सागकी स्वर्ण पदक विजेता सञ्जु चौधरी मृत फेला

काठमाडौं, २७ वैशाख ।  १३ औँ दक्षिण एसियाली खेलकुद (साग) की स्वर्ण पदक विजेता सञ्जु चौधरी मंगलबार मृत अवस्थामा भेटिएकी छिन्  ।  उनी बिहान साढे ६ बजे कोठाभित्र झुण्डिएको अवस्थामा फेला परेकी हुन् ।

एसियाली खेलकुदको तयारीका क्रममा रहेकी सञ्जु ललितपुरको महालक्ष्मी नगरपालिका–९ लुभुमा प्रशिक्षक सञ्जय महर्जनको घरमा बस्दै आएकी थिइन् । सञ्जु सुतेको ढोका भित्रबाट चुक्कुल लगाइएको र झ्यालमा ग्रिल लगाइएको अवस्थामा भेटिएको र प्रारम्भिक अनुसन्धानले आत्महत्या देखिने जिल्ला प्रहरी परिसर, ललितपुरका एसपी सिद्धिविक्रम शाहले बताए 

सन् २०१९ को डिसेम्बरमा नेपालमा आयोजित १३ औं दक्षिण एसियाली खेलकुदमा नेपालगञ्जकी सञ्जुले ऐतिहासिक स्वर्ण पदक जितेकी थिइन् । उनी प्रशिक्षकको घरमा बसेर १९ औं एसियाली खेलकुदको तयारी गरिरहेकी थिइन् ।

जिम्बावे ‘ए’विरुद्धको एकदिवसीय अभ्यास खेलमा नेपाल विजयी

काठमाडौं, २६ वैशाख।  घरेलु टोली नेपालले भ्रमणकारी टोली जिम्बावे ‘ए’विरुद्धको अन्तिम तथा तेस्रो अभ्यास खेलमा जित निकालेको छ।  सोमबार सम्पन्न खेलमा नेपालले जिम्बावेलाई ६ विकेटले पराजित गरेको हो।  जिम्बावेले दिएको २१४ रनको लक्ष्य नेपालले ३०.१ ओभरमा ४ विकेट गुमाउँदै पूरा गरेको हो। योसँगै नेपालले तीन एकदिवसीय अभ्यास खेल २–१ ले जितेको छ। पहिलो खेलमा जिम्बावे ३ विकेटले विजयी भएको थियो। दोस्रो खेलमा नेपालले ९ विकेटको जित हात पारेको थियो।

नवौं राष्ट्रिय खेलकुदका लागि लोगो, मस्कट र नारा सार्वजनिक

काठमाडौं, २४ वैशाख ।  नवौं राष्ट्रिय खेलकुदका लागि लोगो, मस्कट र नारा सार्वजनिक भएको  छ । युवा तथा खेलकुदमन्त्री महेश्वरजंग गहतराज र राखेप सदस्य सचिव टंकलाल घिसिङले लोगो, मस्कट सार्वजनिक गरेका हुन् ।

नवौं खेलकुदमा कस्तुरी मृगको मस्कट रहने भएको छ भने लोगोको शीर्ष स्थानमा पोखराको पहिचानका रुपमा माछापुछ्रे हिमाल राखिएको छ । त्यसमुनि चारवटा रातो ट्र्याकले प्रदेश नम्बर संकेत गर्छ भने त्यसमुनि पंक्षीको आकृति दिइएको छ ।

कलाकार भोलानाथ शर्मा पौडेलले बनाएको लोगो र मस्कट राष्ट्रिय खेलकुदका लागि छनोट भएको हो ।नवौं राष्ट्रिय खेलकुदको नारा ‘एकतावद्ध देश, खेलकुदको सन्देश’ रहेको छ । यो नारा खुला प्रतिस्पर्धाबाट शुयोग्यराज काफ्लेले जुराएका हुन् । खेल गण्डकी प्रदेशमा जेठ २२ देखि २८ गतेसम्म आयोजना हुने छ । 

जिम्बावे ए विरुद्ध पहिलो एकदिवसीय खेलमा नेपाल ३ विकेटले पराजित

काठमाडौं, २३ वैशाख ।   जिम्बोवे ए विरुद्ध पहिलो एकदिवसीय खेलमा घरेलु टोली नेपाल ३ विकेटले पराजित भएको छ । नेपालले दिएको १३७ रनको लक्ष्य जिम्बावे ए ले २६ ओभर खेल्दै ७ विकेट गुमाएर पूरा गर्यो । जिम्बावेका लागि ओपनर इन्नोसेन्ट काईयाले एक छेउबाट पारी सम्हाल्दै अविजित रहेर सर्वाधिक ४८ रन बनाए । यस्तै सेफास जुवायो ३२ रन, राए काईयाले १४ रन, ब्राड ईभान्सले १७ रन जोडे ।  बलिङमा नेपालका कप्तान सन्दीप लामिछाने र करण केसीले २–२ विकेट लिए । सोमपाल कामी र सागर ढकालले १–१ विकेट लिए ।

टी-ट्वान्टी: जिम्बावेमाथि नेपालको शानदार जित

काठमाडौं, २१ वैशाख ।  पाहुना टोली जिम्बावे 'ए' विरुद्धको तेस्रो तथा अन्तिम टी-ट्वान्टीमा नेपालले जित निकालेको छ । टियु क्रिकेट मैदानमा बुधबार नेपालले जिम्बावेलाई ८ विकेटले हराएको हो ।

पहिलो खेलमा नेपाल जिम्बावेसँग ६ विकेटले पराजित भएको थियो । दोस्रो टी-ट्वान्टी भने वर्षाले रद्द भएको थियो । नेपालको जितसँगै तीन खेलको सिरिज १-१ को बराबरीमा सकिएको छ । 

जिम्बावेले दिएको १ सय ३७ रनको लक्ष्य नेपालले १५ ओभर ५ बलमा २ विकेट गुमाएर पूरा गर्‍यो । नेपालको जितमा आसिफ शेखले अविजित रहदै ८७ रनको अर्धशतकीय इनिङ खेले । यस्तै कुशल भुर्तेलले ३४ रन जोड्दा बसिर अहमेदले १० रन जोडे ।

जिम्बावेका लुक जोग्वे र ब्राण्डन माभुताले १/१ विकेट लिए । त्यसअघि टस हारेर पहिले ब्याटिङ गरेको जिम्बावेले २० ओभरमा ७ विकेट गुमाएर १ सय ३६ रन बनाएको थियो ।

पीएनजीलाई हराउँदै नेपालले जित्यो टी–२० सिरिज

काठमाडौं, २१ चैत । त्रिकोणात्मक टी–२० सिरिजको उपाधि नेपालले हात पारेको छ ।  नेपालले पीएनजी लाई ५१ रनले हराएको हो ।  कीर्तिपुरस्थित टीयू अन्तर्राष्ट्रिय मैदान नेपालले दिएको १६८ रन पछ्याएको पीएनजी १६.२ ओभरमा ११७ रनमा अलआउट भयो ।

नेपालद्वारा मलेसिया ८५ रनले पराजित

काठमाडौं, १९ चैत । नेपाल त्रिकोणात्मक टी २० आई सिरिजको फाइनमा पुगेको छ । सिरिजको अन्तिम खेलमा शनिबार मलेसियालाई ८५ रनले पराजित गर्दै घरेलु टोली नेपाल अपराजित रहँदै फाइनल पुगेको हो ।  अब नेपालले उपाधिका लागि पपुवा न्यू गिनीसँग खेल्ने छ।

त्रिकोणात्मक टी-२० श्रृंखलामा नेपाल फाइनलमा प्रवेश

काठमाडौं, १७ चैत । त्रिकोणात्मक टी २० श्रृंखलाको आजको खेलमा पनि नेपालले सानदार जित निकालेको छ ।  बिहीबार कीर्तिपुरस्थित टीयू मैदानमा भएको खेलमा नेपालले पीएनजीलाई ३७ रनले हराएको हो । 

२०४ रनको लक्ष्य पछ्याएको पीएनजी १९.४ ओभरमा १६६ रनमा अलआउट भयो । पीएनजीका लागि चार्ल्स अमिनीले सर्वाधिक ६२ रन बनाए । यस्तै टोनी उराले ४३ र सेस बाउले २५ रन जोडे ।

नेपालका लागि करण केसीले ह्याट्रिक सहित ५ विकेट लिए । त्यस्तै सोमपाल कामी र अविनास बोहराले दुई–दुई विकेट र कप्तान सन्दीप लामिछानेले एक विकेट लिए ।  यो खेल जिते सङ्गै नेपाल एक खेल अगावै श्रृंखलाको फाइनलमा पुगेको छ  । नेपालले पहिलो खेलमा पीएनजीलाई १५ रनले र दोस्रो खेलमा मलेसियालाई ६ विकेटले पराजित गरेको थियो ।

त्रिकोणात्मक टी–२० श्रृंखलाः नेपालको दोस्रो जित

काठमाडौं, १६ चैत । त्रिकोणात्मक टी–२० श्रृंखलामा नेपालले सानदार जित निकालेको छ ।  टीयू अन्तर्राष्ट्रिय मैदानमा बुधबार भएको खेलमा नेपालले मलेसियालाई ६ विकेटले हराएको हो ।

नेपालका लागि आसिफ शेखले सर्वाधिक ५७ रन बनाए  भने रोहित पौडेलले १२, दीपेन्द्र सिंह ऐरीले २१ रन जोडे । यस्तै  दिलिप नाथले १५ र कुशल मल्लले  २ रनमा अविजित रहे ।

बलिङमा मलेसियाका लागि पवनदिप सिंहले २ तथा सयद अजिज र मुहम्मद बमिरले समान १–१ विकेट लिए । नेपालले तेस्रो खेल बिहीबार पपुवा न्यूगिनीसँग खेल्नेछ ।

मरिससविरूद्धको मैत्रीपूर्ण खेलमा नेपाल विजयी

काठमाडौं, १५ माघ। पहिलो मैत्रीपूर्ण खेलमा नेपालले अफ्रिकी राष्ट्र मरिससलाई पराजित गरेको छ । त्रिपुरेश्वरस्थित दशरथ रंगशालमा शनिबार सम्पन्न खेलमा नेपालले १–० गोलअन्तरको संघर्षपूर्ण जित हात पारेको हो। नेपालका लागि एक मात्रै गोल विमल घर्तीमगरले गरेका हुन्।

नेपालको जितमा विमल घर्तीमगर नायक बने । उनले खेलको ५५औँ मिनेटमा गरेको एक गोल नै नेपालका लागि निर्णायक गोल सावित भयो । एक वर्षपछि टोलीमा पुनरागमन गरेका विमलले पहिलो खेलमै गोल गरेका हुन् । विजयी गोल गरेका विमलले ‘म्यान अफ दि म्याच’ अवार्ड पाएका छन्।

अन्जन विष्टको लामो पासमा पेनाल्टी क्षेत्रको ठिक बाहिरबाट विमलले प्रहार गरेको बलले पोस्टमा लाग्दै जाली चुमेको थियो । नेपालले पहिलोपटक अफ्रिकी टोलीसँग अन्तर्राष्ट्रिय खेल खेलेको हो । नेपालले अब मौरिससविरुद्धको दोस्रो मैत्रीपूर्ण खेल मङ्गलबार खेल्नेछ ।