07 Baishak, 2081 / 19 April , 2024
काठमाडौँ, ११ मंसिर । ग्लोबल गोरखा समाज अन्तर्राष्ट्रिय समन्वय परिषदले गोरखाका सबै स्थानीय तहलाई स्वास्थ्य सामग्री सहयोग वितरण गरेको छ । जिल्ला स्थित ११ वटा स्थानीय तहहरु गोरखा र पालुङटार नगरपालिका तथा चुमनुब्री, धार्चे, आरुघाट, भीमसेन थापा, शहिद लखन, गण्डकी, सिरानचोक, बारपाक सुलिकोट र अजिरकोट गाउँपालिकालाई एक कार्यक्रमकाबीच स्वास्थ्य सामग्री सहयोग हस्तान्तरण गरिएको समाजका अध्यक्ष बिनय अधिकारीले जानकारी दिएका छन् । संस्थाका नेपाल प्रतिनिधि बिनोद पोखरेलले जिल्लाका सबै स्थानीय तहलाई मास्क र ज्वरो नाप्ने थर्मल गन हस्त्तान्तरण गरेको समाजका उपाध्यक्ष एवं स्वास्थ्य सामग्री सहयोग हस्तान्तरण कार्यक्रमका संयोजक गोकर्ण प्रसाद ढकालले बताए । समाजको हालै सम्पन्न अधिवेशन पछिको पहिलो बैठकले गोरखाका सबै तहमा स्वास्थ्य सामाग्री दिने निर्णय गरे लगत्तै स्थानिय तहलाई सो सामग्री सहयोग हस्तान्तरण गरिएको हो । समाजले ११ लाख ७६ हजार ८ सय रुपैयाँ बराबरको स्वास्थ्य सामग्री सहयोग गरेको समाजका कोषाध्यक्ष आकाश बन्जाराले जानकारी दिए ।
जिल्लाका सबै स्थानीय तहलाई १३/१३ हजार थान मास्क र ३०/३० थान थर्मल गन सहयोग गरिएको छ । त्यस्तै गरी समाजले जिल्ला स्वास्थ्य कार्यालय गोरखालाई १० हजार थान मास्क र १० थान थर्मल गन, जिल्ला प्रशासन कार्यालय गोरखालाई ७ हजार थान माक्स र १० थान थर्मल गन, जिल्ला समन्वय समिती गोरखालाई २ हजार थान माक्स र २ थान थर्मल गन तथा नेपाल पत्रकार महासंघ गोरखा शाखालाई २ हजार थान मास्क र १ थान थर्मल गन समेत हस्तान्तरण गरिएको थियो । सो कार्यक्रममा जिल्ला समन्वय समिति गोरखालाई ग्लोबल गोरखा समाजका नेपाल प्रतिनिधी बिनोद पोखरेलले सामग्रीहरु हस्तान्तरण गरेका थिए भने सबै स्थानीय तहलाई जिल्ला समन्वय समिति गोरखाका प्रमुख अशोक कुमार गुरुङले हस्तान्तरण गरेका थिए ।
कार्यक्रममा सबै स्थानीय तहका जनप्रतिनिधिहरुको उपस्थिति रहेको समाजका सचिव विराट बाबु खनालले जानकारी दिए । हस्तान्तरण कार्यक्रम हुनु अगाडि समाजले पत्रकार सम्मेलनको आयोजना गरि कोरोनाले नेपालमा परेको असर र समाजको तर्फबाट गर्न सक्ने योगदानको बारेमा छलफल भएको समाजका प्रबक्ता यादव देवकोटाले जानकारी दिए । समाजले यस अगाडी पनि गोरखाको विभिन्न स्थानमा सहयोगहरु गर्दै आएको ग्लोबल गोरखा समाज अन्तर्राष्ट्रिय समन्वय परिषदका अध्यक्ष बिनय अधिकारीले जानकारी दिए । समाज गोरखामा जन्मिएर बिश्वभर छरिएर रहेका नेपालीहरु संगठित संस्था हो ।
![चिकित्सा सेवा आयोगको प्रतिवेदन ६ वर्षपछि सार्वजनिक [प्रतिवेदनसहित]](/public/images/1712760945-282848.jpg "चिकित्सा सेवा आयोगको प्रतिवेदन ६ वर्षपछि सार्वजनिक [प्रतिवेदनसहित]")
