13 Baishak, 2081 / 25 April , 2024
काठमाडौं, २८ भदौ । सिन्धुपाल्चोकको बाह्रविसे–७ घुम्थाङमा गएको पहिरोमा परि मृत्यु हुनेको संख्या नौ पुगेको छ । मृत्यु हुनेमा नागपुजेकी ७० वर्षीया भक्तिमाया श्रेष्ठ, २४ वर्षीया जुनुमाया विक, ४० वर्षीया सर्कीनी प्रधान, १०० वर्षकी ल्याक्सी शेर्पा, २४ वर्षका शुकलाल विक, ८ वर्षका सन्देश विक, ४२ वर्षकी ज्ञानीमाया प्रधान, ६० वर्षकी हिरामाया नेवार र धनलाल नेवार रहेका छन् ।
पहिरोमा थप २२ जना वेपत्ता भएका छन् । उनीहरुको उद्धारमा सुरक्षाकर्मी र स्थानीयहरु लागिरहेका छन्।
शनिबार राति आएको पहिरोले १२ वटा घर बगाएको छ । पहिरोले वडा नं ७ मा पर्ने घुन्थाङको भीरखर्कमा ३ वटा र नागपुजेमा ९ वटा घर पुरेको छ ।
पहिरो प्रभावितलाई भेट्न सभामुख अग्निप्रसाद सापकोटा घटनास्थल पुगेका छन् ।
