16 Chaitra, 2080 / 29 March , 2024

Logo
Newsajako
Social Icon
Social Icon
Secondary Top

बैदेशिक रोजगार


रुसमा श्रम स्वीकृति खुला गर्ने निर्णय

रुसमा श्रम स्वीकृति खुला गर्ने निर्णय


काठमाडौं, १५ चैत ।  सरकारले रुसमा श्रम स्वीकृति खुला गर्ने निर्णय गरेको छ । श्रम, रोजगार तथा सामाजिक सुरक्षा मन्त्रालयका तत्कालीन सचिव केवलप्रसाद भण्डारीले रुसमा श्रम स्वीकृति दिने निर्णय गरेका थिए । राजीनामा दिनु केही दिनअगाडि गरेको उक्त निर्णय आजसम्म गोप्य नै राखिएको थियो । तर, बुधबार एकाएक निर्णय सार्वजनिक गरियो ।
वैदेशिक रोजगार विभागले श्रम स्वीकृति र पुनः श्रम स्वीकृति दिने निर्णय सार्वजनिक गरिरहँदा श्रममन्त्री डोलप्रसाद अर्यालले भने रुसमा व्यक्तिगत श्रम स्वीकृति खुला नगरिरहेको भन्दै भाषण गरिरहेका थिए । त्यहीबेला विभागले फागुन ९ र १६ गते श्रम सचिवले निर्णय गरेको भन्दै विज्ञप्ति सार्वजनिक गरेको थियो ।
रुस र युक्रेनबिचको युद्धका कारण २०८० पुस १९ गतेदेखि श्रम स्वीकृति दिने कार्य रोकेको थियो । रुस–युक्रेन युद्धमा नेपाली नागरिकहरूको मृत्यु भएको कारण देखाई परराष्ट्र मन्त्रालयले रुसमा भ्रमण गर्दा कन्सुलर सेवा विभागबाट अनुमति लिनुपर्ने व्यवस्था गरेको थियो । रुसमा काम गर्न जाने कामदारहरूको श्रम स्वीकृति समेत रोकिएको थियो । तर, श्रम सचिव भण्डारीले २०८० फागुन ९ गतेको पुनः श्रम स्वीकृति सुचारू गर्ने निर्णय गरेका थिए ।
उनले रुसमा विभिन्न पेशा व्यवसाय गरी नेपालमा बिदामा आएका कामदारहरूको मागलाई सम्बोधन गर्ने भन्दै पुनः श्रम स्वीकृति सुचारु गर्ने निर्णय गरेका थिए । त्यस्तै संस्थागत माध्यमबाट (मेनपावर व्यवसायीबाट) रसियाको   Blagoveshchensk Cityस्थित Sinopec Engineering Russia Group LLC कम्पनीमा कामदार पठाउन श्रम स्वीकृति दिने निर्णय समेत गरेका थिए ।

२०८० फागुन १६ गते उक्त कम्पनीका लागि संस्थागत श्रम स्वीकृति दिने निर्णय सचिव भण्डारीले गरेका थिए । सचिव भण्डारीले गरेको उक्त निर्णयबारे मन्त्री अर्यालले भने आफू त्यसबारे अनविज्ञ रहेको बताएका छन् । अर्याल फागुन २३ गते श्रम मन्त्री बनेका थिए । यसअघिका श्रममन्त्री शरतसिंह भण्डारीको पालामा सचिवले गरेको उक्त निर्णय विभागले अहिले सार्वजनिक गरेको हो । 


रूस जान श्रम स्वीकृतिको व्यवस्था गरिएको छैनः श्रममन्त्री 

रूस जान श्रम स्वीकृतिको व्यवस्था गरिएको छैनः श्रममन्त्री 


काठमाडौं, १४ चैत । श्रम, रोजगार तथा सामाजिक सुरक्षामन्त्री डोलप्रसाद अर्यालले हाल कुनै पनि व्यक्ति रुस जान श्रम स्वीकृतिको व्यवस्था नरहेको स्पष्ट पारेका छन् । राष्ट्रिय स्वतन्त्र पार्टी (रास्वपा)ले आज यहाँ आयोजना गरेको काठमाडौँको आँखामा कर्णाली विषय कार्यक्रम उनले हाल रुस जान व्यक्तिगत श्रम स्वीकृतको व्यवस्था बन्द नै रहेको र खुला नगरिएको स्पष्ट पारेका हुन् । 

मन्त्री अर्यालले वैदेशिक रोजगार व्यवसायीले रुसमा युद्धग्रस्त क्षेत्र होइन भन्ने स्पष्ट पारेको र जोखिम छैन भन्ने मागलाई स्वीकृत दिने अघिल्लो मन्त्रीको पालामा भएको निर्णयका सन्दर्भमा आफूहरु पुनःमूल्यांकनका लागि अध्ययनका क्रममा रहेको जानकारी गराए । सरकार अविछिन्न उत्तराधिकारी हुने र निरन्तर चलिरहने विषयका सन्दर्भमा भने आफू सजग रहेको उनको भनाइ थियो ।

मन्त्री अर्यालले श्रम स्वीकृति लिएर गएका नेपाली नागरिकको उद्धारका हकमा आफ्नो मन्त्रालयले जिम्मेवार हुने र श्रम स्वीकृति नलिई गएका नागरिकको हकमा परराष्ट्र मन्त्रालयले समन्वय गर्नुपर्ने बताए । कार्यक्रममा रास्वपाका उपसभापति एवं सांसद डा स्वर्णिम वाग्लेले राजनीतिक सङ्गठन निर्माणसँगै मुलुकको समृद्धिका लागिसमेत पार्टीले ध्यान दिने बताए । उनले २०८४ सालमा पार्टी सभापति रवि लामिछानेको नेतृत्वमा रास्वापा निर्वाचनमा होमिनेमा स्पष्ट रहेको उल्लेख गरे । 


यूएईमा श्रमिक अलपत्र पार्ने म्यानपावर कम्पनीलाई कारबाही गर्न सिफारिस

यूएईमा श्रमिक अलपत्र पार्ने म्यानपावर कम्पनीलाई कारबाही गर्न सिफारिस


काठमाडौं, १४ चैत । युएईस्थित नेपाली दूतावासले वैदेशिक रोजगारमा पठाएर अलपत्र पार्ने म्यानपावर कम्पनीलाई कारबाही गर्न वैदेशिक रोजगार विभागलाई सिफारिस गरेको छ । युएई पठाएर अलपत्र पार्ने काठमाडौँस्थित मेची इन्टरनेसनल ओभरसिज प्रालिलाई कारबाही गर्न सिफारिस गरेको हो ।

यूएईमा १९ जना युवा अलपत्र परेको सूचना सार्वजनिक भएपछि सम्बन्धित म्यानपावरले समस्या समाधान गर्ने प्रतिबद्धता जनाएको थियो । युएईस्थित दूतावासका श्रम सहचारी आविद अन्सारीले म्यानपावरलाई कारबाही गर्न विभागलाई पत्राचार गरेका हुन् । ‘नेपाली श्रमिकहरू जस्ताको त्यस्तै रहेको तथा समस्या समाधानका लागि कुनै पहल नगरको देखिएकाले म्यानपावर तथा कम्पनीलाई आवश्यक कारबाही हुन आदेशअनुसार अनुरोध छ,’ पत्रमा उल्लेख छ ।


अलपत्र परेका १९ मध्ये खोटाङका दुई युवा छन् । उनीहरूको उद्धारको माग गर्दै आफन्तले जिल्ला प्रशासन कार्यालयमा निवेदन दिएका थिए । जन्तेढुङ्गा गाउापालिका-५ चिसापानीका परशुराम राई र राजकुमार राईको उद्धारका लागि जिल्ला प्रशासन कार्यालयमा निवेदन दिएका हुन् ।
 


नेपाली श्रमिकको संख्या बढाउँदै लैजान्छौँः कोरियाली राजदूत

नेपाली श्रमिकको संख्या बढाउँदै लैजान्छौँः कोरियाली राजदूत


काठमाडौं, १३ चैत । उपप्रधान एवम् गृहमन्त्री रवि लामिछानेसँग नेपालका लागि दक्षिण कोरिया राजदूत पार्क ताइयोङले मंगलबार सिंहदरबारमा भेटवार्ता गरेका छन्।  उक्त भेटका क्रममा नेपाल र दक्षिण कोरियाको दौत्य सम्बन्धको ५०औं वर्षगाँठको उपलक्ष्यमा शुभकामना अदान–प्रदान गरिएको छ।

भेटमा राजदूत ताइयोङले गृहमन्त्री लामिछानेलाई बधाई र सफल कार्यकालको शुभकामना पनि दिएको उनको सचिवालयले जनाएको छ। राजदूत ताइयोङले रोजगारी अनुमति प्रणालीमार्फत दक्षिण कोरियामा नेपाली कामदारको संख्या बढाउँदै लैजाने बचन पनि गृहमन्त्रीलाई दिएका छन्। 

उनले दक्षिण कोरियामा कार्यरत कामदारलाई सीपसहित स्वरोजगारतर्फ अभिप्रेरित गर्ने र साना उद्यमको विकासमार्फत नेपाल फर्किएकालाई रोजगारी सिर्जनामा केन्द्रित गराउने प्रयास भइरहेको जानकारी दिए।


नेपालमा कोरियाबाट प्रत्यक्ष वैदेशिक लगानी र सहायतामा भित्र्याउन पनि जोड दिइएको राजदूतले बताएका छन्। दक्षिण कोरियामा काम गर्ने श्रमिक र श्रमिकको परिवारको तर्फबाट समानजनक काम गर्न अवसर दिएकोमा गृहमन्त्रीले राजदूतलाई धन्यवाद दिए। 

उनले कृषि, उद्योग, पर्यटन, सीप विकास, प्रविधि हस्तान्तरणजस्ता क्षेत्रमा दक्षिण कोरियाको ठूलो सहयोग र सहकार्य रहने अपेक्षा राखेका छन्। 

दक्षिण कोरियामा लागु भ्रष्टाचारविरुद्ध शून्य सहनशीलताको नीति अनुकरणीय रहेकाले विश्वले नै अनुशरण गर्न सकिने मन्त्री लामिछानेले बताए। उनले सुशासन र भ्रष्टाचार अन्त्य नै आफ्नो पार्टीको उद्देश्य रहेको बताए।
 


वैदेशिक रोजगारीः करिब २८ सयले लिए एक वर्षमा टेलिमेडिसिन सेवा 

वैदेशिक रोजगारीः करिब २८ सयले लिए एक वर्षमा टेलिमेडिसिन सेवा 


काठमाडौं, १३ चैत । वैदेशिक रोजगार बोर्डले सञ्चालनमा ल्याएको टेलिमेडिसिन सेवाबाट एक वर्षमा झन्डै २८ सय श्रमिक लाभान्वित भएका छन् । बोर्डले ०७९ चैत १५ गतेदेखि यो सेवा सुरु गरेको थियो । ०८० फागुन अन्तिमसम्म दुई हजार ७८४ जनाले सेवा लिएका बोर्डले जनाएको छ ।

बोर्डले सार्वजनिक गरेको तथ्यांकानुसार, १८ देशमा रोजगारीका निम्ति पुगेका मध्ये सबैभन्दा धेरै मलेसियामा रहेका नेपालीले सेवा लिएका छन् । मलेसियामा रहेका ६६९ जनाले एक वर्षमा यो सेवा लिएका हुन् ।

यस्तै, टेलिमेडिसिन सेवा धेरै लिनेमा साउदी अरब, कतार, कुवेत, यूएईलगायत मुलुकमा रहेका नेपाली छन् ।

बोर्डले वीर अस्पतालको सहकार्यमा ती मुलुकमा फोन र भिडियोमार्फत परामर्श, औषधि र उपचार सेवा दिँदै आएको छ । एक वर्षमा सबैभन्दा धेरै ७१२ पटक मेडिसिन सेवा दिइएको छ ।
शल्यक्रिया, हड्डीसँग सम्बन्धित समस्या, नाक, कान, घाँटी, मानसिक समस्यालगायत सेवा दिइएको बोर्डले जनाएको छ । बोर्डले टेलिमेडिसिन सेवाका निम्ति मोबाइल नम्बर ९८५१३४५७०१ र ९८५१३४५७०२ मा रहेको भाइबर, हवाट्सएपलगायत सामाजिक सञ्जालको व्यवस्था गरेको छ ।


साउदी श्रम कानून संशोधन हुँदै

साउदी श्रम कानून संशोधन हुँदै


काठमाडौं, १२ चैत । साउदी अरबमा कानून संशोधन हुँदैछ। साउदी अरबको मानव संसाधन तथा सामाजिक विकास मन्त्रालयले काम नदिई कामदार राख्ने कम्पनी र रोजगारदातालाई कडा कारबाही गर्ने उद्देश्यले श्रम कानून संशोधन गर्ने योजना अघि बढाएको छ।

मन्त्रालयले कामदारलाई काम नदिने कम्पनीहरू र रोजगारदातालाई दुई लाख रियालदेखि १० लाख रियाल (नेपाली ७० लाखदेखि तीन करोड ५० लाख रुपैयाँ)सम्मको जरिवाना गर्ने गरी संशोधनको प्रस्तावको मस्यौदा तयार पारेको छ। नयाँ कानुन पारित भएपछि साउदी अरबको श्रम बजारमा श्रमसँग जोडिएर भइरहेको गैरकानुनी गतिविधिलाई नियन्त्रण गर्ने मन्त्रालयले जनाएको छ ।

मन्त्रालयले सार्वजनिक गरेको प्रस्तावित कानूनमा जनता, सरकारी निकाय र निजी क्षेत्रको रायसमेत माग गरेको छ। मन्त्रालयले जनता, सरकारी निकाय र निजी क्षेत्रको रायको सर्वेक्षण गर्न राष्ट्रिय प्रतिस्पर्धा केन्द्रसँग आबद्ध एकीकृत विद्युतीय सार्वजनिक परामर्श मञ्च (इस्टिटला)मार्फत संशोधनमा आफ्ना राय दिन सरोकारवाला अह्वान गरेको छ । श्रम कानुन संशोधन गर्ने सर्वेक्षणमा राय–सुझाव दिन आगामी २० अप्रिलसम्मको समय तोकिएको छ ।


थाइल्याण्डमा अलपत्र १३ नेपालीको उद्धार

थाइल्याण्डमा अलपत्र १३ नेपालीको उद्धार


काठमाडौं, ९ चैत । थाइल्याण्डमा अलपत्र परेका १३ नेपालीको उद्धार गरिएको छ । थाइल्याण्डमा अलपत्र परेका १३ नेपालीको उद्धार गरी आज शुक्रबार नेपाल ल्याइएको हो । 
थाइल्याण्डस्थित नेपाली राजदूतावास बैंककले एक विज्ञप्ति जारी गर्दै थाइल्याण्ड र म्यान्मार सीमा नजिक म्यान्मारको म्यावड्डीमा विगत लामो समयदेखि समस्यामा परेका १३ नेपाली नागरिकहरूलाई थाई परराष्ट्र मन्त्रालय, थाई इमिग्रेसन ब्यूरो र नेपाली राजदूतावासको समन्वयमा उद्धार गरेको जनाएको छ । 

विज्ञप्तिमा भनिएको छ,'उल्लेखित १३ नेपाली नागरिकहरूलाई मिति २०८०।१२।९ का दिन राजदूतावासले थाइल्याण्डको मेइसोटसम्म कर्मचारी खटाई थाई म्यान्मार सीमा पार गराई थाइल्याण्डको मेइसोटतर्फ ल्याई त्यहाँबाट हवाई यात्रा मार्फत बैङ्कक हुँदै आजै नेपाल एयरलाइन्सको उडान नं RA 402 बाट काठमाडौँ पठाइएको छ ।'


श्रममन्त्री अर्यालद्वारा वैदेशिक रोजगार कार्यालय ताहचलको अनुगमन

श्रममन्त्री अर्यालद्वारा वैदेशिक रोजगार कार्यालय ताहचलको अनुगमन


काठमाडौं, ९ चैत । श्रम, रोजगार तथा सामाजिक सुरक्षामन्त्री डोलप्रसाद अर्यालले वैदेशिक रोजगार कार्यालय ताहाचलको अनुगमन गरेका छन्। बिहीबार साँझ मन्त्री अर्यालले ताहाचल पुगी कार्यालयको अनुगमन गरेका हुन्। 

अनुगमनको क्रममा मन्त्री अर्यालले श्रम स्वीकृतिको प्रक्रियाका बिषयमा कर्मचारीसँग जानकारी लिएका थिए। त्यस्तै, श्रम स्वीकृति प्रदान गर्ने प्रक्रियाका समस्याको बिषयमा पनि कर्मचारीसँग सोधपुछ गरेका थिए। 

श्रममन्त्री अर्यालले श्रम स्वीकृति प्रक्रियालाई सहज र सरल बनाउन यस अघि नै निर्देशन दिएका थिए। मन्त्रीको निर्देशनपछि कार्यालयको २० वटा कम्प्यूटर अपटेड गरिएको छ ।  कर्मचारीलाई तीनवटा सिफ्टमा काम गर्न लगाइएको छ । 
त्यस्तै, श्रम स्वीकृतिको प्रक्रियालाई सहज बनाउन पुनः श्रम स्वीकृतिलाई एउटै तहले स्वीकृत गर्ने व्यवस्था मिलाउने मन्त्रालयले तयारी गरेको छ । हालको व्यवस्थाअनुसार संस्थागत श्रम स्वीकृतिको लागि १३ जना कर्मचारीले कागजपत्र प्रमाणीकरण गर्ने र सात जना कर्मचारीले स्वीकृत प्रदान गर्ने व्यवस्था छ ।

त्यस्तै, व्यक्तिगत श्रम स्वीकृतितर्फ १५ जनाले कागजपत्र प्रमाणीकरण गर्ने  र सात जना कर्मचारीले प्रमाणीकरण गर्ने व्यवस्था छ । तर, अब देखि व्यक्तिगत श्रम स्वीकृति तर्फ २२ जना कर्मचारीले नै श्रम स्वीकृति प्रदान गर्ने व्यवस्था मिलाउने मन्त्रालयको तयारी छ । 

त्यस्तै, प्रत्येक कर्मचारीलाई श्रम स्वीकृतिको लागि निश्चित कोटा समेत तोकिने, विदाको दिनमा पनि श्रम स्वीकृति प्रदान गर्ने, श्रम स्वीकृतिको लागि तोकिएको कोटा हटाइने मन्त्रालयको तयारी छ । 
 


कोरियाको विषयमा बजार हल्ला निराधार भएको श्रममन्त्रीको दावी 

कोरियाको विषयमा बजार हल्ला निराधार भएको श्रममन्त्रीको दावी 


काठमाडौैं, ६ चैत । श्रम, रोजगार तथा सामाजिक सुरक्षामन्त्री डोलप्रसाद अर्यालले कोरियाको ई–७ भिसाका विषयमा बजारमा आएका हल्ला निराधार भएको दावी गरेका छन् । मंगलबार पत्रकारहरुसँग अन्तरक्रिया गर्दै मन्त्री अर्यालले ई–७ भिसा मार्फत म्यानपावर व्यवसायीले नेपाली श्रमिक कोरिया पठाउन सक्ने भन्ने खालको सुचनामा मन्त्रालयको आधिकारीता नभएको  बताएका हुन्  ।  
  
कोरियाले हालसम्म ईपिएस प्रणाली मार्फत नेपाली श्रमिक लैजादै आएको छ । तर, यसअघि नै म्यानपावर व्यवसायीले ई–७ भिसा मार्फत कोरिया पठाईदिने भन्दै रकम असुल गर्न थालेको गुनासो आएपछि प्रधानमन्त्री पुष्पकमल दाहालले गत पुसमा नै यस बिषयमा निर्देशन दिएका थिए ।  प्रधानमन्त्रीले दाहालले ई–७ भिसालाई पनि ईपिएसमा आवद्ध गराउन निर्देशन दिएका थिए ।   
प्रधानमन्त्री दाहालको निर्देशनलाई कार्यान्वयन गर्नका लागि मन्त्रालयले एक कार्यदल नै निर्माण गरेको मन्त्री अर्यालले स्पष्ट पारे । 

 ‘कार्यदलले यस बिषयमा अध्ययन गरी रहेको छ । कार्यदलको प्रतिवेदन पछि श्रमिकको हितमा हुने गरी निर्णय गरिनेछ,’ उनले भने  । तर, बजारमा हल्ला भए जस्तै गरी मन्त्रालयले यसमा कुनै पनि निर्णय नगरेको उहाँले बताए । 

त्यस्तै, मन्त्री अर्यालले वैदेशिक रोजगारीमा जाने श्रमिकको लागि अनिवार्य गरिएको पूर्वप्रस्थान अभिमुखीकरण तालिमको शुल्क पनि यथावत रहेको स्पष्ट पारे । ‘अर्को निर्देशन नहुँदासम्मको लागि अभिमुखीकरण तालिमको शुल्क ७०० नै तोकिएको छ,’ उनले भने ।  यस बिषयमा पनि मन्त्रालयले निर्माण गरेको कार्यदलले अध्ययन गरी रहेको छ ।

अध्ययन पछि मूल्य वृद्धि गर्ने नगर्ने बिषयमा निर्णय गर्ने उहाँले बताए । प्रधानमन्त्री पुष्पकमल दाहालले पूर्वप्रस्थान अभिमुखीकरण तालिमको लगायतका अन्य तालिमहरु निशुल्क रुपमा वैदेशिक रोजागर बोर्ड र सीप विकास तालिम प्रतिष्ठानबाट उपलब्ध गराउने मिल्ने गरी अध्ययन गर्न निर्देशन दिएका थिए ।

त्यस्तै, वृद्धि भएको शुल्क श्रमिकहरुबाट नलिई यथावत रुपमा हुने गरी कार्यान्वयनको व्यवस्था मिलाउन निर्देशन दिएका थिए ।  
पत्रकारको जिज्ञासालाई सम्बोधन गर्दै मन्त्री अर्यालले प्रधानमन्त्री पुष्पकमल दाहालले दिएको निर्देशन कार्यान्वयनका लागि मन्त्रालयले तीन सदस्यीय कार्यदल गठन गरेको स्पष्ट पारे ।  
 


विदेशी बन्दी गृह र अस्पतालमा उपचाररत श्रमिकको तथ्यांक उपलब्ध गराउन निर्देशन 

विदेशी बन्दी गृह र अस्पतालमा उपचाररत श्रमिकको तथ्यांक उपलब्ध गराउन निर्देशन 


काठमाडौं, ६ चैत । श्रम, रोजगार तथा सामाजिक सुरक्षा मन्त्री डोलप्रसाद अर्यालले वैदेशिक रोजगारीको क्रममा विभिन्न मुलुकको बन्दी गृह तथा अस्पतालमा उपचाररत रहेका नेपाली श्रमिकको अवस्थाको बारेमा तत्काल जानकारी गराउन निर्देशन दिएका छन् । गन्तव्य मुलुकमा रोकिएका श्रमिकको शवको पनि तथ्यांक उपलब्ध गराउन वैदेशिक रोजगार बोर्डलाई मन्त्री अर्यालले निर्देशन दिएका हुन् ।

वैदेशिक रोजगार बोर्डसँगको छलफलमा मन्त्री अर्यालले वैदेशिक रोजगारीमा क्रममा रहेका श्रमिकको अवस्थाको विषयमा सरकार जानकार हुनुपर्ने बताउँदै श्रमिक बन्दी गृहमा पर्नुको कारण र समस्या समाधानका विषयमा समेत जानकारी गराउन निर्देशन दिएका हुन् । सबै गन्तव्य मुलुकबाट तथ्यांक संकलन उद्धार तथा समस्या समाधानको योजना बनाइने समेत उनले बताए ।
 त्यस्तै, विदेशमा अड्किएका शवलाई पनि जतिसक्दो छिटो नेपाल झिकाइने व्यवस्था गरिने उनको भनाइ छ ।

बोर्डका कर्मचारीसँगको छलफलमा मन्त्री अर्यालले विदेशमा दुर्घटनामा परेका श्रमिकले सम्बन्धित मुलुकबाट पाउने बिमाको सुविधाको विषयमा पनि पहल गर्न बोर्डलाई निर्देशन दिएका छन् ।