सरकार र चिकित्सकबीच ६ बुँदे सहमति, आन्दोलन स्थगित

काठमाडौं, ३१ भदौ । सरकार र आन्दोलनरत चिकित्सकबीच ६ बुँदे सहमति भएको छ। आइतबार साँझ भएको उक्त सहमतिसँगै चिकित्सिकहरूले थालेको आन्दोलन स्थगित भएको हो।

सरकार र चिकित्सकबीच भएको सहमतिमा सञ्चो अस्पतालमा डाक्टरमाथि कुटपिट गर्ने अभियोगमा पक्राउ परेका ४ जना र पक्राउ पुर्जी जारी भएका अरू ५ जनालाई पक्राउ गरी स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन २०६६ अनुसार कारबाही गर्ने, उक्त ऐन कार्यान्वयनमा सरकारका सरोकारवाला निकाय प्रतिवद्ध रहने, स्वास्थ्यकर्मी तथा स्वास्थ्य संस्था सुरक्षा समन्वय समितिलाई सक्रिय बनाउनेलगायत बुँदामा सहमति भएको छ।

हेटौंडास्थित सञ्चो अस्पतालका दुई जना डाक्टरलाई बिरामीका आफन्तले कुटपिट गरेको घटनाको विरोधमा चिकित्सकहरूले आइतबार आकस्मिकबाहेकका सेवा बन्द गरेर प्रदर्शन गरेका थिए। चिकित्सकहरू आन्दोलनमा उत्रिएपछि स्वास्थ्य मन्त्रालयले आजै वार्ता समिति बनाएको थियो। 

६० किलो सुन तस्करी प्रकरणमा २९ जनाविरुद्ध अदालतमा मुद्दा दर्ता

काठमाडौं, ३१ भदौ । ब्रेकसुमार्फत ६० किलो सुन तस्करी प्रकरणमा २९ जनाविरुद्ध जिल्ला अदालत काठमाडौंमा मुद्दा दर्ता भएको छ। आइबार जिल्ला सरकारी वकिलको कार्यालयले २९ जनालाई प्रतिवादी बनाई मुद्दा दर्ता गरेको हो। सिआइबीले ५० जनालाई प्रतिवादी बनाउन सिफारिस गरेको थियो।
प्रतिवादीहरुबाट कुल तीन अर्ब ५० करोड बिगो दाबी गरिएको छ। तर, ट्याक्सी चालक अशोक लामा, राजन श्रेष्ठ तथा भन्सारका कर्मचारी श्रीधर टण्डन, कमल परियार र सुरेन्द्र तामाङविरुद्ध भने मुद्दा नचलाउन सरकारी वकिलको कार्यालयले राय दिएको छ।

वैदेशिक रोजगारीः साउनमा २५ प्रतिशतले बढ्यो रेमिट्यान्स

काठमाडौं, ३१ भदौ । चालु आर्थिक वर्षको साउन महिनामा रेमिट्यान्स आप्रवाह २५ प्रतिशतले बढेको छ। नेपाल राष्ट्र बैंकको एक महिनाको तथ्याँक अनुसार गत आर्थिक वर्षको साउनको तुलनामा यस वर्ष रेमिट्यान्स २५.८ प्रतिशतले बढेको हो।

साउन एक महिनामा १ खर्ब १६ अर्ब २ करोड रुपैयाँ रेमिट्यान्स भित्रिएको राष्ट्र बैंकले जनाएको छ। अघिल्लो वर्षको सोही अवधिमा विप्रेषण आप्रवाह २०.३ प्रतिशतले बढेको थियो । अमेरिकी डलरमा विप्रेषण आप्रवाह २१.५ प्रतिशतले वृद्धि भई ८७ करोड ९८ लाख पुगेको छ। अघिल्लो वर्ष यस्तो आप्रवाह १२.५ प्रतिशतले बढेको थियो ।

समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या १२.१ प्रतिशतले घटेर ३९ हजार १५२ कायम भएको छ । त्यसैगरी, वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा १९.५ प्रतिशतले घटेर १६ हजार ४२३ कायम भएको छ ।
अघिल्लो वर्षको सोही अवधिमा यस्तो संख्या ७५.४ प्रतिशतले बढेको थियो

समीक्षा अवधिमा खुद ट्रान्सफर २६.१ प्रतिशतले बढेर १ खर्ब २८ अर्ब २१ करोड पुगेको छ । अघिल्लो वर्षको सोही अवधिमा यस्तो ट्रान्सफर १८.४ प्रतिशतले बढेको थियो ।

ब्राजिलमा विमान दुर्घटना, १४ जनाको मृत्यु

एजेन्सी ।  ब्राजिलको अमेजनमा शनिबार एउटा सानो प्रोपेलर विमान दुर्घटना हुँदा १४ जनाको मृत्यु भएको छ। विमानमा रहेका १२ यात्री र चालक दलका दुई जना सदस्यको मृत्यु भएको सरकारी अधिकारीहरूले बताएका छन्। घटनाको अनुसन्धान सुरु गरिएको जनाउँदै उनीहरूले प्रतिकूल मौसमका कारण दुर्घटना भएको बताएका छन्।

अमेजनस राज्यका सुरक्षा सचिव भिनिसियस अल्मेडाले अतिकम ‘भिजिबिलिटी’मा अवतरण गर्दा दुर्घटना भएको बताएका छन्। 

ब्राजिलको विमान निर्माता कम्पनी एम्ब्रेरद्वारा निर्मित ट्वीन इन्जिन टर्बोप्रप विमानमा सुरक्षाका सबै पूर्वशर्त एवं उड्डयन नियमको पूर्णपालना गरिएको जनाइएको छ। विमान कम्पनीले एक विज्ञप्ति निकालेर यान्त्रिक खराबीका कारण दुर्घटना भएको मान्न सकिने आधार नभएको बताएको छ।
 

राष्ट्रपति कार्यालयले खोज्यो ३४ जनालाई आममाफी दिनुपर्ने आधार

काठमाडौं, ३१ भदौ । राष्ट्रपति कार्यालयले संविधान दिवसका दिन ३४ जनालाई माफी मिनाहा दिनुपर्ने स्पष्ट आधार खोजेको छ।

राष्ट्रपति कार्यालयले गृह मन्त्रालयलाई आममाफी दिनुपर्ने अधार खोज्दै ३४ जनाकै व्यक्तिगत विवरण माग गरेको छ।

गम्भीर अपराधका दोषीलाई समेत उन्मुक्ति दिने गरी आममाफी दिने प्रचलन बढेको भन्दै प्रश्न उठ्न थालेपछि राष्ट्रपति कार्यालयले यसपटक सरकारले आममाफी दिन सिफारिस गरेका व्यक्तिहरुको व्यक्तिगत विवरण नै मगाएको हो।

विभिन्न अपराधमा अदालतबाट कैद र जरिवाना तोकिए पनि कारागारमा असल चालचलन देखाउनेहरुलाई कानुनबमोजिम विभिन्न राष्ट्रिय महत्त्वका दिनहरुमा सरकारको सिफारिसमा राष्ट्रपतिले आममाफी दिने व्यवस्था छ।

तर सरकारले कानुनको त्यस्तो व्यवस्थाको दुरुपयोग गर्दै कतिपय गम्भीर अपराधका दोषीहरुलाई समेत माफी मिनाहा गराउन सिफारिस गर्न थालेपछि राष्ट्रपति कार्यालयले त्यसबारे चासो राखेको हो।

यसपटक संविधान दिवसमा राष्ट्रपतिबाट आममाफी गराउन गृह मन्त्रालयले करिब ८ सय जनाको नाम तयार गरेको थियो। त्यसमध्ये ६७० जनाको कैद माफी गर्ने निर्णय मन्त्रिपरिषद्ले गरिसकेको छ भने राष्ट्रपतिबाट समेत स्वीकृत भइसकेको छ।

तर त्यसबाहेक गृहले पठाएका विभिन्न कसुरमा दोषी देखिएका थप ३४ जनाको विषयमा भने राष्ट्रपति कार्यालयले प्रश्न उठाएको हो।

स्रोतका अनुसार ती ३४ जनामध्ये कतिपय हाल पक्राउ समेत परेका छैनन् । गृह मन्त्रालयले विभिन्न राजनीतिक दल र संगठनहरुसँग गरेको सम्झौताका आधारमा समेत ती व्यक्तिहरुलाई माफी दिन सिफारिस गरेको खुलेको छ।

त्यसरी सिफारिस गरिएकामध्ये कर्तव्य ज्यान, तस्करी र सहकारी ठगीलगायतका मुद्दामा सजाय तोकिएका व्यक्ति छन्।

मुलुकी फौजदारी अपराध (संहिता) ऐन, २०७४, मुलुकी फौजदारी कार्यविधि (संहिता) ऐन २०७४ र फौजदारी कसुर (सजाय निर्धारण तथा कार्यान्वयन) ऐन २०७४ को दफा १५९ बमोजिम उनीहरुको माफी मिनाहाको प्रस्ताव गरिएको हो। संहिताको दफा १५९ मा सजाय माफी दिन सकिने व्यवस्था रहेको छ ।

चिकित्सक संघले ठप्प पार्‍यो ओपीडी सेवा

काठमाडौं, ३१ भदौ । डाक्टर माथि कुटपिट भएको भन्दै नेपाल चिकित्सक संघले बन्द गर्यो ओपीडी सेवा बन्द गरेको छ । संघले देशभरका स्वास्थ्य संस्थाहरूमा आकस्मिक बाहेकका सबै सेवा बन्द गर्दा बिरामीहरु उपचार पाउनबाट वञ्चित भएका छन् ।

गत बुधबार हेटौंडाको सन्चो अस्पतालमा कार्यरत डा। विकास थापा र डा.प्रशान्त विडारीमाथि बिरामीका आफन्तहरूबाट भएको कुटपिटको घटनाको बिरोधमा आन्दोलनमा उत्रिएका हुन ।

संघले उक्त घटनामा संलग्नहरूलाई पक्राउ गरी कारबाही गर्न माग सेवा ठप्प पारेका हुन् । संघले देशभरका स्वास्थ्य संस्थाहरूमा अनिवार्य रूपमा स्वास्थ्य संस्था सुरक्षाबलको व्यवस्था गर्न माग गरेको छ ।

टोखा–छहरे सुरुङमार्ग बनाउन चिनियाँ सरकार सकारात्मक 

काठमाडौं, ३० भदौ । अर्थमन्त्री डा.प्रकाशशरण महतले टोखा–छहरे सुरुङमार्ग निर्माणका लागि चिनियाँ सरकार सकारात्मक रहेको बताएका छन् ।  लिखु महिला उद्यमी तथा सामाजिक संस्थाले आयोजना गरेको तीज शुभकामना कार्यक्रममा उनले परियोजना निर्माणका लागि सरकारले चालु आर्थिक वर्षका लागि रू एक अर्ब छुट्याएको र थप रकम लगानीका लागि चीन सरकारसमक्ष प्रस्ताव पठाइएकामा सकारात्मक जवाफ आएको बताए । 
     
यो आयोजनाको प्रारम्भिक सम्भाव्यता अध्ययन भइसकेको जानकारी दिँदै अर्थमन्त्री डा.महतले अब विस्तृत परियोजना प्रतिवेदन (डिपिआर) अध्ययनपछि निर्माण प्रक्रिया अगाडि बढ्ने बताए । टोखा–छहरे सुरुङमार्ग निर्माणको काम भौतिक मन्त्रालयले, स्रोत जुटाउने काम अर्थ मन्त्रालय र वातावरणसम्बन्धी काम वन मन्त्रालयको हुने भएकाले सबै निकायबीच समन्वय आवश्यक रहेको बताए । त्यस्तै नुवाकोटको सडक सञ्जाल सदरमुकाम विदुरसम्म मात्र नभइ रसुवा नाकासम्म स्तरोन्नति हुने पनि अर्थमन्त्री डा. महतले बताए । 

भिजन गोर्खा सहकारीको साधारण सभा सम्पन्न, पुनः हरिकुमार श्रेष्ठको अध्यक्षतामा नयाँ कार्य समिति

न्यूज आजको संवाददाता
काठमाडौं, ३० भदौ । काठमाडौं गोंगबु ५ मा रहेको भिजन गोर्खा बचत तथा ऋण सहकारी संस्था लि.को १६ औं वार्षिक साधारण सभा शनिबार सम्पन्न भएको छ ।  सहकारीका अध्यक्ष हरिकुमार श्रेष्ठको अध्यक्षतामा भएको कार्यक्रममा टोखा नगरपालिकाका नगरप्रमुख प्रकाश अधिकारीको प्रमुख आतिथ्यता रहेको थियो । 

कार्यक्रममा प्रमुख अतिथि नगरप्रमुख अधिकारीले ज्ञान, महत्वकांक्ष र सहकारी चलाउने भिजन नै नभएका कारण पछिल्लो समय सहकारी संस्थाहरु धरासायी बन्दै गएको बताए । यस्तै उनले सहकारीहरुले धेरै निक्षेपकर्ताको बचत डुबाइ रहेको भन्दै समय सापेक्षा रुपमा सहकारी संस्थाहरु चलाउन जरुरी रहेको बताए । त्यसका लागि ज्ञानको आवश्यक रहेको प्रमुख अधिकारीको भनाइ थियो । 

सहकारीका व्यवस्थापन टिमले लेखा कसरी राख्ने, संञ्चित पुँजीलाई कसरी व्यवस्थापन गर्ने भन्ने कुरा बुझ्न आवश्यक रहेको उनले बताए । यदि यस बारेमा सिक्न आवश्यक लागेमा टोखा नगरपालिका यसबारे तालिमका लागि समन्वय गर्न तयार रहेको नगरप्रमुख अधिकारीले बताए । 

कार्यक्रममा सहकारीका अध्यक्ष हरिकुमार श्रेष्ठले छरिएर रहेको पुँजी र स्रोत साधनको सदुपयोग गरी आर्थिक, सामाजिक रुपान्तरण गर्न यस सहकारीले महत्वपूर्ण भूमिका खेल्दै आएको बताए । उनले सहकारीको वार्षिक साधारणसभामा सहभागी हुने प्रमुख अतिथि, विशेष अतिथि, सञ्चालक समितिका पदाधिकारी, सल्लाहकार, परिवेक्षक समितिका पदाधिकारी, विभिन्न उपसमिति, सेयर सदस्यहरुलाई धन्यवाद व्यक्त गरेका थिए । 

२०६४ सालमा स्थापना भएको सहकारीको हाल शेयर पुँजी १ करोड ३२ लाख ४७ हजार पाँच सय रुपैयाँ रहेको छ भने निक्षेप संकलन ३ करोड ६३ लाख ६४ हजार ७ सय १२ रुपैयाँ ४५ पैसा रहेको छ । यस्तै कर्जा लगानी ४ करोड ५३ लाख १२ हजार ९९ रुपैयाँ रहेको छ ।

यस्तै साधारण सभाले पुनःहरि कुमार श्रेष्ठकै अध्यक्ष रहनेगरी नयाँ कार्यसमिति सर्वसम्मत चयन गरेको छ । सहकारीको उपाध्यक्षमा राजेन्द्र पोखरेल, सचिवमा ईन्द्रराज बस्नेत, कोषाध्यक्षमा रुपेन्द्र बिक्रम भण्डारी सर्वसम्मत चयन भएका छन् ।  संस्थाको सदस्यहरुमा शान्ती श्रेष्ठ,  उत्तम अधिकारी, विनोद अधिकारी,  सुवास  शाक्य र  रामचन्द्र रिमाल सर्वसम्मत चयन भएका छन् । 

चिकित्सक कुटपिट गर्नेमाथि अनुसन्धान गर्न तीन दिन म्याद थप

काठमाडौं, २९ भदौ । हेटौंडा रहेको सञ्चो अस्पतालका चिकित्सकमाथि अस्पताल हाताभित्रै कुटपिटमा संलग्न रहेको आरोपमा पक्राउ परेका चार जनामाथि जिल्ला अदालतबाट अनुसन्धान गर्न आज तीन दिनको म्याद थप गरिएको छ। 

उनीहरूलाई जिल्ला प्रहरी कार्यालयको प्रहरी हिरासतमा राखी अनुसन्धान गरिने छ। जिल्ला प्रहरी कार्यालय मकवानपुरले सञ्चो अस्पतालका चिकित्सकद्वय डा विकास थापा र डा प्रशान्त विडारीलाई कुटपिट गरेको आरोपमा पक्राउ परेका रमा प्रधान, रमिता प्रधान, रोहित प्रधान र अनुप प्रधानमाथि अनुसन्धान गर्नका लागि सो अदालतबाट म्याद थप गरिएको जानकारी दिएको छ। 

कार्यालयका प्रहरी नायब उपरीक्षक एवं प्रवक्ता लक्ष्मी भण्डारीले पीडित चिकित्सकले दिएको जानकारी र सिसि क्यमेराका आधारमा पक्राउ परेकामाथि अनुसन्धान र कारवाही हुने बताइन्।
 

निमगले फेरि बढाएको पेट्रोलियम पदार्थको मूल्य

काठमाडौं, २९ भदौ । सरकारले पेट्रोलियम पदार्थको मूल्य फेरि बढाएको छ । नेपाल आयल निगमले शुक्रबार  पेट्रोलियम पदार्थको मूल्य वृद्धि गरेको हो ।
निगमका अनुसार पेट्रोलको मूल्य प्रतिलिटर १ रुपैयाँ र डिजेल र मट्टितेलको ३ रुपैयाँ मूल्यवृद्धि गरिएको छ। मूल्यवृद्धि भएसँगै पट्रोलको मूल्य प्रतिलिटर १८३ रुपैयाँ र डिजेल र मट्टितेलको मूल्य प्रतिलिटर १७३ रुपैयाँ पुगेको छ ।
भारतबाट प्राप्त नयाँ खरिद मूल्यअनुसार पेट्रोल र डिजेलको मूल्य वृद्धि गरिएको निगमले जनाएको छ । शनिबार बिहान १ बजेदेखि नयाँ मूल्य लागू हुने निगमले जारी गरेको विज्ञप्तिमा जनाइएको छ ।