जगदम्बा इन्टरप्राइजेजका चार जनामा कोरोना पुष्टि

काठमाडौं, १३ साउन । वीरगन्‍ज महानगरपालिका ३२ मा रहेको जगदम्बा इन्टरप्राइजेजका प्रमुख कार्यकारी अधिकृतसहित चार कर्मचारीलाई कोरोना संक्रमण पुष्टि छ ।

कोरोना संक्रमण पुष्टिभएसँगै कम्पनी सिल गरिएको छ । चार जनामध्ये कम्पनीमा कार्यरत एक भारतीय नागरिक रहेको बताइएको छ । 

कोरोना संक्रमण पुष्टि भएका चार जनालाई अस्पतालमा राखिएको र उद्योगमा कार्यरत दुई सय कर्मचारीको पीसीआर परीक्षण नगर्दासम्म उद्योगभित्रै राखिएको छ ।

संवैधानिक आयोगमा पदाधिकारी नियुक्ति नगर्नुको कारण खोल्न सर्वोच्चको आदेश 

काठमाडौं, १३ साउन । जुरी नेपालले सात संवैधानिक आयोगहरुमा पदाधिकारी नियुक्तिको माग गर्दै दायर गरेको रीटमा सर्वोच्च अदालतले सरकारका नाउँमा कारण देखाऊ आदेश जारी गरेको छ ।

यही साउन ११ गते प्रारम्भिक सुनुवाइका क्रममा न्यायाधीश सपना प्रधान मल्लको एकल इजलासले उक्त आदेश जारी भएको हो । साथै उक्त विषय गम्भिर प्रकृतिको भएकोले यस रीटलाई अग्राधिकार दिई पेशी तोक्न समेत आदेश गरिएको छ ।

जुरी नेपालले संबैधानिक आयोगको रुपमा स्थापित भएका अन्य पाँचवटा आयोग (राष्ट्रिय समावेशी आयोग, आदिवासी जनजाति आयोग, मधेशी आयोग, थारु आयोग र मुस्लिम आयोग) मा एक–एक जनामात्र पदाधिकारी नियुक्त भई आयोगहरुले संबिधान तथा कानून बमोजिमको भूमिका निर्वाह गर्नसक्ने अवस्था नभएकोले तत्काल सबै आयोगलाई क्रियाशिल बनाउन,  सबै आयोगहरुमा पदाधिकारी नियुक्तिको माग गर्दै रीट निवेदन दायर गरेको थियो ।
संविधानको धारा २६५ बमोजिम संविधान प्रारम्भ भएको मितिले १० बर्ष पछि यी सबै आयोगहरुको संघीय संसदबाट पुनरावलोकन गरिने प्रावधान छ । एकातर्फ संविधान जारी भएको करिव ५ बर्षसम्म पनि यि आयोगहरुमा पदाधिकारी नियुक्त हुन नसक्दा यि आयोगहरुले प्रभावकारी रुपमा आफ्नो भूमिका निर्वाह गर्न सकेका छैनन् भने अर्कोतर्फ नयाँ संविधान बमोजिम नागरिकहरुको मौलिक हक कार्यान्वयन हुन नसकेको जुरी नेपालले जनाएको छ ।

मौलिक हक कार्यान्वयन गर्ने निकायमा स्वेच्छाचारिता देखिएको छ । यहाँसम्म कि मौलिक हक कार्यान्वयनका लागि वनेका कैयौं कानुनहरु ९खाद्य, आवास, शिक्षा, जनस्वास्थ्य लगायत० कार्यान्वयनका लागि आवश्यक नियमावली समेत तर्जुमा तथा लागु भएका छैनन् ।
तर विषयगत हिसावले अनुगमन गर्ने र सरकारलाई जिम्मेवारी वनाउने दायित्व भएका आयोगहरुलाई निष्प्रभावी राख्ने कार्यले संविधानको मर्म र भावनामा नै प्रहार भएकोले सबै आयोगमा तत्काल पदाधिकारी नियुक्ति लगायतका विषय माग गरी उक्त रीट निवेदन दायर गरिएको जुरी नेपालले जनाएको छ ।

जुरी–नेपालको तर्फबाट अधिवक्ताहरु विष्णुप्रसाद पोख्रेल, मोहनलाल आचार्य, शशी बस्नेत, बालमाया विश्वकर्मा, सुन्दर बहादुर सेनी र कमल बहादुर बसेलले संयुक्त रुपमा रीट निवेदन दायर गरेका हुन् ।

यसमा संवैधानिक परिषद, संबैधानिक परिषदका अध्यक्ष, संघीय संसद र नेपाल सरकारका मुख्य सचिवलाई विपक्षी बनाइएको छ ।
रीट निवेदनमा मानव अधिकारको प्रत्याभूतिका लागि महत्वपूर्ण भूमिका खेल्ने कार्यादेश पाएका विभिन्न सातवटा आयोगमा नियुक्त हुनुपर्ने ३५ मध्ये ३१ पद लामो समयदेखि रिक्त रहेकोले उक्त सबै पदमा पदाधिकारीहरु नियूक्तिका लागि संबैधानिक परिषदको तर्फबाट अविलम्ब सिफारिस गर्न, त्यसरी नियूक्तिका लागी सिफारिस गर्नुपूर्व राष्ट्रिय मानवअधिकार संस्थाहरुको स्वतन्त्रता, सक्षमता र निष्पक्षतालाई निर्देशित गर्ने पेरिस सिद्धान्तसमेतलाई आत्मसात गर्न, संबैधानिक आयोगको नियुक्तिमा भएको ढिलाईको पुनरावृति नहुने कुरालाई सुनिश्चित गर्न र उल्लेखित संवैधानिक आयोगहरुको प्रभावकारीताका लागि आवश्यक पर्ने जनशक्ति तथा श्रोतसाधन उपलव्ध गराउन आवश्यक प्रवन्ध गर्न परमादेशको माग गरिएको छ ।

प्रारम्भिक सुनुवाइका क्रममा रीट निवेदकको तर्फबाट अधिवक्ता पंकजकुमार कर्णले बहस गरेका थिए ।

नारायणगढ–मुग्लिन सडकखण्डको चारकिलोमा पुनः पहिरो 

चितवन, ९ साउन । नारायणगढ–मुग्लिन सडकखण्डको इच्छाकामना गाउँपालिका–६ चारकिलोमा शुक्रबार बिहान पुनः पहिरो खसेको छ  ।  

जिल्ला प्रहरी कार्यालय चितवनका अनुसार बिहीबार राति खसेको पहिरो पन्छाएर एकतर्फी सवारी सञ्चालन भएको केही समयमा नै पुनः सोही स्थानमा पहिरो खसेको हो । 

निरन्तरको वर्षाका कारण पहिरो खस्ने क्रम जारी रहेको जिल्ला प्रहरी कार्यालयले जनाएको छ । 

सोही स्थानमा गत सोमबार पनि पहिरो खसेको थियो । सो पहिरो ३६ घण्टामा पन्छाइएको थियो । पहिरोका कारण दुईतर्फी सडक अवरुद्ध भएको छ । 

नेपालमा बुधबार थप २ सय ७ जना कोरोना संक्रमणमुक्त, थप १ सय जनामा कोरोना संक्रमण

काठमाडौं । नेपालमा बुधबार थप २ सय ७ जना कोरोना संक्रमणमुक्त भएका छन् । स्वास्थ्य तथा जनसंख्या मन्त्रालयका अनुसार थप २ सय ७ जना कोरोना संक्रमण मुक्त भएका हुन् ।

योसँगै हालसम्म नेपालमा १२ हजार ६ सय ८४ जना डिस्चार्ज भएका छन् । स्वास्थ्य तथा जनसंख्या मन्त्रालयका प्रवक्ता डा जागेश्वर गौतमका अनुसार नेपालमा आज एकैदिन थप १ सय जनामा कोरोना संक्रमण पुष्टि भएको हो ।

७ दिन अघि कोरोना पुष्टि भएका शशिको मृत्यु, कोरोनाबाट ज्यान गुमाउनेको संख्या ४१ पुग्यो

काठमाडौं, साउन ७ ।  नेपालमा कोरोनाभाइरबाट थप एक जनाको मृत्यु भएको छ । मृत्यु हुनेमा महोत्तरीका ६० वर्षीय शशि भुषण झा रहेको 
बीपी कोइराला स्वास्थ्य विज्ञान प्रतिष्ठान धरानले जनाएको छ ।

सात दिन अगाडी मात्रै कोरोना पुष्टि भएका महोत्तरीका झाको मंगलबार राति अस्पतालको आइसोलेसनमा निधन भएको हो ।  मृतकको पिसिआर रिपोर्टमा कोरोना पोजेटिभ देखिएको बारे प्रतिष्ठानको मेडिशन विभाग प्रमुख प्रा।डा संजिवकुमार शर्माले जानकारी दिए । उनको शव ब्यबस्थापनको तयारी गरिएको छ ।

 योसँगै नेपालमा कोरोनाका कारण मृत्यु हुनेको संख्या ४१ पुगेको छ । झाको कोरोनासंक्रमणबाट मृत्यु भएको स्वास्थ्य मन्त्रालयले पुष्टि गर्न बाकीँ  छ ।

विश्वभर कोरोना संक्रमितमध्ये ७९ लाख पाँच हजार बढी उपचारपछि निको

काठमाडौं । विश्वभर महामारीको रुपमा फैलिएको कोरोना भाइरस संक्रमितको संख्या  एक करोड ४१ लाख १८ हजार १ सय १५ पुगेको छ । 

अमेरिकास्थित जोन्स हप्किन्स विश्वविद्यालयका अनुसार कोभिड–१९ बाट मृत्यु हुनेको संख्या ६ लाख २ हजार ९ सय ४८ पुगेको छ । 

७९ लाख पाँच हजार १ सय ३२ जना उपचारपछि निको भएका छन् ।

सबैभन्दा बढी प्रभावित भएको अमेरिकामा कुल संक्रमितको कुल संक्रमितको संख्या ३६ लाख ४७ हजार ७ सय १५ पुगेको छ । एक लाख ३९ हजार २ सय ६६ जना कोरोना संक्रमितको मृत्यु भएको छ । यस्तै अमेरिकामा ११ लाख ७ हजार २ सय ४ जना उपचारपछि निको भएका छन् । 

कोरोना संक्रमितको संख्या दोस्रो स्थानमा रहेको ब्राजिलमा  २० लाख, ४६ हजार ३ सय २८ जना संक्रमित भएका छन् । त्यसमध्ये ७७ हजार ८ सय ५१ को मृत्यु भएको छ । १४ लाख २८ हजार ५ सय २० जना उपचारपछि निको भएका छन् ।

भारतमा कोरोना संक्रमितको संख्या १० लाख ३९ हजार ८४  जना पुगेको छ । 
भारतमा कोरोना संक्रमणबाट ज्यान गुमाउनेको संख्या २६ हजार २ सय ७३ पुगेको छ । ६ लाख ५३ हजार ७ सय ५१ जना उपचारपछि निको भएका छन् ।

रुसमा ७ लाख ६४ हजार १२ सय १५  जनामा संक्रमण देखिएको छ ।१२ हजार २ सय २८  जनाको मृत्यु भएको छ । ४५ हजार ९ सय ९ जना उचारपछि निको भएका छन् । 
 

लमजुङको क्वारेन्टाइनमा २३ वर्षीय युवक मृत भेटिए 

लमजुङ, साउन ३ । लमजुङको क्वारेन्टाइनमा एक युवक मृत अवस्थामा फेला परेका छन् । क्व्होलासोंथर गाउँपालिका ९, गिलुङ चिसापानीको बुद्धोदय माध्यमिक विद्यालयमा निर्माण गरिएको क्वारेन्टाइनमा बसेका युवक शुक्रबार बिहान मृत भेटिएको प्रहरीले जनाएको छ । प्रहरीका अनुसार उनी क्व्होलासोंथर गाउँपालिका ६, पसगाउँका २३ वर्षीय युवक हुन् । प्रहरीले उनको नाम सार्वजनिक गरेको छैन । प्रहरी नायब उपरीक्षक गङ्गाबहादुर थापाले युवक मृत अवस्थामा भेटिएको र अनुसन्धान थालेको बताए ।’गोरखापत्र दैनिकमा खबर छ ।

उनका अनुसार युवक असार ३१ गतेबाट क्वारेन्टाइनमा बसेका थिए । क्वारेन्टाइनमा बसेको दुई दिनमै मृत अवस्थामा भेटिएको प्रहरीले जनाएको छ । प्रनाउ थापाका अनुसार ती युवकले आत्महत्या गरेको हुनसक्ने प्रारम्भिक अनुसन्धानबाट देखिएको छ । उहाँले भन्नुभयो, ‘युवकले पासोमा झुण्डिएर मरेको जस्तो देखिन्छ । खास कारणबारे हामीले अनुसन्धान थालेका छौँ ।

क्व्होलासोंथर गाउँपालिका९९ का अध्यक्ष नन्दजङ गुरुङका अनुसार बुटवल दिदीको घरमा बस्दैआएका उनी पोखरा हुँदै पसगाउँ आएका थिए । पसगाउँ आएको असार ३१ गतेकै दिन क्वारेन्टाइनमा राखिएको थियो । उक्त क्वारेन्टाइनमा उनी एक्लै रहेको र बिहान हेर्न जाँदा मृत अवस्थामा भेटिएको उनले बताए । उक्त घटनापछि स्थानीयले विद्यालयमा क्वारेन्टाइन हटाउन माग गरेका छन् । उक्त क्वारेन्टाइनमा यसअघि दुई जना बसिसकेका छन् ।

घरभाडामा छुट दिन घरधनीसँग आग्रह 

काठमाडौ, असार ११- पोखरा उद्योग वाणिज्य सङ्घले घरभाडामा छुट दिन घरधनीसँग आग्रह गरेको छ । सङ्घका महासचिव अर्जुन पोखरेलले चार महिनादेखि व्यवसाय बन्द रहेको र घरभाडा भुक्तानी नगरेकै कारण व्यवसायी पलायन हुनुपर्ने अवस्था सिर्जना भएको उल्लेख गर्दै भाडा छुट दिन आग्रह गरेका छ ।
    
“सहज परिस्थिति हुँदा नियमित भाडा तिरेको स्मरण गर्दै असहज परिस्थितिमा व्यवसायीलाई जोगाउनु घरधनीको पनि कर्तव्य हो”, विज्ञप्तिमा भनिएको छ, “घरभाडा चुक्ता नगरेकै कारण व्यवसायी नै पलायन हुनुपर्ने अवस्था सिर्जना हुनु घरधनीको लागि पनि राम्रो हैन । घर खाली गराउँदैमा समस्याको समाधान हुने पनि हैन ।”
    
यथासम्भव निश्चित अवधिको भाडा मिनाहा एवं अनुकूल समयमा भुक्तानी गर्ने सहमति कायम गर्दै व्यवसाय टिकाउनका लागि घरधनीबाट विशेष योगदान हुनुपर्ने भन्दै सङ्घले घरभाडा छुट दिने घरधनीलाई कर छुटको व्यवस्था गर्न सरोकारवालासँग आग्रहसमेत गरेको छ ।
    
सङ्कटको यो घडीमा आर्थिक र मानसिक समस्यामा परेका आफ्ना ग्राहकका लागि कर्जाको किस्ता र ब्याज भुक्तानीको लागि समयसीमा बढाउन एवं ब्याजदर घटाउन सम्पूर्ण बैंक था वित्तीय संस्था पनि सङ्घले अनुरोध गरेको छ ।
 

पश्चिम रुकुम घटना रहस्यमय बन्दै, सबै युवाको शव अङ्गभङ्ग भएको अवस्थामा भेटिए

जाजरकोट, जेठ २४ - पश्चिम रुकुमको सोती घटनामा मारिएका सबै युवाको शव क्षतविक्षत अवस्थामा भेटिएपछि घटना रहस्यमय बनेको छ ।शवको प्रकृति हेर्दा उनीहरूलाई ज्यान मारेर वा गम्भीर घाइते बनाएर भेरी नदीमा फालिदिएको हुन सक्ने प्रत्यक्षदर्शीले जनाएका छन् । प्रत्यक्षदर्शीको भनाइकै आधारमा सामूहिक ज्यान मारिको हुन सक्ने आशंका गरिएको छ ।

घटनापछि सम्पर्कविहीन भएका उनीहरूको खोजतलास गर्दा भेरी नदीमा ६ जनाकै शव घाइते र विभिन्न अंगमा गम्भीर चोट लागेको अवस्थामा फेला परेको हो । यो समाचार आजको राजधानी दैनिकमा छ ।

राष्ट्रिय तथा अन्तर्राष्ट्रिय चासोका रुपमा हेरिएको सोती घटनामा जाजरकोटका ६ युवाको अकल्पनीय मृत्यु भएको छ । भेरी नगरपालिका–४ का नवराज विक, सन्दीप विक गणेश बुढा, वडा–११ का गोविन्द शाही, लोकेन्द्र सुनार र चौरजहारी नगरपालिका– १ पश्चिम रुकुमका टीकाराम सुनारको सोती घटनामा ज्यान गएको हो ।

नवराज विक र सोतीका मल्ल थरकी एक युवतीबीचको अन्तरजातीय प्रेम सम्बन्धका कारण उब्जिएको घटनाले उनीहरू सबैको ज्यान लिएको छ । गत १० जेठमा पश्चिम रुकुम चौरजहारी नगरपालिका–८ सोतीमा नवराजकी प्रेमिकालाई भगाउन गएका जाजरकोटका १९ युवामध्ये ६ जनाको मृत्य भएको छ ।

कोरोना सङ्क्रमण हुनेको संख्या ५९१ पुग्यो

काठमाडौ, जेठ १० - पछिल्ला दिनका कोरोना भाइरसबाट सङ्क्रमण हुनेको सङ्ख्यामा वृद्धि भएको छ । स्वास्थ्य तथा जनसङ्ख्या मन्त्रालयका अनुसार आजै दोस्रो पटक मात्रै कूल ३६ जना नयाँ सङ्क्रमित फेला परेका छन् । 

मन्त्रालयमा आज आयोजित नियमित पत्रकार सम्मेलनमा दिइएको जानकारीअनुसार सबैभन्दा धेरै बाँकेको नरैनापुरका २७ जना कोरोना सङ्क्रमित भएका छन् । योसँगै नेपालमा कोरोना सङ्क्रमितको सङ्ख्या 591पुगेको छ ।

मन्त्रालयका प्रवक्ता डा विकास देवकोटाका अनुसार बाँकेमा २७, बैतडीमा चार, सुर्खेतमा तीन, बर्दिया र झापामा एक÷एक जनामा कोरोना सङ्क्रमण पुष्टि भएको छ । बैतडीको शिवनाथ गाउँपालिका, बर्दियाको बढैयाताल गाउँपालिका, झापाको झापा गाउँपालिकामा सङ्क्रमित भेटिएका हुन् । यस्तै सुर्खेतको सुर्खेत अस्पतालमा गरिएको परीक्षणमा थप तीन जनामा सक्रमण भएको पुष्टि भएको हो । 

हालसम्म कूल ४० जिल्लामा कोरोना सङ्क्रमित भएका छन् । मन्त्रालयका अनुसार प्रदेश नं १ मा ८६, प्रदेश नं २ मा १७२, वाग्मती प्रदेशमा ३२ जना सङ्क्रमित भएका छन् । यस्तै गण्डकी प्रदेशमा पाँच, प्रदेश नं ५ मा २७१, कर्णाली प्रदेशमा चार र सुदूरपश्चिम प्रदेशमा १४ जना सङ्क्रमित भएका छन् ।