शिक्षक र सरकारबीच औपचारिक वार्ता हुँदै

काठमाडौं, ५ असोज । सरकार र आन्दोलनरत शिक्षकहरूबीच आज औपचारिक वार्ता हुँदैछ। वार्ता बिहान ९ बजेबाट सुरु हुने तयारी छ।  यसअघि बिहीवार बिहान र बेलुका दुई चरणमा अनौपचारिक छलफल भएको थियो। तर, छलफलमा कुनै ठोस सहमति हुन नसकेपछि आज औपचारिक वार्ता हुन लागेको हो।

बिहीवार बिहानको छलफलमा उपप्रधान तथा गृहमन्त्री नारायणकाजी श्रेष्ठ, शिक्षा मन्त्री अशोक कुमार राई र शिक्षक आन्दोलनको नेतृत्वकर्ता नेपाल शिक्षक महासङ्घका प्रतिनिधि सहभागी थिए। बिहीवारै बेलुका फेरि गृहमन्त्री श्रेष्ठ, शिक्षामन्त्री राईका साथै सञ्चार तथा सूचना प्रविधिमन्त्री रेखा शर्मा, अर्थमन्त्री डा. प्रकाशशरण महत र कानुन न्याय तथा संसदीय व्यवस्थामन्त्री धनराज गुरुङ सहित ती मन्त्रालयका सचिवहरूसहित शिक्षकका प्रतिनिधिहरूसँग छलफल भएको थियो।

साँझ ७ बजेदेखि सुरु भएको छलफल बेलुका साढे ९ बजेसम्म चलेको थियो। सो छलफलमा शिक्षकका प्रतिनिधिहरूले १७ बुँदे माग प्रस्तुत गरेका थिए। मन्त्रीहरूले कतिपय माग संविधान संशोधन गर्नुपर्ने खालका रहेकाले उक्त मागमा सहमति हुन नसक्ने बताएका थिए।

शिक्षकहरूसँगको छलफलपछि सञ्चारमन्त्री रेखा शर्माले आजको औपचारिक वार्ताबाट सहमतिमा पुग्ने प्रयास हुने र सहमति हुने/नहुने विषय शिक्षक प्रतिनिधिहरूमा निर्भर हुने बताइन्।
 

किर्ते कागजमा सयभन्दा बढी जापान लगियो

काठमाडौं । नेपाल जाइका अल्मुनाई एसोसिएसन (जान)को लेटरप्याड र सोही संस्थाको अध्यक्ष डा. रामचन्द्र भुसालको नक्कली हस्ताक्षर प्रयोग गरी तीन वर्षभित्र एक सयभन्दा बढी प्रशिक्षार्थी कामदार जापान पुगेको खुलासा भएको छ ।
श्रम, रोजगार तथा सामाजिक सुरक्षा मन्त्रालयबाट प्रशिक्षार्थी कामदार जापान पठाउन भाषा र संस्कृतिसम्बन्धी परीक्षा लिन स्वीकृति लिएको जान भन्ने संस्थाको कागजातको दुरुपयोग गरी प्रशिक्षार्थी कामदार विदेश पुगेका हुन् ।
गत असारको पहिलो साता जानका भाषा परीक्षकले सामाजिक सञ्जालबाट भाषा परीक्षामा अनुत्तीर्ण भएका ३ जना प्रशिक्षार्थी जापान पुगेको जानकारी पाएपछि पहिलो पटक संस्थाको लेटर प्याड र अध्यक्ष डा. भुसालको हस्ताक्षर किर्ते गरी अनुचित ढंगबाट परीक्षार्थी कामदारहरू जापान पुगेको खुलासा भएको हो ।

यससम्बन्धी छानबिन गर्न वैदेशिक रोजगार विभागका प्रशासन शाखा निर्देशक एवं सूचना अधिकारी कविराज उप्रेतीको संयोजकत्वमा तीन सदस्यीय छानबिन समिति गठन गरिएको छ । समितिलाई छानबिनका लागि १ महिनाको समय दिइएको छ ।

जानका अध्यक्ष डा. भुसालले कुरा गर्दै भने– ‘हामीले गत असारको पहिलो सातामा जानको भाषा परीक्षामा अनुत्तीर्ण भएकाहरू जापान पुगेको भेटेपछि सम्बन्धित मेनपावर कम्पनीलाई सोधेका थियौं । उक्त कम्पनीले ती व्यक्तिहरू जापान पुगेको पुष्टि गरेपछि हामीले यो कसरी सम्भव छ भनेर कागजात मगाउँदा कम्पनीले जापान पुगेका व्यक्तिको भाषा उत्तीर्णको नक्कली प्रमाणपत्रको फोटोकपी हामीलाई उपलब्ध गराएको थियो । जेठ २१ गतेको मिति उल्लेख भएको उक्त प्रमाणपत्र जानको लेटरप्याड र मेरो हस्ताक्षर किर्ते गरिएको बनाइएको थियो । त्यसपछि हामीले असारको ८ गते वैदेशिक रोजगार विभाग, श्रम मन्त्रालय, सम्बन्धित मेनपावर, वैदेशिक रोजगार प्रवद्र्धन बोर्ड र त्रिभुवन विमानस्थलको अध्यागमनलाई यसबारे जानकारी गरायौं र यसमा छानबिन गर्न आग्रह ग¥यौं ।’ 

उनले त्रिभुवन विमानस्थलको अध्यागमनमा ती कामदारहरूको प्रमाणपत्रलाई जानको चिठ्ठीसँग जुधाएर हेरेको भए यस्तो गलत काम हुनै नसक्ने दाबी गरे ।  यो समाचार नेपाल समाचारपत्र दैनिकमा छ ।
 

शिक्षक र सरकारबीचको वार्ता निष्कर्षविहीन

काठमाडौं ।  आन्दोलनरत शिक्षक र सरकारबीचको वार्ता निष्कर्षविहीन भएको छ । बिहीबार साँझ गृहमन्त्रालयमा भएको वार्ता निष्कर्षविहीन भएको हो । बैठक शुक्रबार बिहान ८ बजे बस्ने तय भएको नेपाल शिक्षक संघका अध्यक्ष सोमनाथ गिरीले जानकारी दिए ।
गिरीले आन्दोलन र वार्ता सँगसँगै लाने बताए । आन्दोलनरत शिक्षकका प्रतिनिधिहरुसँग उपप्रधानमन्त्री तथा गृहमन्त्री नारायणकाजी श्रेष्ठ, शिक्षा, विज्ञान तथा प्रविधिमन्त्री अशोक राई, अर्थमन्त्री डा. प्रकाशशरण महत र कानुनमन्त्री धनराज गुरुङसहितको सरकारी टोलीसँग छलफल भएको थियो ।
 

कन्सल्टेन्सीलाई अध्ययन तथा कलेजको नाममा वैदेशिक रोजगारीमा पठाउन प्रतिबन्ध लगाइने 

काठमाडौं, ४ असोज । श्रम, रोजगार तथा सामाजिक सुरक्षामन्त्री शरतसिंह भण्डारीले शैक्षिक परामर्श केन्द्र (कन्सल्टेन्सी)लाई अध्ययन तथा कलेजको नाममा वैदेशिक रोजगारीमा पठाउन सरकारले प्रतिबन्ध लगाउने बताएका छन् । बिहीबार प्रतिनिधि सभा अन्तर्गतको उद्योग तथा वाणिज्य र श्रम तथा उपभोक्ता हित समिति बैठकमा बोल्दै मन्त्री भण्डारीले पछिल्लो समय वैदेशिक रोजगारीका लागि व्यक्तिगत र भिजिट भिषाको नाममा जानेहरुमा बढी विकृति देखिएको जानकारी दिए ।
मन्त्री भण्डारीले उक्त काम म्यानपावर भन्दा पनि कन्सल्टेन्सीहरुमार्फत अध्ययन र कलेजको नाममा भइरहेको पाइएको बताए । उनले वैदेशिक रोजगार व्यवसायी संघमार्फत वैदेशिक रोजगारीमा जानेहरुमा समस्या नभएको दाबी समेत गरेका छन् ।
मन्त्री सिंहले शैक्षिक परामर्श केन्द्रहरुले वैदेशिक रोजगारीमा पठाउने श्रमिकहरुको रेकर्ड सरकारसँग पनि नभएको बताए । त्यस्ता संस्थाहरुको कुनै उत्तरदायित्व नहुने भन्दै सरकारले वैदेशिक रोजगारीमा जाने व्यक्तिहरुले श्रम स्वीकृत लिएर मात्रै जानुपर्ने व्यवस्था प्रतिकूल हुनेगरी शैक्षिक परामर्श केन्द्रहरुले गर्ने यस्तो कार्य रोक्न सम्बन्धित मन्त्रालयलाई पत्राचार गर्ने तयारी गरिएको बताए ।

क्यानडाबाट भारतीय भिसा बन्द

एजेन्सी । भारतले क्यानडाको राजधानी ओटावास्थित आफ्नो दूतावासबाट जारी गर्दै आएको प्रवेशाज्ञा (भिसा) सेवा बन्द गरेको छ। अर्को सूचना जारी नभएसम्म भिसा सेवा बन्द गरिएको दूतावासका निम्ति सेवा प्रवाह गर्दै आएको बिएसएल इन्टरनेशनल सर्भिसेजले बिहीबार जनाएको छ। 

 बिएसएल इन्टरनेशनल सर्भिसेजले भारत सरकारका निम्ति भिसा, राहदानी, ‘कन्सुलर’, प्रमाणीकरण र नागरिक सेवा प्रवाहका साथै प्रबन्ध गर्दै आएको छ। बिएसएले सरकारी र विश्वका विभिन्न देशमा रहेका भारतीय कूटनीतिक नियोगमा सेवा प्रवाह गर्दै आएको छ।

 उक्त कम्पनीले आज एक सूचना जारी गर्दै भारतीय भिसा सेवा अर्को सूचना नभएसम्म स्थगन गरिएको जनाउँदै बेलाबेलामा कम्पनीको वेबसाइट हेर्न सम्बन्धित सबैलाई आग्रह गरेको छ।

भदौ महिनामा वैदेशिक रोजगारीमा जाने नेपालीको संख्यामा कमी

काठमाडौं, ४ भदौ । भदौ महिनामा वैदेशिक रोजगारीमा जाने नेपालीको संख्या करिब दुई वर्षपछि कै कम भएको छ । वैदेशिक रोजगार विभागको तथ्यांकअनुसार करिब दुई वर्षपछि भदौ महिनामा हालसम्मकै कम नेपालीहरु विदेशिएका छन् ।

कोरोना महामारीका कारण प्रभावित भएको वैदेशिक रोजगारी कोभिडपछि ह्वात्तै बढेको थियो । गत वर्ष हालसम्मकै धेरै नेपाली विदेशिएका थिए । तर, यो वर्षको शुरुवात देखिनै रोजगारीमा जानेको संख्या घट्दै गएको पाइएको छ ।

नेपालबाट २०७८ को असोजमा कोभिडले प्रभावित भएको समय ३९ हजार ६७१ जना विदेशिएका थिए । त्यसपछि रोजगारीमा जानेको संख्या ह्वात्तै बढेको थियो । त्यसपछि चालु आर्थिक वर्षको भदौ महिनामा २०७८ को असोजपछिकै कम नेपाली युवा विदेशिएका छन् ।

भदौ महिनामा ५० हजार ८८४ जना नेपाली विदेशिएका छन् । गत साउनमा ५५ हजार ५७५ जना नेपाली विदेशिएका थिए । विभागले सार्वजनिक गरेको तथ्याङ्कमा भदौ महिना विश्वका १०२ मुलुकमा रोजगारीको खोजीमा पुगेका छन् ।

भदौमा ४४ हजार १९७ जना पुरुष र ६ हजार ६८७ जना महिला रहेका छन् । उक्त अवधिमा ३५ हजार ३०३ जनाले नयाँ श्रम स्वीकृति लिई विदेशिएका छन् भने १५ हजार ५८१ जना पुनः श्रम स्वीकृति लिई विदेशिएका छन् ।

भदौ महिनामा नेपालबाट सबैभन्दा बढी युनाइटेड अरब इमिरेट्स (युएई)मा रोजगारीको खोजीमा पुगेका छन । भदौमा मात्रै युएईमा ११ हजार ७०९ जना पुगेको विभागले जनाएको छ । त्यसपछि कतारमा ९ हजार ७६७ जना, साउदी अरेबियामा ८ हजार ८३९ जना, मलेसियामा ८ हजार १६९ जना, कुवेतमा ३ हजार ३६१ जना र माल्टामा १ हजार ५३ जना पुगेका छन् ।

भदौ महिनामा खाडी मुलुकबाहेक युरोपमा जानेको संख्या उच्च छ । भदौमा माल्टामा १ हजार ५३ जना नेपाली रोजगारीको खोजीमा पुगेका छन् । त्यसपछि जापानमा ९४६ जना, क्रोसियामा ८९२ जना, साइप्रसमा ४७७ जना, माल्दिभ्समा ६५९ जना, मौरिससमा ५४६ जना, पोल्यान्डमा २५३ जना, दक्षिण कोरियामा ८७२ जना र रोमनियामा ५४२ जना पुगेका छन् ।

त्यसैगरी, रसियामा १६१ जना, सर्बियामा १५२ जना, बेलायतमा १८७ जना, चीनमा २७५ जनाले चीनका लागि श्रम स्वीकृति लिएका छन् । भदौमा ७३१ वटा म्यानपावरबाट २७ हजार १७१ जना विदेशिएका छन् ।

पछिल्लो समय दक्ष कामदार बढी विदेशिएको पाइएको छ । विगतका वर्षहरुमा अदक्ष कामदार विदेशिदा दुर्घटनालगायत विभिन्न समस्या आएको भन्दै सरकारले तालिममा जोड दिँदै आएको छ । सरकारले हरेक वर्ष हजारौं जनालाई तालिम दिँदै आएको छ । सोहीअनुसार विदेशमा दक्ष कामदार विदेशिने संख्या बढेको विभागले जनाएको छ ।

भदौमा ५० हजार ८८४ जना विदेशिँदा १० हजार ८४९ जना नेपाली मात्रै अदक्ष कामदार विदेशिएका छन् । त्यसबाहेक ३५ हजार ८१० जना दक्ष, ४ हजार ९९ जना अर्धदक्ष, ८७ जना प्रोफेशनल र ३९ जना उच्च दक्ष भएको नेपाली विदेशिएका छन् ।

काठमाडौंमा आजपनि शिक्षकहरूको प्रदर्शन

काठमाडौं, ४ असोज । विद्यालय शिक्षा विधेयकका केही प्रावधानमा असन्तुष्टि जनाउँदै शिक्षकहरूले आज पनि काठमाडाैंमा प्रदर्शन गरेका छन् । देशभरबाट आन्दाेलनमा सहभागी हुन शिक्षकहरू काठमाडाैं आएका छन् । 

उनीहरूले विधेयक सच्चाउन माग गरेका छन् । आज बिहान गृहमन्त्रीसँग भएकाे वार्ता निष्कर्षविहीन भएकाे थियाे । काठमाडाैंकाे माइतीघर बानेश्वर सडकमा हजाराैँ शिक्षकहरूले प्रदर्शन थालेपछि उपत्यकाकाे सवारी प्रभावित बनेका छ । सडकमा घण्टाैँ जाम भएपछि नागरिक समस्यामा परेका छन् । 

वैदेशिक रोजगारीः दुई म्यानपावर कारबाहीमा

काठमाडौं, ४ भदौ ।  वैदेशिक रोजगारीमा पठाउन श्रमिकसँग बढी शुल्क लिने र पैसा लिएर पनि विदेश नपठाउने दुई म्यानपावर कम्पनी कारबाहीमा परेका छन् ।

श्रमिकलाई रोजगारीका लागि युक्रेन, रोमानीया र पोल्याण्ड पठाउने भन्दै रकम लिई नपठाएको र लिएको रकम समेत फिर्ता नगरेपछि विभागले युनाइटेड म्यानपावर एजेन्सी प्रालिलाई निलम्बन गरेको छ । यो म्यानपावरले श्रमिकहरूबाट रकम लिएर लामो समयसम्म पनि रोजगारीका लागि पठाएको थिएन ।

श्रमिकहरूले आफूले तिरेको रकम फिर्ता माग्दा समेत नदिएपछि विभागमा उजुरी परेको थियो । म्यानपावरका सञ्चालकलाई पटक पटक सम्पर्क गरी ऐन अनुसार रकम फिर्ता गरी मुद्दाको फरफारकका लागि अनुरोध गरे पनि नटेरेपछि निलम्बन गरेको विभागले जनाएको छ । 

यस्तै युरो एसिया एचआर सोलुसन प्रालिले वैदेशिक रोजगारीमा श्रमिक पठाउन बढी रकम लिएको पाइएपछि लिएको बढी रकम श्रमिकलाई नै फिर्ता गराई विभागले एक लाख रुपैयाँ जरिवाना गराएको छ ।

काठमाडौंमा पहिलो पटक द्रुत बस सेवा शुरु, यस्तो छ रुट तालिका

काठमाडौं, ३ भदौ । संविधान दिवसको अवसर पारेर आजदेखि काठमाडौँ उपत्यकामै पहिलो पटक ‘बस ¥यापिड ट्रान्जिट’ (बिआरटी) अर्थात् द्रुत बस सेवा सञ्चालन भएको छ ।

आज परीक्षणका रुपमा सञ्चालन गरिएको यो सेवा सर्वसाधारणका लागि भने बिहीबारबाट सञ्चालनमा आउने भएको छ । भक्तपुरको सूर्यविनायकबाट रत्नपार्कसम्मको सडक खण्डमा चल्ने द्रुत बस सेवा सञ्चालन भएपछि यात्रुले ४५ मिनेटमै सूर्यविनायकबाट रत्नपार्क पुग्न सक्ने यातायात व्यवस्था विभागको दाबी छ ।

अरु सार्वजनिक बसलाई रत्नपार्क–सूर्यविनायक पुग्न डेढघण्टा समय लाग्ने गरेकामा द्रुत बस सेवा ४५ मिनेटमै रत्नपार्कबाट सूर्यविनायक पुग्ने गरी तयारी गरिएको छ । भक्तपुरको लोकन्थलीदेखि जडीबुटी, कोटेश्वर, बानेश्वर हुँदै माइतीघरसम्मको दैनिक हुने जामले भक्तपुरबाट रत्नपार्क पुग्न कार्यालय समयमा कम्तीमा पनि डेढघण्टा लाग्ने गरेकामा अब ४५ मिनेटमै यात्रुलाई भक्तपुर काठमाडौँ सेवा दिन सकिने यातायात व्यवस्था विभागका सूचना अधिकारी इश्वरीदत्त पनेरुले जानकारी दिए ।

उनले आज भौतिक पूर्वाधार तथा यातायातमन्त्री प्रकाश ज्वालाले बस सेवाको उद्घाटन गरी दुई बसले सेवाको परीक्षण गरिने र सर्वसाधारणले बिहीबारदेखि सबै बस सञ्चालन गरी सेवा दिइने जानकारी दिए ।

सूर्यविनायक र रत्नपार्कबाट ३९ सिट क्षमता भएका २५ द्रुत बस सञ्चालन हुनेछन् । यी बस यात्रु कुरेर बस्न पाउदैनन् । विभागले निर्धारण गरेका १९ बसले बस बिसौनीमा यात्रु चढाउने र झार्ने बाहेक यात्रु कुरेर बस्न भने पाउने छैनन् ।

यसका लागि विभागले सूर्यविनायकबाट सल्लाघारी, राधेराधे, थिमिचोक, चारदोबाटो, गठ्ठाघर, कौशल्टार, लोकन्थली, जडीबुटी, कोटेश्वर, तीनकुने, शान्तिनगर, नयाँबानेश्वर, बबरमहल, माइतीघर, भद्रकाली र अन्तिम रत्नपार्कमा बस बिसौनी तोकिएको छ ।

सडकमा रातो रङगले पोतिएको लेनमा मात्र यी बस सञ्चालन हुन पाउनेछन् । त्यो लेनमा यस अवधिमा द्रत बस र आपतकालीन सेवाका सवारी साधनबाहेक अरु कुनै सवारी साधन चल्न पाउने छैनन् । सूर्यविनायकबाट बिहान ८ देखि ११ बजेसम्म र अपरान्ह ४ देखि ६ बजेसम्म सञ्चालन हुने द्रुत सेवाका बस दुवैतर्फबाट पाँच÷पाँच मिनेटको फरकमा छुट्नेछन् ।
 

आन्दोलनमा शिक्षक, ट्राफिक अवस्था अस्तव्यस्त 

काठमाडौं,३ भदौ । संघीय संसद्मा दर्ता भएको विद्यालय शिक्षासम्बन्धी विधेयकका केही प्रावधानमा असन्तुष्टि जनाउँदै नेपाल शिक्षक महासंघले बुधबारदेखि काठमाडौं केन्द्रित आन्दोलन सुरु गरेको छ । उनीहरूले माइतीघर मण्डलदेखि बानेश्वरसम्म पैदल हिँडेर प्रदर्शन गरेका थिए । प्रदर्शनले उक्त क्षेत्रको ट्राफिक अवस्था अस्तव्यस्त बनेको छ ।

शिक्षा, विज्ञान तथा प्रविधिमन्त्री अशोककुमार राईले मंगलबार दिउँसो ३ बजे बोलाएको वार्तालाई अस्वीकार गर्दै महासंघ आन्दोलनमा उत्रेको हो । महासंघले मन्त्रीबाट आफ्ना माग सम्बोधन हुन नसक्ने जनाउँदै आन्दोलन सुरु गरेको हो । गत वर्षको तथ्यांकअनुसार हाल मुलुकभर २७ हजार तीन सय ४३ सामुदायिक विद्यालय छन् भने स्थायी, अस्थायी र राहत गरी एक लाख ५७ हजार तीन सय ५४ शिक्षक कार्यरत छन् । यस्तै सामुदायिक विद्यालयमा ५३ लाख ८२ हजार विद्यार्थी छन् ।

मुलुकका विभिन्न जिल्लाबाट आएका शिक्षक र विद्यालय कर्मचारीको धर्नामा संलग्नता छ । महासंघले अस्थायी प्रकृतिका शिक्षकहरुको स्थायित्व, विद्यालय कर्मचारीको दरबन्दी सृजना, विद्यालय संरचनाबाहिर रहेका बाल कक्षा शिक्षक, अस्थायी अवधि गणना तथा निवृत्तिभरण, शिक्षक बढुवा, प्रधानाध्यापक नियुक्ति, सरुवा र कार्यसम्पादन मूल्यांकन लगायतका विषयमा सम्बोधन माग गर्दै आएको छ ।