14 Baishak, 2081 / 26 April , 2024
काठमाडौं, ८ चैत । काठमाडौं, ८ चैत । प्रधानमन्त्री पुष्पकमल दाहाल ‘प्रचण्ड’ले विभिन्न परिस्थिति र बाध्यताले वैदेशिक रोजगारीमा जान परेको अवस्थालाई अन्त्य गर्न सरकार प्रतिबद्ध रहेको बताएका छन् ।
आज राष्ट्रिय सभा गृहमा आयोजित वैदेशिक रोजगारीमा रहेका श्रमिकलाई सामाजिक सुरक्षा कोषमा सूचीकरण शुभारम्भ कार्यक्रममा
बोल्दै यस्तो बताएका हुन् ।
प्रधानमन्त्री दाहालले उक्त योजनाले वैदेशिक रोजगारीमा रहेका लाखौँ नेपाली श्रमिक लाभान्वित हुने बताउँदै वैदेशिक रोजगारमा जाने युवालाई विभिन्न बहानामा दुःख दिने कामको अन्त्य हुने बताए । “अब दुःख दिने काम अन्त्य भएको छ । वैदेशिक रोजगारीका लागि जाने युवालाई सहज वातावरण हुनुपर्छ”, उनले भने । गैरआवासीय नेपालीको नागरिकतासम्बन्धी समस्या समाधान गर्न आफूले पहल गर्दै आएको पनि उनले सो अवसरमा उल्लेख गरे ।
प्रधानमन्त्रीले देश भित्रै जनशक्तिलाई उत्पादनशील क्षेत्रमा लगाउन आवश्यक पहल गर्ने वचन दिए ।
कोषमा आबद्ध हुने वैदेशिक रोजगारमा रहेका श्रमिकले पनि जीवनको उत्तरार्धमा पेन्सन पाउने अवस्था बनेको उल्लेख गर्दै उनले यसले श्रमिकको जीवनमा ठूलो मद्दत पुग्ने विश्वास व्यक्त गरे ।
उनले आफू पहिलो पटक प्रधानमन्त्री हुँदा विदेशमा रहेका नेपाली नागरिकको नागरिकताको विषयलाई एजेण्डा बनाएको उनले बताए । “म प्रधानमन्त्री हुँदै गर्दा विदेशमा रहेको नेपालीहरुको नागरिकताको विषय बडो संवेदनशील र गम्भीर थियो । प्रधानमन्त्रीको हैसियतले मैले विदेशमा रहेका नेपालीहरुको नागरिकताको विषयको समस्या समाधानको निम्ति निकै ठुलो छलफल, बहस र आफ्नो ठाउँबाट योगदान गरे र संविधान निर्माण हुँदै गर्दा आधारभूतरूपमा त्यो समस्या समाधान भयो । ”
उनले आफू दोस्रो पटक प्रधानमन्त्री हुँदा विदेशमा रहेका नेपालीको सुरक्षाको स्वास्थ्य र बीमा सम्बन्धि समस्याको सम्बोधन गर्ने प्रयास गरेको उनले बताए ।