13 Baishak, 2081 / 25 April , 2024
काठमाडौं, १३ मंसिर । नेपाली कांग्रेसले ट्रान्सपरेन्सी इन्टरनेशनलको प्रतिवेदनमा भ्रष्टाचारीको संरक्षण स्वयं प्रधानमन्त्रीले गरिरहेको किटानी हुनु देशकै लागि लज्जास्पद विषय भएको बताएको छ ।
कांग्रेस प्रवक्ता विश्वप्रकाश शर्माले एक विज्ञप्ति जारी गर्दै यसबाट अन्तर्राष्ट्रिय जगतमा नेपालको छविमा असर पुगेको भिन्दै सत्तारुढ पार्टीले संस्थागत धारणा सार्वजनिक गर्नुपर्ने बताएका छन् । विज्ञप्तिमा प्रधानमन्त्री तथा नेकपाका अध्यक्ष केपी शर्मा ओलीलाई ट्रान्सपरेन्सी इन्टरनेशनलको नेपालको भ्रष्टाचारसम्बन्धी प्रतिवेदन पढ्न आग्रह समेत गरिएको छ ।
कांग्रेसले वर्तमान सरकार बनेपछि देशमा भ्रष्टाचार व्यापक बढेको र प्रधानमन्त्री स्वयंले संरक्षण गरेको भनेर नेपाली कांग्रेसले व्यक्त गरिआएको समिक्षालाई ट्रान्सपरेन्सी इन्टरनेशनलको ताजा प्रतिवेदनले पुष्टि गरेको उल्लेख छ । एकातर्फ भ्रष्टाचारीको अनुहारसम्म हेर्दिन भनेर अभिव्यक्ति दिने अर्कातर्फ भ्रष्टाचारको अनेक प्रकरण ढाकछोप गर्न ओहोदाकै मर्यादासम्म प्रधानमन्त्रीले बिर्सिदिने गरेका कारण भ्रष्टचार झाँगिएको काँग्रेसको ठहर छ ।
अरु क्षेत्रको शक्ति प्रधानमन्त्री कार्यालयमा केन्द्रित गरेर अति शक्तिले अति भ्रष्ट बनाउंछ भन्ने मान्यतालाई पुष्टि गर्न तर्फ लाग्ने अनि भ्रष्टाचार विरुद्ध उठेका आवाजलाई पूर्वाग्रहपूर्ण देख्ने यस्तो प्रवृत्तिले दशेमा झनै बेथिति र भ्रष्टाचार बढाउने भन्दै काँग्रेसले वाइड बडि, बालुवाटार, यतीदेखि सेक्युरिटी प्रीन्टिङ प्रेस हुँदै स्वास्थ सामग्री खरिद सम्ममा भएको भ्रष्टाचार प्रकरण उपर निष्पक्ष छानबिन र कडा कार्वाहीको माग गरेको छ ।
प्रतिपक्ष, आम संचार माध्यम देखि ट्रान्सपरेन्सी इन्टरनेशनलसँगै पछिल्लो एकबर्षमा भ्रष्टाचार व्यापक वृद्धि भएको बुंदागत तथ्य स्वयं नेकपाभित्रै समेत लिखित रुपमै प्रस्तुत भइ सकेको स्थितिमा भ्रष्टाचारका विरुद्ध अझ प्रखर आवाज उठ्न, उठाउन र तीब्र दबाब सृजना गर्न जरुरी रहेको कांग्रेसको भनाइ छ ।
