18 Baishak, 2081 / 30 April , 2024
एजेन्सी । भारतको उत्तर प्रदेश र बिहार राज्यको सीमा क्षेत्रमा गंगा नदीको किनारमा कम्तीमा ४० जनाको शव बगाएर ल्याएको अवस्थामा भेटिएको छ ।
सरकारी अधिकारी अनुसार बगाएर ल्याएको अवस्थामा शव सोमबार भेटिएको हो ।
ती शवहरु कसरी नदी किनारमा पुगे भन्ने स्पष्ट भएको छैन, तर स्थानीय सञ्चारमाध्यमहरुले भने कोरोना भाइरसको संक्रमणका कारण निधन भएकाहरु हुन सक्ने जनाएका छन् ।
केही स्थानीय सञ्चारमाध्यमका अनुसार शवको संख्या १०० सम्म रहेको छ । शवको अवस्था हेर्दा केही दिन अघि नै मृत्यु भएकाहरुको हुन सक्ने बताइएको छ ।
स्थानीय सरकारी अधिकारी अशोक कुमारले बिबिसीसँग भनेका छन्, ‘यी शवहरु उत्तर प्रदेशबाट आएको हुन सक्ने सम्भावना छ ।’ शवहरु गाडिने वा जलाइने उनले बताएका छन् ।
कोरोना भाइरसको संक्रमणका कारण मृत्यु भएकाहरुको अन्तिम संस्कारका लागि उत्तर प्रदेशमा ठाउँ तथा दाउराको अभाव भएको छ । तस्बिर : रोयटर्स