इन्डोनेसिया भ्रमणमा स्टिकर भिसा अनिवार्य

काठमाडौं, १३ मंसिर । नेपाल हेर्ने इन्डोनेसियाको ढाकास्थित दूतावासले नेपालबाट इन्डोनेसिया प्रवेश गर्दा स्टिकर भिसा अनिवार्य गरेको छ। इन्डोनेसिया तथा नेपालका विभिन्न एजेन्सी मार्फत ई–भिसा प्रोसेस गर्दा चुनौती देखिएको भन्दै नयाँ व्यवस्था गरिएको दूतावासले बताएको छ।

दूतावासले एक सर्कुलर जारी गर्दै भिसा सम्बन्धी सम्पूर्ण कार्य इन्डोनेसियाको काठमाडौँस्थित अवैतनिक वाणिज्य दूतको कार्यालय मार्फत गर्न सुझाव दिएको छ। ई–भिसा आवेदन प्रक्रियामा आएका त्रुटिहरूको मुल्याकन गर्दै दूतावासले अब उपरान्त नेपालबाट इन्डोनेसिया प्रस्थान गर्दा ई–भिसाको लागि आवेदन नगर्न समेत आग्रह गरेको छ।

नेपालका लागि इन्डोनेसियाका अवैतनिक वाणिज्य दूत चन्द्रप्रसाद ढकालले नेपालबाट इन्डोनेसिया जाँदा भिसा अन एराईभलका लागि पहल भई राखेको जनाउँदै नेपाली नागरिकहरूको सहजताका लागि दूतावास तथा इन्डोनेसियाली सरकारले विद्यमान प्रक्रियालाई थप सहजीकरण गर्न नयाँ व्यवस्था लागू भएको जानकारी गराए। 

रुसी–युक्रेन युद्धः रुसी सेनामा भर्ती भएका ३ नेपालीको मृत्यु

काठमाडौं, १३ मंसिर । रुसी सेनामा भर्ती भएका तीन जना नेपालीको मृत्यु भएको छ। युक्रेससँगको युद्धका क्रममा उनीहरूको निधन भएको मस्कोस्थित नेपाली राजदूतावासले जनाएको छ। 
नेपाली दूतावासले परराष्ट्र मन्त्रालयलाई पठाएको पत्रअनुसार युद्धमा स्याङ्जाका प्रितम कार्की, दोलखाका राजकुमार रोक्का र इलामका गंगाराज मोक्तानको मृत्यु भएको हो। दूतावासका अनुसार यही नोभेम्बर १५ (कात्तिक २९) उनीहरूको मृत्यु भएको हो। 

वैदेशिक रोजगारः अमेरिका पठाइन्छु भन्दै १५ लाख ठगी गर्ने दुई जना पक्राउ

काठमाडौं, १२ मंसिर । अमेरिका पठाइन्छु भन्दै १५ लाख ठगी गर्ने दुई जना पक्राउ परेका छन्। काठमाडौं उपत्यका अपराध अनुसन्धान कार्यालयको टोलीले विशाल श्रेष्ठ र शान्ति श्रेष्ठलाई पक्राउ गरेको हो। 

विशाल र शान्तिले रोजगारीका लागि अमेरिका पठाइदिन्छु भन्दै चन्द्रबहादुर रावलसँग १५ लाख ठगी गरेका थिए। उनीहरूले मासिक ३ लाख तलब हुने भन्दै प्रतिव्यक्ति ४० लाग माग गरेका थिए। श्रेष्ठद्वय पैसा ठगेर सम्पर्कविही बनेकाथिए। उनीहरुलाई थप अनुस्नधा गर्ने काम भएरहेको प्रहरी उपरीक्षक रविन्द्र रेग्मीले बताए। 
 

सीप बिल्डिङतर्फको कोरियन भाषा परीक्षामा ४ हजार बढी पास

काठमाडौं, ११ मंसिर । सीपबिल्डिङ क्षेत्र तर्फको कोरियन भाषा परीक्षामा ४ हजार ९८ जना पास भएका छन् । ईपीएस कोरिया शाखाले सार्वजनिक गरेको सूचनाअनुसार परीक्षा दिएकामध्ये ४ हजार ९८ जना नेपाली परीक्षामा पास भएका हुन् । जसमा ३ हजार ९०१ जना पुरुष छन् भने १९७ जना महिला छन् ।

परीक्षाका लागि ३५ हजार ४७८ जनाले आवेदन दिएका थिए । त्यसमध्ये ३२ हजार ५०७ जनाले मात्रै परीक्षा दिएका दिएका थिए। शाखाअनुसार पहिलो चरणको कोरियन भाषा परीक्षाको उत्तीर्ण भएका परीक्षर्थीहरुको दोस्रो चरणको स्किल टेस्ट र कम्पीटेन्सी टेस्टको परीक्षा हुनेछ ।

वैदेशिक रोजगारीः बेलायत जान ७१ जना नर्स छनोट

काठमाडौं, १० मंसिर । वैदेशिक रोजगार विभागले रोजगारीका लागि बेलायत जान आवेदन दिएका मध्ये ७१ जना नर्सको नाम छनोट गरेको छ । विभागले रोजगारीका लागि बेलायत जान आवेदन दिएका ७ सय ७१ जनाको लिष्टबाट ७१ जना छनोट गरेको हो । आवेदनका लागि आवश्यक कागजपत्र पूरा गरेकाहरुको नाम छनोट गरिएको विभागले जनाएको छ ।
नर्सको योग्यता र अनुभवका आधारमा सूची तयार पारिएको हो । आवेदन दिँदा कम्तिमा ३ वर्षको नर्सिङ कोर्स पीसीएल नर्सिङ वा बीएन सरहको शैक्षिक योग्यता हासिल गरेको हुनुपर्ने प्रावधान राखिएको थियो ।

योसँगै कम्तिमा दुई वर्षको कार्यानुभव र अंग्रेजी भाषामा दख्खल भएको हुनुपर्ने भनिएको थियो । गत जुलाईमा दुई देशबीच १ सय जना नेपाली नर्स बेलायत लैजाने सहमति भएको थियो ।
 

वैदेशिक रोजगारः साढे ४ लाख श्रमिक सामाजिक सुरक्षा कोषमा आवद्ध

काठमाडौं, ८ मंसिर । वैदेशिक रोजगारीमा गएका साढे चार लाखभन्दा बढी श्रमिक योगदानमा आधारित सामाजिक सुरक्षा योजनामा आबद्ध भएका छन् । आठ महिनाअघि सरकारले वैदेशिक रोजगारीमा रहेका श्रमिकलाई योगदानमा आधारित सामाजिक सुरक्षा योजनामा आबद्धता गराउने योजना कार्यान्वयनमा ल्याएपछि सो सङ्ख्यामा श्रमिक आबद्ध भएका हुन्। यो सङ्ख्या चैत ८ देखि मङ्सिर ५ सम्मको हो।

कोषका अनुसार यसरी कोषको योजनामा आबद्ध भएर वैदेशिक रोजगारीमा जाने श्रमिकबाट हालसम्म करिब ९१ करोड ३२ लाख योगदान रकम कोषमा जम्मा भएको छ। कोषका प्रवक्ता विवेक पन्थीले वैदेशिक रोजगारीमा जाने तयारीमा रहेका, विदेशमा रोजगार र स्वरोजगार रहेका श्रमिकको उक्त योजनामा उत्साहजनक सहभागिता भएको बताए ।

कोषका अनुसार योजनामा हालसम्म नौ लाख १७ हजार २२८ जना आबद्ध भएका छन्। कोषको योजनामा आबद्ध भएकामध्ये अधिकांश वैदेशिक रोजगारीमा जान श्रम स्वीकृति लिन आवेदन दिएका श्रमिक छन्। 

वैदेशिक रोजगार सन्तति छात्रवृत्तिका लागि आवेदन आह्वान

काठमाडौं, ५ मंसिर । वैदेशिक रोजगार बोर्डको सचिवालयले वैदेशिक रोजगार सन्तति छात्रवृत्तिका लागि आवेदन आह्वान गरेको छ । श्रम स्वीकृति लिई वैदेशिक रोजगारमा गई करार अवधिभित्र मृत्यु भएका वा पूर्णरुपमा असक्त वा गम्भीर बिरामी भएका कामदारको छोराछोरीका लागि छात्रवृत्ति प्रदान गर्न बोर्डले आवेदन आह्वान गरेको हो । वैदेशिक रोजगार छात्रवृत्ति सञ्चालन कार्यविधि २०८० को अनुसूची १ बमोजिम पुस ८ गतेभित्र निवेदन दिन आह्वान गरिएको हो ।
सामुदायिक तथा संस्थागत विद्यालयमा अध्ययनरत विद्यालयस्तर (पूर्व प्राथमिक कक्षा वा नर्सरी वा सो सरहदेखि कक्षा १२ सम्म) का १८ वर्ष मुनीका बालबालिकाहरुले निवेदन दिन पाउने बोर्ड सचिवालयले जनाएको छ ।
श्रम स्वीकृति लिई वैदेशिक रोजगारमा गई मृत्यु वा अंगभंग वा बिरामी भई वैदेशिक रोजगार बोर्डबाट शत प्रतिशत आर्थिक सहायता लिएका कामदारका छोराछोरीले निवेदन दिन पाउनेछन् ।
वार्षिक रुपमा आधारभूत तहका लागि १२ हजार र माध्यमिक तहका लागि १६ हजार रुपैयाँ छात्रवृत्ति पाइनेछ । एक जना विद्यार्थीलाई एउटा कक्षामा १ पटकका लागि मात्रै वार्षिक रुपमा एकमुष्ट छात्रवृत्ति उपलब्ध गराइने बोर्डले जनाएको छ । 
 

श्रमिकको क्षमता बढाउन नेपाल र कोरियाबीच समझदारी

काठमाडौं, २५ कात्तिक । नेपाल र कोरियाबीच नेपाली श्रमिकको दक्षता बढाउने सम्बन्धमा सम्झौता भएको छ। यस सम्बन्धमा नेपालको व्यावसायिक तथा सीप विकास तालिम प्रतिष्ठान र दक्षिण कोरियाको ग्लोबल इन्स्टिच्युट फर ट्रान्सफरिङ स्किल्स (गिफ्टस) बीच सम्झौता पत्रमा हस्ताक्षर भएको हो।

दक्षिण कोरियाको एचआरडीअन्तर्गत रहेको गिफ्ट्सका कार्यकारी निर्देशक बियोङ वुक ली र प्रतिष्ठानका कार्यकारी निर्देशक उमाकान्त आचार्यले हस्ताक्षर गरेका हुन्। तालिम प्रतिष्ठानले विभिन्न प्रकारका सीपमूलक तालिम प्रदान गर्दै आएका १५ वटा तालिम केन्द्रलाई प्रदेश तहमै सम्झौता गरेको छ।

सम्झौता अनुसार आगामी दिनमा कोरिया जाने नेपाली युवालाई तालिमको सीप परीक्षण, प्रमाणीकरण र स्तरीकरण गरिने छ। कोरियामा काम गर्ने नेपाली श्रमिकहरूलाई कोरियाका रोजगारदाताले एकदमै मनपराउने गरेको गिफ्ट्सका कार्यकारी निर्देशक लीले बताए।

इपिएस कोरिया शाखाका निर्देशक गुरूदत्त सुवेदीले थप कार्ययोजना बनाएर अघि बढ्ने बताए। प्रतिष्ठानबाट अब दिइने तालिम कोरिया जाने नेपालीहरूका लागि मात्र नभएर स्वदेशमै रोजगर हुन पनि सघाउने बताए।

प्रतिष्ठानले कोरियाको श्रम बजारसँगै नेपालको श्रम बजार तथा अन्य गन्तव्य मुलुकलाई आवश्यक पर्ने खालको श्रम शक्ति उत्पादन गर्ने दाबी पनि गरेको छ। प्रतिष्ठानका कार्यकारी निर्देशक उमाकान्त आचार्यले यस्तो खालको तालिम प्रदान गरेपछि कोरियामा जाने कामदारलाई समेत थप सहज हुने बताए।

पोर्चुगलमा दूतावास खोल्ने सरकारको निर्णय, सनिल नेपाल राजदूत सिफारिस

काठमाडौं, २३ कात्तिक । सरकारले पोर्चुगलमा नेपाली राजदूतावास कार्यालय स्थापना गर्ने निर्णय गरेको छ । मन्त्रिपरिषद्को बैठकले पोर्चुगलमा रहेका नेपालीहरूको मागअनुसार राजदूतावास कार्यालय स्थापना गर्ने निर्णय गरेको सञ्चारमन्त्री मन्त्री रेखा शर्माले बताइन् । 

सरकारले सनिल नेपाललाई पोर्चुगलको राजदूतमा नियुक्तिको सिफारिस गर्ने समेत निर्णय गरेको छ । पोर्चुगलमा नेपालीको संख्या बढ्दै गएको र दूतावास स्थापनाको माग हुन थालेपछि सरकारले दूतावास स्थापना गर्ने र राजदूत पठाउने निर्णय गरेको हो ।

वैदेशिक रोजगारीः पोल्याण्ड पठाउने भनी ३८ लाख ठगी गर्ने पक्राउ

काठमाडौं, २१ कात्तिक । पोल्याण्डमा वैदेशिक रोजगारीमा पठाउने भनी ३८ लाख रुपैयाँ ठगी गर्ने ३९ वर्षीय सुनिता कर्माचार्यलाई प्रहरीले पक्राउ गरेको छ । 

काठमाडौं उपत्यका अपराध अनुसन्धान कार्यालयका प्रवक्ता रविन्द्र रेग्मीका अनुसार स्थायी घर भक्तपुर नगरपालिका वडा नं. १० भइ हाल काठमाडौंको नागार्जुन नगरपालिका – ६ रामकोट बस्ने कर्माचार्यले मदनराज मोक्तनसहित १७ जनालाई पोल्याण्ड जान प्रतिव्यक्ति आठ लाख रुपियाँ लाग्ने र पोल्याण्ड पुगेपछि प्रतिष्ठित कम्पनीमा मासिक एक लाख ५० रुपियाँ तलव हुन्छ भनी प्रलोभनमा पारेकी थिइन ।

उनले पटक–पटक गरी सो रकम पीडितबाट उठाइ सम्पर्कविहिन रहेको अवस्थामा वैदेशिक रोजगार विभागले पक्राउ गरी उपस्थित गराउन प्रहरीलाई पत्राचार गरेको थियो । 

प्रहरीले उनलाई काठमाडौंको इन्द्रचोकबाट मंगलबार दिउँसो १ बजे पक्रउ गरी थप अनुसन्धान तथा कारवाहीका लागि वैदेशिक रोजगार विभाग पठाएको छ ।