बहराइनले दिएको ३२ रनको झिनो लक्ष्य नेपालले २.५ ओभरमा बिना विकेटको क्षतिमा भेट्टाएको हो । नेपालका लागि कविता कुँवर १७ र सीता राना मगर २ रनमा अविजित रहिन् । १४ बलको सामना गरेकी कविताले तीन चौका प्रहार गरेकी थिइन् ।

यसअघि मलेसियाको क्वालालम्पुर सेलान्गोर टर्फ क्लबमा टस जितेर ब्याटिङ रोजेको बहराइनले १५.४ ओभरमा सबै विकेट गुमाएर ३१ रनको योगफल तयार पारेको थियो । बहराइनका लागि दिपिका रासंगिकाले ११ रन बनाउनुबाहेक अन्य ब्याटरले दोहोरो अंकमा रन जोड्न सकेनन् ।

नेपालका लागि इन्दु बर्माले ३, खुसी डंगोलले २ तथा कप्तान रुबिना क्षेत्री, कविता कुँवर र पूजा महतोले समान १-१ विकेट लिएका थिए । नेपालले आफ्नो पहिलो खेलमा घरेलु टोली मलेसियालाई ५ रनले पराजित गरेको थियो ।
 

एसिया कप क्रिकेट आजदेखि : नेपालले पाकिस्तानसँग खेल्दै

काठमाडौं, १३ भदौ । नेपाल आज पहिलोपटक एसियाको सबैभन्दा ठूलो एकदिवसीय अन्तर्राष्ट्रिय क्रिकेट प्रतियोगिता एसिया कप खेल्दै छ। पाकिस्तानस्थित मुलतान क्रिकेट स्टेडियममा हुने एसिया कपको उद्घाटन खेलमा नेपाल ओडीआई वरीयताको शीर्ष स्थानमा रहेको पाकिस्तानसँग भिड्ने भएको हो। नेपालको क्रिकेट इतिहासमा नेपाली टोली पहिलोपटक ओडीआई वरीयताको शीर्ष टोली पाकिस्तानसँग प्रतिस्पर्धा गर्न लागेको हो।  
नेपाल भने ओडीआई वरीयताको १५ औँ स्थानमा छ। नेपाल-पाकिस्तानको खेल नेपाली समयानुसार दिउँसो सवा ३ बजे सुरु हुनेछ। 
 

सन्दीपविरुद्धको मुद्दाको अर्को पेसी २१ गते, सोमबार पाकिस्तान जाँदै 

काठमाडौं, १० भदौ । नाबालिग बलात्कार मुद्दा खेपिरहेका सन्दीप लामिछानेविरुद्धको मुद्दाको अर्को पेसी भदौ २१ गते तोकिएको छ। आइतबार अन्तिम सुनुवाइका लागि न्यायाधीश प्रकाशकुमार पण्डितको इजलासमा पाँचौं नम्बरमा पेसी तोकिए पनि हेर्न नभ्याइने हुँदै स्थगित भएको थियो। 

सुनुवाइ स्थगित भएसँगै एसिया कपका लागि उनको पाकिस्तान यात्रा तय भएको छ। उनी भोलि (सोमबार) नै पाकिस्तान जाने बताइएको छ। उनको अर्को पेसी भदौ २१ गते तोकिएको छ। १३ गतेदेखि हुने एसिया कपमा लामिछाने नेपाली टोलीमा छन्। नेपाली टोली यसअघि नै पाकिस्तान गइसकेको भए पनि सन्दीप मुद्दाका कारण यतै रोकिएका थिए। 

सन्दीपका कानुन व्यवसायी मुरारी सापकोटाले सन्दीपविरुद्धको मुद्दाको पेसी २१ गते तोकिएको जानकारी दिए। यससँगै सन्दीपले पाकिस्तान जाने तयारी गरिरहेको उनले बताए।
 

टी-ट्वान्टी सिरिजः हङकङलाई हराउँदै नेपालले जित्यो उपाधि

काठमाडौं, ९ भदौ । मलेसियामा सम्पन्न चारदेशीय महिला टी-ट्वान्टी क्रिकेट सिरिजको उपाधि नेपालले जितेको छ । शनिबार भएको फाइनलमा हङकङलाई डिएल मेथडअनुसार १३ रनले पराजित गर्दै नेपालले उपाधि जितेको हो ।

हङकङले दिएको १ सय २ रनको लक्ष्य पछ्याउने क्रममा नेपालले एक विकेटको क्षतिमा ५ ओभर ३ बलमा ३७ रन जोड्दा वर्षाका कारण खेल प्रभावित बनेको थियो ।

त्यसपछि डिएल मेथडमा नेपालले उपाधि जितेको हो । नेपाली ब्याटर इन्दु वर्मा १९ रन तथा सीता राना मगर १३ रनमा अविजित थिए । काजल श्रेष्ठ शून्य रनमा आउट भए । हङकङका लागि इकरा सहारले १ विकेट लिइन् ।

यसअघि बायुमास ओभलमा टस हारेर पहिले ब्याटिङ गरेको हङकङले निर्धारित २० ओभरमा ६ विकेट गुमाएर १ सय १ रन बनायो ।

हङकङका लागि कान यिङ्ग चानले सर्वाधिक २९ रनको योगदान गरिन् । मारिना एन्टोनियाले १९ रन बनाइन् । शान्जिन शहजादले १४ तथा यास्मिन दास्वानीले ११ रन जोडे ।

नेपालका लागि खुसी डंगोलले सर्वाधिक ३ विकेट हात पारिन् । कविता जोशी र अश्मिना कर्माचार्यले एक-एक विकेट लिए ।

सन्दीप लामिछानेविरुद्धको मुद्दामा सुनुवाइ स्थगित

काठमाडौं, ३२ साउन । क्रिकेटर सन्दीप लामिछानेविरुद्धको मुद्दामा आजदेखि काठमाडौं जिल्ला अदालतमा हुने भनिएको नियमित सुनुवाइ स्थगित भएको छ।

न्यायाधीश राजुकुमार खतिवडाले गौशाला २६ की आमाको जन्ममिति दुईवटा देखिन आएको भन्दै प्रमाणीकरण गर्न आदेश दिँदै त्यसपपछि मात्र फैसला बहस हुने आदेश सुनाएका छन्।

अदालतले जन्ममिति प्रमाणीकरण प्राप्त भएको एक साताभित्र पेसी तोक्ने जानकारी गराएको बताइएको छ।

लामिछानेले काठमाडौंको गौशालास्थित एक होटलमा एक नाबालिकलाई बलात्कार गरेको आरोपमा मुद्दा खेपिरहेका छन्। विश्वकप छनोटका लागि जिम्बाबे प्रस्थान गरेयता उनको मुद्दाले निरन्तरता पाउन सकेको थिएन।

यसअघि नाबालिक बलात्कार मुद्दाको थुनछेक बहसका क्रममा अदालतले लामिछानेलाई पुर्पक्षका लागि थुनामा पठाए पनि उच्च अदालत पाटनले विदेश जान नपाउनेगरी २० लाख रुपैयाँ धरौटीमा छाड्न आदेश दिएको थियो। सर्वोच्च अदालतले भने लामिछानेलाई विदेशका प्रतियोगितामा भाग लिन जान पाउने आदेश दिएको थियो।
 

कुवेतमा पाँच जनालाई मृत्युदण्ड दिइयो

एजेन्सी । कुवेतले बिहीबार पाँच जनालाई मृत्युदण्ड दिएको छ। प्राण हरणको दण्ड पाउनेमा सन् २०१५ मा आत्मघाती बम विष्फोटमा संलग्न भएको आरोपमा दोषी ठहरिएका इस्लामिक स्टेट समूहका एक सदस्यसमेत रहेका कुवेति सार्वजनिक अभियोजनको कार्यालयले जनाएको छ। उक्त आक्रमणमा २६ जनाले ज्यान गुमाएका थिए। 

कुवेती अभियोजन कार्यालयले एक विज्ञप्ति निकालेर  देशको केन्द्रीय कारागारमा मृत्युदण्डको कार्यान्वयन गरिएको र त्यसको अनुगमन गरिएको बताएको छ। मृत्युदण्ड पाएका अधिकांश हत्यामा दोषी ठहरिएका पनि उक्त कार्यालयले स्पष्ट गरेको छ। 
 

युएईमाथि नेपालको जित

काठमाडौं, ३ साउन ।  नेपालले एसिसी इमर्जिङ टिम्स एसिया कपमा जितका साथ अन्त्य गरेको छ। बुधबार भएको समूहको अन्तिम खेलमा युएईलाई ३ विकेटले हराउँदै नेपालले प्रतियोगितामा सुखद् अन्त्य गरेको हो।

युएईविरुद्ध नेपाललाई जित दिलाउन कुशल भुर्तेलले अलराउन्ड प्रदर्शन गरे। उनले बलिङमा ६ विकेट लिए भने ब्याटिङमा अर्धशतकीय पारी खेले।

पहिला ब्याटिङ गर्दैै युएईले दिएको १५८ रनको लक्ष्य नेपालले २३ ओभरमा ७ विकेट गुमाउँदै भेट्टायो। नेपलाको जितमा कशुल भुर्तेलले आक्रामक इनिङ खेले। उनले ४३ बलमा ९ चौका र ४ छक्का प्रहार गर्दै ७१ रन बनाए ।

यस्तै, देव खनालले ३८ बलमा २४ रन बनाउँदा सन्दीप जोराले १५ बलमा २४ रन बनाए भने कप्तान रोहित पौडेलले ११ रनको योगदान दिए। ९८ रन बनाउँदा दोस्रो विकेट गुमाएको नेपालले त्यसपछि ५३ रन बनाउँदा ५ विकेट गुमाएको थियो।

युएईका लागि मोहम्मद फराजुद्दिनले ६ ओभरमा ३६ रन खर्चेर ५ विकेट लिए भने मुहम्मद जवादुल्लाहले २ विकेट लिए।

कुशल भुर्तेलल घातक बलिङ गरेपछि पहिला ब्याटिङ गरेको युएई ४४ ओभरमा १५७ रनमै अलआउट भयो। उसका लागि लवप्रितसिंहले ५२ रन बनाउँदा इथान डिसुजाले १८, अश्वन्थ वालथापाले १६ र जस जियाननीले १३ रनको योगदान दिए।

युएईको इनिङ धरासायी बनाउने क्रममा कुशलले १० ओभरमा ४० रन खर्चेर ६ विकेट लिए। यसअघि ५२ लिस्ट एमा ४ विकेट मात्र लिएका कुशलको यो करिअरकै उत्कष्ट स्पेल हो। उनले एकदिवसीयमा ४ र टि–२०मा १ विकेट लिएका छन्।

उनीसँगै राष्ट्रिय टिमबाट डेब्यू खेलमै स्पिनर मौसम ढकालले २ विकेट लिए। पवन सर्राफ र कुशल मल्लको नाममा पनि १ विकेट रह्यो। युएईका दशै विकेट स्पिनरले लिए।

यसअघि नेपाल पाकिस्तान एसँग ४ विकेट र भारतसँग १० विकेटले पराजित भएको थियो।