14 Mangshir, 2079 / 30 November , 2022

Logo
Newsajako
Social Icon
Social Icon
Secondary Top

समाचार


अतिक्रमण गरी बनाइएका संरचना ३५ दिनभित्र हटाउन आग्रह

अतिक्रमण गरी बनाइएका संरचना ३५ दिनभित्र हटाउन आग्रह


काठमाडौं, १४ मंसिर । काठमाडौँ उपत्यका विकास प्राधिकरणले सरकारी, पर्ति, ऐलानी तथा खोलाको मापदण्डबमोजिमका जग्गालाई अतिक्रमण गरी निर्माण गरिएका अनधिकृत संरचना ३५ दिनभित्र हटाउन आग्रह गरेको छ ।

प्राधिकरणले आज सूचना प्रकाशित गरी उपत्यकाका नगरहरूको पुनःनिर्माण, विकास र विस्तारमार्फत काठमाडौँ उपत्यकालाई व्यवस्थित गर्नका लागि अतिक्रमण गरी निर्माण गरिएका संरचना हटाउन आग्रह गरेको हो ।

उपत्यकामा योजनाबद्ध भौतिक विकासका लागि आधारभूत मापदण्ड तय गर्न काठमाडौँ उपत्यका विकास प्राधिकरण ऐन, २०४५ को दफा ३ बमोजिम काठमाडौँ उपत्यका विकास प्राधिकरण स्थापना भएको सूचनामा उल्लेख छ ।

प्राधिकरणले अतिक्रमण गरी निर्माण गरिएका संरचना नहटाएमा प्राधिकरणले हटाई सो हटाउँदा वा भत्काउँदा लाग्ने लागत सम्बन्धित व्यक्ति वा संस्थाबाट असुलउपर गर्नेसमेत जनाएको छ ।


थारु समुदायका लागि ६.६ प्रतिशत आरक्षण नछुट्याउन सर्वोच्चको आदेश

थारु समुदायका लागि ६.६ प्रतिशत आरक्षण नछुट्याउन सर्वोच्चको आदेश


काठमाडौं, १३ मंसिर । सर्वोच्च अदालतले थारु समुदायका लागि निजामती तथा सरकारी सेवाको विज्ञापनमा ६ दशमलव ६ प्रतिशत आरक्षण नछुट्याउन आदेश गरेको छ । 
न्यायाधीशद्वय प्रकाशमानसिंह राउत र डा. कुमार चुडालको संयुक्त इजलासले आइतवार गरेको आदेशमा गएको कात्तिक २० गते दिएको अन्तरिम आदेशलाई निरन्तरता दिन अस्वीकार गर्दै निजमती तथा सरकारी सेवाको विज्ञापनमा आरक्षणको नछुट्याउन आदेश गरेको हो । 
आदेशमा प्रतिनिधित्व सुनिश्चिततामा विविधतामा कलस्टर छुट्याएको पदलाई सय प्रतिशत मान्दा थारु समुदायका लागि ६ दशमलव ६ प्रतिशत छुट्याउन नसक्ने उल्लेख छ ।

प्रधानमन्त्री तथा मन्त्रिपरिषद्को कार्यालयको तर्फबाट सचिव मधुकुमार मरासिनीले थारु कल्याणकारिणी सभाको केन्द्रीय महामन्त्री प्रेमीलालप्रसाद चौधरीविरुद्धको निवेदन दिएक थिए । 
 


२२ ओटा दुईपाङग्रे सवारी साधन सम्बन्धीत धनीलाई हस्तान्तरण”

२२ ओटा दुईपाङग्रे सवारी साधन सम्बन्धीत धनीलाई हस्तान्तरण”


काठमाडौं, १३ मंसिर । चोरी भएका २२ ओटा सवारी साधन  सवारी धनीहरुलाई हस्तान्तरण गरिएको छ । रामशाहपथ स्थित काठमाडौं उपत्यका ट्राफिक प्रहरी कार्यालयमा आयोजित एक कार्यक्रमका बिच कार्यालयका प्रवक्ता एंव प्रहरी वरिष्ठ उपरीक्षक राजेन्द्र प्रसाद भट्टले १६  वटा मोटरसाइकल र ६ ओटा स्कुटर धनीलाई हस्तान्तरण गरेका हुन् । 
   यो आर्थिक वर्ष सुरु भए पश्चात सवारी साधन हराएको भनि ५९२ वटा निवेदन काठमाडौं उपत्यका ट्राफिक प्रहरी कार्यालयमा प्राप्त भएका थिए । प्राप्त निवेदनको आधारमा खोजी गर्दा फेला परेका २०४ वटा सवारी साधन माथी ट्राफिक प्रहरीले अनुसन्धान गरेको थियो ।
जस मध्ये साउन महिनामा ७३ ओटा, भदौमा ४० वटा, असोजमा ३० वटा, कात्तिकमा १४ वटा र केही दिन अगाडी ६ वटा सवारी साधन  ट्राफिक प्रहरीले धनीलाई जिम्मा लगाइ सकेको छ । धनि नखुलेका ३६ वटा सवारी साधन भने यातायात व्यवस्था कार्यालय र भन्सार कार्यालयमा बुझाइएको छ । 
सवारी साधन जथाभावी पार्किङ नर्गनुहुन र पार्किङ गरिएका सवारी साधनमा पनि सुरक्षाका उपाय डिक्स लक,  ह्याण्डिल लक, सेक्युरिटी साइरन आदि अपनाई सुरक्षित स्थानमा मात्रै पार्किङ गर्नु हुन सम्बन्धित सबैलाई उपत्यका ट्राफिक प्रहरी कार्यालयका प्रवक्ता एंव प्रहरी वरिष्ठ उपरीक्षक भट्ट अनुरोध गरेका छन् । 


त्रिभुवन विमानस्थल क्षेत्रमा पार्किङ शुल्क महँगो भएको भन्दै ट्याक्सी चालक प्रदर्शनमा

त्रिभुवन विमानस्थल क्षेत्रमा पार्किङ शुल्क महँगो भएको भन्दै ट्याक्सी चालक प्रदर्शनमा


काठमाडौं, १३ मंसिर । त्रिभुवन अन्तर्राष्ट्रिय विमानस्थल क्षेत्रमा पार्किङ भाडा बढाइएको भन्दै ट्याक्सी चालकहरु आन्दोलित भएका छन् । उनीहरुले मंगलबार बिहान विमानस्थलको आगमन गेट अगाडि प्रदर्शन गरेका छन् ।
विमानस्थलको जग्गा आईएमएस एयरपोर्ट सर्भिस नामको कम्पनीले भाडामा लिएको छ । त्यहाँ पार्किङ गर्ने सवारी साधनका धनीहरुले महँगो शुल्क तिर्नु परेको गुनासो गर्दै आएका छन् ।

पहिले पार्किङ शुल्कबापत प्रतिघण्टा २० रुपैयाँ लिंदै आएकोमा अहिले एकैचोटी ८० रुपैयाँ पुर्याइएको र १०० रुपैयाँ पुर्याउने धम्की दिइएको भन्दै ट्याक्सी चालकहरु गेट अगाडि नै बसेर प्रदर्शन गरेका छन् । 


थापाथलीमा झडप हुँदा ३६ जना घाइते

थापाथलीमा झडप हुँदा ३६ जना घाइते



काठमाडौं, १२ मंसिर । काठमाडौं थापाथलीको सुकुम्बासी बस्ती हटाउन जाने क्रममा बस्तीका मानिसहरुको आक्रमणमा परी काठमाडौँ महानगरपालिकाका प्रहरी उपरीक्षक एवं प्रहरी बलका प्रमुख राजुनाथ पाण्डेसहित ३६ जना प्रहरी घाइते भएका छन् । घाइतेका उपचारमा खटिनुभएका नगर प्रहरी निरीक्षक सूर्य के.सी. काअनुसार ३४ जनाको थापाथलीस्थित नर्भिक अस्पतालमा र २ जनाको वीर अस्पतालमा उपचार भइरहेको छ ।
घाइतेमध्ये धेरैको टाउकोमा चोट छ । के. सी. का अनुसार स्वास्थ्य गम्भीर भएको सूचना पाएका छैनौँ । टाउकोमा ७ टाँकासम्म लगाउनु परेको छ । यस्ता घाइते धेरै हुनुहुन्छ । टाउकोबाहेक छाती, ढाड र खुट्टामा चोट लागेका विरामी धेरै छन् । 

‘नदी किनारामा निर्माण भएका घरटहरा, त्यहाँ राखिएका निर्माण सामग्री तथा सवारी साधन हटाउन अधिकार सम्पन्न एकीकृत बागमती सभ्यता विकास समितिले सार्वजनिक सूचना जारी गरेको थियो । सूचनाअनुसार मंसिर ४ गतेभित्र बस्तीका संरचना खाली गर्नु पर्ने थियो । त्यस अवधिमा किनाराका संरचना हटेको थिएन ।’ आजको घटनाका बारेमा जानकारी दिँदै महानगरका प्रमुख प्रशासकीय अधिकृत बसन्त अधिकारीले भने, ‘गृह प्रशासनसँग समन्वय गरेर सचेत गराउने क्रममा थियौँ । त्यही क्रममा बस्तीमा पुग्न नपाइकन स्थानीयबाट घरेलु हतियारसहित ढुङ्गा हानेर आक्रमण भयो । यसबाट नगर प्रहरीहरु घाइते भएका छन् ।’ स्थानीयले ढुङ्गा प्रहारसँगै टायर बालेर प्रदर्शन गरेका थिए । 


पहिलो चरणमा सरकारी सवारीमा इम्बोस्ड नम्बर प्लेट जडान गरिने

पहिलो चरणमा सरकारी सवारीमा इम्बोस्ड नम्बर प्लेट जडान गरिने


काठमाडौं, ९ मंसिर । सरकारले पहिलो चरणमा सरकारी सम्पूर्ण सवारीमा इम्बोस्ड नम्बर प्लेटको जडान गर्ने निर्णय गरेको छ । यातायात व्यवस्था विभागले बिहीबार प्रेस विज्ञप्ति जारी गर्दै आगामी फागुन मसान्तभित्र संघ, प्रदेश र स्थानीय तहका सवारीसाधनमा अनिवार्य रुपमा इम्बोस्ड नम्बर प्लेट जोडिसक्नुपर्ने जनाएको छ ।

२८ कात्तिकमा भौतिक पूर्वाधार तथा यातायात मन्त्रालयले नेपालभर सञ्चालन भएका सम्पूर्ण सरकारी सवारी साधनमा अनिवार्य रुपमा इम्बोस्ड नम्बर प्लेट जडान गर्नुपर्ने निर्णय गरेको हो । इम्बोस्ड नम्बर जडानका लागि यातायात व्यवस्था विभागको वेवसाइटमार्फत अनलाइन निवेदन दिन सकिने जनाएको छ ।

त्यसपछि नजिकको यातायात व्यवस्था कार्यालयमा गई राजस्व स्ंकलन गरेर इम्बोस्ड नम्बर प्लेट जडान गर्न विभागले भनेको छ । काठमाडौ उपत्यकाको हकमा यातायात व्यवस्था कार्यालयमा गई राजस्व बुझाएपछि यातायात व्यवस्था विभाग मिनभवनबाट नम्बर प्लेट जडान गर्न सकिने प्रेस विज्ञप्तिमा भनिएको छ । उच्च सुरक्षा तथा प्रविधियुक्त इम्बोस्ड नम्बर प्लेट जडानबाट सवारी साधनको चोरी निकासी, राजस्व छली र अपराधिकरण नियन्त्रण हुने विस्वास लिएको विभागले जनाएको छ ।

सरकारी सवारीमा इम्बोस्ड नम्बर प्लेट जडान भएपछि निजी सवारी प्रयोगकर्ताले पनि इम्बोस्ड जडान गर्नु पर्छ भन्ने कर्तव्य बोध गराउन पहिलो चरणमा सम्पूर्ण सरकारी सवारीमा नम्बर प्लेट जडान गर्ने निर्णय गरेको विभागका प्रवक्ता इश्वरीदत्त पनेरुले बताए । उनले भने, “उपत्यकाका सरकारी सवारीमा प्राय इम्बोस्ड नम्बर प्लेट जडान भएकमा छन् भने नभएका पनि क्रमशः जडान हुँदै गएका छन् । तर उपत्यका बाहिरका सरकारी सवारीमा भने इम्बोस्ड नम्बर प्लेट जडान कम भएका छन् । त्यसकारण आगामी फागुन मसान्तसम्म सम्पूर्ण सरकारी सवारीमा इम्बोस्ड जडान गर्ने लक्ष्य लिएको हो ।”

यसले गर्दा निजी सवारी प्रयोगकर्तालाई पनि इम्बोस्ड नम्बर प्लेट जडान गर्नु पर्छ भन्ने कर्तव्य बोध हुने विभागले जनाएको छ । निजी सवारीको हकमा पनि क्रमशः सवारी धनीले इम्बोस्ड नम्बर प्लेट जडान गर्दै लानु पर्ने विभागले जनाएको छ । यसअघि २२ कात्तिक २०७८ मा पहिलो पटक र फलोअपका लागि २२ मंसिर २०७८ मा प्रकाशित राजपत्रको सूचना अनुसार तत्कालिन अवस्थामा नाम टुंगो लागिसकेका बागमती, गण्डकी, लुम्बिनी, कर्णाली र सुदूरपश्चिम प्रदेशमा १ मंसिर २०७८ बाट नयाँ दर्ता हुने सवारीमा, १ फागुन २०७८ बाट नामसारी गरिएका सवारी साधनमा र १ जेठ २०७९ बाट नविकरण गरिन सवारी साधनमा अनिवार्य रुपमा इम्बोस्ड नम्बर प्लेट जडान गर्न सूचना जारी गरेको थियो ।
 


रौतहट १ बाट माधव नेपाल विजयी

रौतहट १ बाट माधव नेपाल विजयी


काठमाडौं, ८ मंसिर । रौतहट क्षेत्र नम्बर १ बाट नेकपा एकीकृत समाजवादीका अध्यक्ष माधवकुमार नेपाल विजयी भएका छन्। रौतहट जिल्लाका मूख्य निर्वाचन अधिकृत मात्रिका मरासिनीले नेपालले ३३ हजार पाँच सय २२ मत ल्याएर विजयी भएको जानकारी दिए। उनका प्रतिस्पर्धी नेकपा एमालेका अजयकुमार गुप्ताले २६ हजार ९२२ मत प्राप्त गरे। 

रौतहट क्षेत्र नम्बर २ को मतगणना भने जारी रहेको मूख्य निर्वाचन अधिकृत मरासिनीले बताए।
 


डिल्लीबजार मालपोतका तत्कालिन उपसचिवविरुद्ध भ्रष्टाचार मुद्दा

डिल्लीबजार मालपोतका तत्कालिन उपसचिवविरुद्ध भ्रष्टाचार मुद्दा


काठमाडौं, ६ मंसिर । सरकारी जग्गा व्यक्तिको नाममा नामसारी गरेर भ्रष्ट्राचार गरेको आरोपमा अख्तियार दुरुपयोग अनुसन्धान आयोगले मालपोत कार्यालय डिल्लीबजारका तत्कालिन उपसचिव परशुराम अधिकारीविरुद्ध भ्रष्ट्राचार मुद्दा दायर गरेको छ ।

उनले काठमाडौं महानगरपालिका–१६ को कित्ता नं १३९९ को ९१।३१ वर्गमिटर जग्गा सरकारको स्वीकृतिविना भक्तरत्न तुलाधरको नाममा कायम हुने गरी निर्णय गरेको अख्तियारले बताएको छ । अख्तियारले उनीसँग २१ लाख ३० हजार ३८१ रुपैयाँ विगो माग गर्दै भ्रष्ट्राचार मुद्दा दायर गरेको हो ।

तत्कालिन मालपोत अधिकृत सीताराम पोखरेल, तत्कालिन नायब सुब्बा ताराप्रसाद जोशी र प्रसाराम भुसाल र जग्गाधनी बन्ने भक्तरत्न तुलाधरविरुद्ध पनि अख्तियारले भ्रष्ट्राचार मुद्दा दायर गरेको छ ।


नक्कली मतपत्र र स्वस्तिक छापसहित दुई जना पक्राउ

नक्कली मतपत्र र स्वस्तिक छापसहित दुई जना पक्राउ


काठमाडौं, २ मंसिर । पर्सा प्रहरी कार्यालयले वीरगञ्जबाट नक्कली मतपत्र र स्वस्तिक छापसहित दुई जनालाई पक्राउ गरेको छ । गएराति वीरगञ्जको सीमानाकामा गाडीमा जाँच गर्दा बागमती प्रदेश ०१–०२५ च ६६३६ नम्बरको कारबाट १० हजार थान नक्कली मतपत्र र दुई सय ५० थान स्वस्तिक छाप तथा नगद दुई लाख ५० हजारसहित दुई जना पक्राउ परेका हुन् ।
पक्राउ पर्नेमा बाराको कलैया महानगरपालिका वडा नम्बर १८ को वर्ष २३ को अमिरी राउत कुर्मी र वीरगञ्ज नगरपालिका वडा नम्बर १६ बस्ने वर्ष ३३ को राजन सिंह रहेको पर्सा प्रहरीले जनाएको छ ।

 


हिमाली र उच्च पहाडी जिल्लामा हिमपात 

हिमाली र उच्च पहाडी जिल्लामा हिमपात 


काठमाडौं, २ मंसिर । हिमाली र उच्च पहाडी जिल्लामा हिमपात भइरहेकाले त्यस क्षेत्रको यात्रा गर्दा सावधानी अपनाउन मौसमविद्को आग्रह छ । पर्वातारोहण वा पदयात्रासँगै अहिले चुनावका लागि निर्वाचन अधिृकतसहितको टोली उच्च पहाडी र हिमाली  जिल्लाका मतदान केन्द्रमा पुग्दैछन् ।

हिमपातका कारण समस्या आउन सक्ने भएकाले त्यसतर्फ जाँदा पूर्व तयारी अपनाउन मौसमविद् मञ्जु बासीको सुझाव छ । हिमाली केही जिल्लामा केही दिनदेखिको हिमपातले बाक्लो हिउँ जमेको छ । जसका कारण सुरक्षित रुपमा चुनावका सामग्रीसँगै चुनावमा खटिने टोलीलाई मतदान केन्द्रसम्म पुग्न कठिनाइ भइरहेको छ । केही ठाउँमा निर्वाचन आयोगले हेलिकप्टरमार्फत् पुर्याउँदैछ ।  

आज पनि हिमाली र उच्च पहाडी क्षेत्रमा हिमपातको सम्भावना छ । यस्तै, प्रदेश(१, बाग्मती र गण्डकी प्रदेशको मौसम आंशिक बदली हुने र बेलुकीपख पहाडी क्षेत्रका थोरै ठाउँमा  हल्का वर्षाको अनुमान रहेको जल तथा मौसम पूर्वानुमान महाशाखाले जनाएको छ । 



Prabhu Side Bar



Sidebar Middle
Sidebar Bottom