24 Shrawn, 2077 / 8 August , 2020

Logo
gautam
Social Icon
Social Icon
Secondary Top

बैदेशिक रोजगार


दुई महिनाको अवधिमा खाडी र मलेसियाबाट २४६ नेपालीको शव ल्याइयो, ७६ नेपालीको शव बाँकी

दुई महिनाको अवधिमा खाडी र मलेसियाबाट २४६ नेपालीको शव ल्याइयो, ७६ नेपालीको शव बाँकी



काठमाडौं, २३ साउन । वैदैशिक रोजगारमा मृत्यु भएका २ सय ४६ नेपालीको शव नेपाल ल्याइएको छ । गएको जेठ ३२ गतेदेखि विदेशमा समस्यामा परेका नेपालीको स्वदेश फिर्ती शुरु भएसँगै शव पनि ल्याउन थालिएको हो । वैदेशिक रोजगार बोर्डका अनुसार कोरोना महामारी शुरु भएयता विदेशमा ज्यान गुमाएका ४९४ मध्ये २४६ नेपालीको शव चार्टर्ड उडानमार्फत स्वदेश ल्याइएको छ ।

लकडाउन शुरु भएदेखि अहिलेसम्मको अवधिमा खाडी र मलेसियासहित अन्य देशमा १५ महिला र ४७९ पुरुष गरी ४९४ जना नेपालीको ज्यान गएको थियो । अन्तर्राष्ट्रिय उडान बन्द भएर शव ल्याउन नपाएपछि कतिपय मृतकका आफन्तले भने परदेशमै सदगतका लागि अनुमति दिएका छन् । आफन्तको सहमतिमै १७२ जना नेपालीको गन्तव्य देशमै अन्त्येष्टि गरिएको बोर्डले जनाएको छ ।

अब खाडी र मलेसियासहित विभिन्न देशमा ७६ नेपालीको शव बाँकी छ । यो अवधिमा सबैभन्दा धेरै साउदीमा नेपालीको ज्यान गएको छ । साउदीमा मात्रै यो अवधिमा १७३ जना नेपालीले ज्यान गुमाएका छन् । यसमध्ये ७७ जना नेपालीको शव नेपाल ल्याइएको छ ।  ४० जना मृतकका आफन्तले भने साउदीमै अन्त्येष्टिका लागि अनुमति दिएकाले उतै अन्त्येष्टि गरिएको बोडैले जनाएको छ । साउदीमा मात्रै अझै ५६ जना नेपालीको शव स्वदेश ल्याउन बाँकी छ ।

मलेसियामा ज्यान गुमाएका ९२ नेपालीमध्ये ८४ जना नेपालीको शव नेपाल ल्याइएको छ भने ८ जनाको शव उतै अन्त्येष्टि गरिएको छ । 
मलेसियापछि ज्यान गुमाउने नेपालीको सङ्ख्या धेरै यूएईमा छ । यूएईमा यो अवधिमा ८३ जना नेपालीको ज्यान गएको छ । ज्यान गुमाउनेमध्ये १८ नेपालीको शव स्वदेश ल्याइएको छ भने ६० जनाको यूएईमै अन्त्येष्टि गरिएको छ । यूएईमा अब ५ जना नेपालीको शव बाँकी छ ।

यूएईपछि ज्यान गुमाउने नेपालीको सङ्ख्या कतारमा धेरै रहेको छ । कतारमा यो अवधिमा ७७ जनाको ज्यान गएको छ । उनीहरुमध्ये ४९ जनाको शव स्वदेश ल्याइएको छ भने २७ जनाको उतै अन्त्येष्टि गरिएको छ । कतारमा अब १ जना नेपालीको शव बाँकी रहेको वैदेशिक रोजगार बोर्डले जनाएको छ ।

कतारपछि खाडीको अर्को देश कुवेतमा २५ नेपालीले यो अवधिमा ज्यान गुमाएका छन् । ज्यान गुमाएकामध्ये १० नेपालीको शव स्वदेश ल्याइएको छ भने १३ जनाको कुवेतमै अन्त्येष्टि गरिएको छ । कुवेतमा अब २ नेपालीको शव बाँकी रहेको छ । खाडीकै अर्को देश बहराइनमा यस अवधिमा ११ नेपालीको विभिन्न कारणले ज्यान गएको छ । यसमध्ये विभिन्न चार्टर्ड उडानले ६ शव स्वदेश ल्याएका छन् भने ४ जनाको बहराइनमै अन्त्येष्टि गरिएको छ । बहराइनमा अब एक शव बाँकी रहेको छ ।

ओमानमा  यो अवधिमा दुई जनाले ज्यान गुमाएका छन् । दुईमध्ये १ जनाको ओमानमै अन्त्येष्टि गरिएको छ भने एक नेपालीको शव स्वदेश ल्याइएको छ । यसैगरी दक्षिण कोरियामा यो अवधिमा ८ नेपालीले ज्यान गुमाएका छन् । ज्यान गुमाउनेमध्ये ५ जनाको कोरियामै अन्त्येष्टि गरिएको छ । एक जनाको शव स्वदेश ल्याइएको छ भने ३ जनाको शव त्यहाँ बाँकी रहेको बोर्डले जनाएको छ ।

रोजगारीका लागि अरु देशमा पुगेका २३ नेपालीले पनि यस अवधिमा ज्यान गुमाएका र उनीहरुमध्ये १४ जनाको सम्बन्धित देशमै अन्त्येष्टि गरिएको छ भने ९ जनाको शव बाँकी रहेको बोर्डले जनाएको छ । खाडीका ६ देश मलेसिया र अन्य विभिन्न देशमा गरी अब ७६ जना नेपालीको शव बाँकी रहेको छ । यी शव पनि नेपाली लिन गएका जहाजले क्रमशः ल्याउने बोर्डले जनाएको छ ।

हेर्नुहोस् 


साउदी दूतावासको आपत्ति‘म्यानपावर कम्पनीले विपत्तिमा परेका कामदारप्रतिकाे जिम्मेवारी पूरा गरेनन्’

साउदी दूतावासको आपत्ति‘म्यानपावर कम्पनीले विपत्तिमा परेका कामदारप्रतिकाे जिम्मेवारी पूरा गरेनन्’



काठमाडौं, २२ साउन । साउदीस्थित नेपाली दूतावासले नेपालमा रहेका केही म्यानपावर कम्पनीले कोरोना भाइरसका कारण विपत्तिमा परेका कामदारप्रति निर्वाह गर्नुपर्ने जिम्मेवारी पूरा नगरेको भन्दै आपत्ति जनाएको छ ।

रोजगारीका क्रममा साउदी अरबमा रहेका नेपाली कामदारहरुपनि समस्यामा रहेको भन्दै दूतावासले ती कामदारको समस्या समाधान गर्न कामदार पठाउने ईजाजतपत्रवालाहरुको दायित्व पूर्णरुपमा निर्वाहको अपेक्षा गरेको बताएको छ।

कामदार अपलत्र परेपछि केही ईजाजतपत्रवालाहरुले सम्पर्क नै नगर्ने, सम्पर्क गरेपनि दूतावासले नै समस्या समाधन गर्छ, दुतावास जानु भनेर पठाउने गरेको भन्दै त्यसले समस्या समाधानमा कठिनाइ उत्पन्न भएको पनि दूतावासले विज्ञप्तिमार्फत जनाएको छ । 

दूतावास तथा साउदी अरबमा रहेको गैरआवासीय नेपाली संघले रोजगारी गुमाएका वा  खाद्यान्नको अभावमा रहेका नेपाली कामदारहरुलाई सहयोग गरिरहेको र सहयोगको क्रम जारी रहेको भएपनि कामदार पठाउने ईजाजतपत्रवालाहरुले जिम्मेवारी नलिइदिँदा सबैका समस्या समाधान गर्न कठिनाई रहेको पनि दूतावासले उल्लेख गरेको छ।

दूतावासले रोजगारदाताहरुसँग तत्काल समन्वय गरी विपद्मा परेका कामदारहरुलाई राहत प्रदान गर्न तथा रोजगार गुमाएका कामदारहरुका लागि उनीहरुको ईच्छा बुझेर अकमासहतिको रोजगारीको प्रवन्ध गरिदिन, रोजगारीको प्रवन्ध गराउन नसके स्वदेश फर्काउने प्रवन्ध गर्नसमेत म्यानपावर कम्पनीहरुसँग आग्रह गरेको छ।

हेर्नुहोस् 

 


कतारमा अलपत्र १ सय ५० नेपाली स्वदेश फर्किए

कतारमा अलपत्र १ सय ५० नेपाली स्वदेश फर्किए


काठमाडौं, १८ साउन । कोरोना संक्रमणका कारण कतारमा अलपत्र १ सय ५० नेपाली आइतबार स्वदेश फर्किएका छन् । आठ जना महिला र १४२ जना पुरुष आइतबार नेपाल फर्किएका हुन् ।

तत्काल स्वदेश फर्कनै पर्ने अवस्थाका नेपालीले राजदूतावासले तोकेको फाराम भरेर तथा विभिन्न माध्यमबाट आफ्नो विवरण दूतावासमा बुझाएका थिए ।

त्यसैका आधारमा प्राथमिकता निर्धारण गरी उनीहरूलाई स्वदेश फर्काइएको हो ।

दोहाबाट काठमाडौंका लागि नेपाल एयरलाइन्सको आरए २३९२ को चार्टर्ड उडानबाट उनीहरु स्वदेश फर्किएका हुन् ।

उक्त चार्टर्ड उडान दोहाबाट भएको २१औं उडान उडान हो ।


ओमानमा रोजगारी गुमाई अलपत्र परेकालाई दूतावासले सहयोग गर्ने

ओमानमा रोजगारी गुमाई अलपत्र परेकालाई दूतावासले सहयोग गर्ने


न्यूज आजको संवाददाता, काठमाडौं, १६ साउन । कोभिड–१९ को कारणले रोजगारी गुमाई ओमानमा अलपत्र कामदारलाई नेपाली दूतावास ओमानले सहयोग गर्ने भएको छ ।

दूतावासले एक सूचना जारी गर्दै त्यस्ता अलपत्र परेका नेपालीलाई निवेदन लेखी दूतावासमा पेस गर्न आग्रह गरेको छ । दूतावासले भनेको छ, ‘समस्यामा परेका नेपाली नागरिकहरूलाई स्वदेश फिर्ता हुन सहयोग गर्ने अभिप्रायले नेपाल सरकारले “कोभिड–१९ को विश्वव्यापी सङ्क्रमणको कारण वैदेशिक रोजगारीका क्रममा अलपत्र परेका नेपाली कामदारको उद्धार गरी स्वदशे फिर्ता गर्ने सम्बन्धी निर्देशिका” जारी गरी नेपाल फिर्ता सम्बन्धी सहयोगका लागि केही मापदण्डहरू तोकेको छ। सोही मापदण्डले समेट्ने नेपाली नागरिहरूलाई निर्देशिकामा उल्लेख भएबमोजिम सहयोग यस दूतावासमार्फत उपलब्ध गराइनेछ।’

दूतावासले ओमानमा कोभिड–१९ को कारणले बेरोजगार हुनु भएका तथा कम्पनीले पनि कुनै किसिमको सहयोग गर्न नसक्ने अवस्थामा भएको र स्वयम् पनि टिकट खरीद गरेर नेपाल फर्कन असमर्थ नेपाली नागरिकहरूले निवेदन लेखी दूतावासमा पेस गर्न आग्रह गरेको छ ।

यसैबीच दूतावासले चौथो उडानबाट नेपाल फर्कनेहरुको सूची समेत निकालेको छ ।  सलाम एअरको अगष्ट १४ को चौथो उडानमार्फत नेपाल जाने प्रयोजनका लागि  दूतावासमा विभिन्‍न माध्यमबाट नाम टिपाएकामध्ये प्राथमिकताका आधारमा सूची प्रकाशन गरेको छ । उक्त उडानको एकतर्फी हवाइभाडा १ सय १५ ओमानी रियल (२० के.जी.लगेज तथा ७ के.जी.ह्यान्ड ब्याग) तोकिएको छ।

आफूलाई पायक पर्ने कुनै पनि नजिकको परीक्षण केन्द्रमा कोभिड–१९ को पीसीआर परीक्षण गराई (ओमान सरकारले तोकेको शुल्क ३५ ‌ओ.रि. नेगेटिभ रिपोर्ट प्राप्त हुनेहरूले सलाम एअरको कल सेन्टर २४२७–२२२२ मा फोन गरी टिकट खरिद गर्न वा सो सम्बन्धी थप जानकारी प्राप्त गर्न सकिने समेत दूतावासले आग्रह गरेको छ । 


 


कतारबाट स्वदेश फर्किनेहरुका लागि थप ६ उडान हुने

कतारबाट स्वदेश फर्किनेहरुका लागि थप ६ उडान हुने



काठमाडौं, १३ साउन । कोरोना भाइरसका कारण कतारमा समस्यामा परेकाको लागि थप ६ वटा उडानहरु तय भएका छन् ।

कतारस्थित नेपाली दूतावासका अनुसार नेपाल र हिमालय एयरलाइन्सले तीन/तीन उडान गर्ने भएका हुन् । हिमालय एयरलाइन्सले दोहाबाट जुलाई ३१, अगष्ट ३, अगष्ट ५ का लागि तीनवटा थप उडानको सूची पठाएको दूतावासले जनाएको छ ।

यस्तै नेपाल एयरलाइन्सले अगष्ट १, ३ र ४ मा उडान गर्ने भएको छ । दूतावासले सार्वजनिक गरेको नामावलीमा नाम आएकाहरुलाई टिकट खरिद गरि तयारी अवस्थामा बस्न पनि अनुरोध गरेको छ ।

स्वदेश फर्किन तयारी रहेकाहरुले एथेराज एप प्रयोग गर्नु पर्ने र सो एप नभए उडान गर्न नसक्ने दूतावासले जनाएको छ । कतारबाट झन्डै १२ हजारले स्वदेश फर्किन आफ्नो नाम टिपाए पनि हालसम्म विभिन्न चरणमा गरि ३ हजार ३ सय १७ जना मात्र स्वदेश फर्किएको दूतावासले जनाएको छ ।


वैदेशिक रोजगारका लागि साउदी पुगेका युवाको कोरोना संक्रमणबाट मृत्यु

वैदेशिक रोजगारका लागि साउदी पुगेका युवाको कोरोना संक्रमणबाट मृत्यु


काठमाडौं, १३ साउन । वैदेशिक रोजगारका लागि साउदी अरब पुगेका स्याङ्जाका एक युवाको कोरोना संक्रमणबाट मृत्यु भएको छ । विगत ३५ दिनदेखि उपचाररत स्याङ्जाको गल्याङ नगरपालिका–८ (साविकको तिन्दाबाटे गाविस १)का रोशन श्रेष्ठको मृत्यु भएको हो ।

उनको दम्मामस्थित सेन्ट्रल हस्पिटलमा उपचारार्थ ३४ वर्षीय श्रेष्ठको आइतबार साँझ निधन भएको हो । उनी नेपालबाट लकडाउन हुनुभन्दा एक दिन अगाडि साउदी अरब पुगेका थिए । 
 


 वैदेशिक रोजगारमा ज्यान गुमाएका, अशक्त भएकाको बालबालिकालाई छात्रवृत्ति

 वैदेशिक रोजगारमा ज्यान गुमाएका, अशक्त भएकाको बालबालिकालाई छात्रवृत्ति



काठमाडौं, ११ साउन । वैदेशिक रोजगारका क्रममा ज्यान गुमाएका वा पूर्ण अशक्त भएका खोटाङका श्रमिकका ३२ बालबच्चालाई छात्रवृत्ति प्रदान गरेको छ । वैदेशिक रोजगार बोर्डले रोजगारीका सिलसिलामा विभिन्न देश पुगेका बेला दुर्घटना वा अन्य कारणले ज्यान गुमाएका तथा अशक्त बनेका श्रमिकका ३७ बालबच्चालाई बोर्डले छात्रवृत्ति उपलव्ध गराएकामा ३२ जनाले मात्र सो छात्रवृत्ति पाएका हुन् । 

अन्य ५ छात्र-छात्राको ठेगाना नखुलेकाले छात्रवृत्ति रकम फिर्ता पठाइएको बौर्डले जनाएको छ । बाबु÷आमा गुमाएर वा बाबु÷आमाको अशक्तताको कारण अभिभावकविहीन बनेका छात्र÷छात्राको पठन–पाठनमा सघाउ पुर्‍याउने लक्ष्यका साथ बोर्डले आर्थिक वर्ष २०७६÷०७७ मा सुरक्षित आप्रवासन परियोजनासँगको समन्वयमा छात्रवृत्ति उपलव्ध गराएको हो । 

बोर्डले वैदेशिक रोजगार छात्रवृत्ति सञ्चालन कार्यविधि २०७१ बमोजिम पीडित परिवारका कक्षा १ देखि कक्षा ८ सम्मका छात्रछात्रालाई जनही ८ हजार र कक्षा ९ देखि कक्षा १२ मा अध्ययनरत छात्रछात्रालाई जनही १२ हजारका दरले छात्रवृत्ति उपलव्ध गराएको जनाएको छ । आर्थिक वर्ष २०७६÷०७७ मा कक्षा ८ सम्मका २८ जना र सोभन्दा माथिका ९ जना छात्रछात्राले छात्रवृत्ति पाएको कार्यक्रम संयोजक ओजोनबाबु  आचार्यले बताएका छन् ।  

वैदेशिक रोजगार बोर्डले श्रम स्विकृति लिएर विदेश गएको अवस्थामा करार अवधिमा मृत्यु भएका, अङ्गभंग वा अशक्त भएका तथा बेपत्ता भएका परिवारका बालबच्चाका लागि केही वर्ष अघिदेखि हरेक वर्ष शिक्षा विकास तथा समन्वय इकाईमार्फत छात्रवृत्ति रकम पठाउने गरेको छ । 


कुवेतबाट ५ वटा चार्टर्ड उडान हुँदै

कुवेतबाट ५ वटा चार्टर्ड उडान हुँदै



काठमाडौं, ११ साउन । कोरोना भाइरसका कारण कुवेतमा अलपत्र पाँच हजार ५ सय ४९ नेपालीहरु स्वदेश फर्किएका छन् । 
उनीहरु कुवेतमा रही कोरोना महामारीका कारण समस्यामा परेका एवं रोजगारीको करार समाप्त भएका नेपालीहरु हुन् ।

यसैबीच कुवेतस्थित नेपाली दूतावासले आगामी दिनमा हुने पाँच उडानको तालिका सार्वजनिक गरेको छ । तालिकाअनुसार जुलाइ ३१ मा ३ वटा उडान हुँदै छ । उक्त दिन नेपाल एयरलाइन्स, हिमालय एयरलाइन्स र जजिरा एयरवेजले एक(एकवटा उडान गर्ने भएको छ । 

अगस्त २ मा भने हिमालय एयरलाइन्सले एउटा उडान गर्दै छ । अगस्त ५ मा जजिरा एयरवेजले पनि एउटा उडान गर्दै छ । उडान हुने समय पछि प्रकाशित गर्ने दूतावासले जनाएको छ ।

हेर्नुहोस् 

चार्टर्ड उडान संचालन सम्बन्धी सूचना ।
------------------------------------------------
कुवेतमा रही कोभिड-१९ महामारीका कारण समस्यामा परेका एवं रोजगारीको करार समाप्त भएपश्चात पनि अन्तर्राष्ट्रिय उडान बन्द भएका कारण स्वदेश फर्कन नपाइरहेका नेपाली दिदीबहिनी तथा दाजुभाइहरूलाइ स्वदेश फिर्तीको लागि तपशिल बमोजिका ५ वटा हवाइ उडानहरू संचालन हुने भएकोले सम्बन्धित सबैको जानकारीको लागि अनुरोध छः

तपशिल
------------
मितिः ३१ जुलाइ २०२०

१) नेपाल एयरलाइन्स-१
२) हिमालय एयरलाइन्स-१
३) जजिरा एयरवेज-१
--------------------------
मितिः २ अगष्ट २०२०

४) हिमालय एयरलाइन्स-१
-------------------------
मितिः ५ अगष्ट २०२०

५) जजिरा एयरवेज-१
-------------------------
उडान हुने समय पछि प्रकाशित गरिने छ ।
-------------------------------------------------
नेपाली राजदूतावास, कुवेत
मिति २०७७।०४।१० (तदनुसार २५ जुलाइ २०२०)


कोरोना संक्रमणबाट विदेशमा  १ सय ६१ नेपालीको मृत्यु,  ३१ हजार १ सय ५० जना संक्रमित

कोरोना संक्रमणबाट विदेशमा १ सय ६१ नेपालीको मृत्यु,  ३१ हजार १ सय ५० जना संक्रमित


काठमाडौं, ११ साउन । कोरोना भाइरसको संक्रमणबाट विदेशमा यो साता थप १ जना नेपालीको मृत्यु भएको छ। गैरआवासीय नेपाली संघ अन्तर्गतको स्वास्थ्य समितिका अनुसार यो साता यूकेमा १ जनाको कोरोना संक्रमणबाट मृत्यु भएको हो ।  

गैरआवासीय नेपाली संघ स्वास्थ्य समितिका संयोजक डा.संजीव सापकोटाका अनुसार शनिबार साँझसम्म विदेशमा मात्र १ सय ६१ जना नेपालीको कोरोना संक्रमणका कारण मृत्यु भएको छ । 

समितिका अनुसार ३६ मुलुकमा रहेका ३१ हजार १ सय ५० कुल संक्रमित मध्ये  २९ हजार २ सय ४३ जना अर्थात ९३ प्रतिशत  भन्दा बढी नेपालीहरु कोरोना संक्रमणमुक्त भएका छन् ।   

अघिल्लो साता अफ्रिकी मुलुकमा कोरोना भाइरसबाट संक्रमित नेपालीमध्ये अधिकांश संक्रमणमुक्त भएपनि यो साता त्यहाँ संक्रमणदर केही बढेको छ । यस्तै यूएई, कतार, कुवेत र  साउदी अरबमा रहेका नेपालीमा पनि यो साता संक्रमण बढेको छ ।  

संघका अनुसार  नेपालमा ज्यान गुमाएका ४५ जनासहित विश्वभर ज्यान गुमाउने नेपालीको संख्या २ सय ६ जना पुगेको छ । नेपालमा शनिबार साँझसम्म संक्रमितको संख्या १८ हजार ४ सय ८३ जना पुगेको छ ।  

यसैबीच स्वास्थ्य समितिले सार्वजनिक स्थलमा जाँदा, र सवारी साधन प्रयोगका क्रममा अपनाउनुपर्ने स्वास्थ्य मापदण्ड सम्बन्धमा विशेष मार्गदर्शन समेत तयार पारेको छ । समितिले सार्वजनिक स्थलमा जाँदा अनिवार्य रुपमा मास्कको प्रयोग गर्न समेत सुझाएको छ ।  विभिन्न मुलुकमा निधन भएका ९४ नेपालीको शव अझै नेपाल ल्याउन नसकिएको गैर गैरआवासीय नेपाली संघले जनाएको छ ।


साउदी सरकारद्वारा ४ सय ९८ जना नेपालीलाई बहिर्गमन भीसा

साउदी सरकारद्वारा ४ सय ९८ जना नेपालीलाई बहिर्गमन भीसा


काठमाडौं, १० साउन । साउदी सरकारले हालसम्म ४ सय ९८ जना नेपालीहरुलाई बहिर्गमन भीसा जारी गरेको छ । साउदीस्थित नेपाली राजदूतावासका अनुसार बहिर्गमन भीसाको लागि २०७६ पुस, माघ र फागुनमा दिएका निवेदनहरुमध्ये केही व्यक्तिहरुको भीसा प्राप्त भएको हो ।

साउदी अरेबियाका विभिन्न कम्पनी, प्रतिष्ठानहरुमा कार्यरत रहँदा साउदी आवासीय अनुमतिपत्र (अकामा) नवनाईएका वा नवीकरण नगरिएका कारण स्वदेश फर्कन चाहने नेपालीहरुलाई स्वदेश फर्काउन आवश्यक वहिर्गमन भीसा सहज र शीघ्ररुपमा प्रदान गर्ने व्यवस्थाका लागि साउदी सरकारलाई अनुरोध गरेकोमा साउदी सरकारले वहिर्गमन भीसा प्रदान गर्ने प्रकृयाको थालनी गरेको छ।

बहिर्गमन भीसाका लागि राजदूतावासले विभिन्न समयमा सम्बन्धित नेपालीहरुबाट संकलन गरेका विवरण केही समय अगाडि साउदी सरकारलाई उपलव्ध गराएको भएता पनि कोरोना संक्रमणका कारण अवरूद्ध यो प्रकृया हाल सुचारू भएको छ।
यो प्रकृया थालनी पछि साउदी सरकारले हालसम्म ४९८ जना नेपालीहरुलाई बहिर्गमन भीसा जारी गरेको छ । यस मध्ये १ देखि ४२१ सम्मको सूचि यसअघि नै प्रकाशन गरिसकिएको छ ।

बहिर्गमन भीसा जारी भएकाहरुले आगामी अगष्ट ५, ६, ७ र ८ तारिकमा नेपाल एयरलाइन्स र हिमालय एयरलाईन्सले साउदी अरबको रियाद र दमामबाट गर्ने उडानहरुबाट नेपाल जाने तयारी गर्नु हुन समेत दूतावासले अनुरोध गरेको छ।

साथै, बहिर्गमन भीसाका लागि आवेदन दिन बांकी रहेका अकमा नभएका, हुरुव लागेका वा नवीकरण नभएकाहरुका लागि पछि सूचना जारी गरी आवेदन लिइने व्यहोरा समेत अनुरोध गरिन्छ । यस विषयमा नेपाली राजदूतावासको फेसबुक पेज नियमित हेर्नुहुन पनि दूतावासले आग्रह गरेको छ । 

हेर्नुहोस् विज्ञप्ति

नेपाली राजदूतावास समक्ष बहिर्गमन भीसा (Exit visa) को लागि २०७६ पौष, माघ र फागुनमा दिएका निवेदनहरु मध्ये केही व्यक्तिहरुको Exit भीसा प्राप्त भएको सूचना।
-----------------------------
साउदी अरेबियाका विभिन्न कम्पनी, प्रतिष्ठानहरुमा कार्यरत रहँदा साउदी आवासीय अनुमतिपत्र (अकामा) नवनाईएका वा नवीकरण नगरिएका कारण स्वदेश फर्कन चाहने नेपालीहरुलाई स्वदेश फर्काउन आवश्यक वहिर्गमन भीसा(Exit Visa) सहज र शीघ्ररुपमा प्रदान गर्ने व्यवस्थाका लागि साउदी सरकारलाई अनुरोध गरेकोमा साउदी सरकारले वहिर्गमन भीसा प्रदान गर्ने प्रकृयाको थालनी गरेको छ। वहिर्गमन भीसाका लागि राजदूतावासले विभिन्न समयमा सम्बन्धित नेपालीहरुबाट संकलन गरेका विवरण केही समय अगाडि साउदी सरकारलाई उपलव्ध गराएको भएता पनि कोरोना संक्रमणका कारण अवरूद्ध यो प्रकृया हाल सुचारू भएको छ।
यो प्रकृया थालनी पछि साउदी सरकारले हालसम्म ४९८ जना नेपालीहरुलाई बहिर्गमन भीसा जारी गरेको छ ।यस मध्ये १ देखि ४२१ सम्मको सूचि यसअघि नै प्रकाशन गरिसकिएको छ ।

बहिर्गमन भीसा जारी भएकाहरुले आगामी अगष्ट ५, ६, ७ र ८ तारिकमा नेपाल एयरलाइन्स र हिमालय एयरलाईन्सले साउदी अरबको रियाद र दमामबाट गर्ने उडानहरुबाट नेपाल जाने तयारी गर्नु हुन अनुरोध छ।

साथै, वहिर्गमन भीसाका लागि आवेदन दिन बांकी रहेका अकमा नभएका, हुरुव लागेका वा नवीकरण नभएकाहरुका लागि पछि सूचना जारी गरी आवेदन लिइने व्यहोरा समेत अनुरोध गरिन्छ । यस विषयमा नेपाली राजदूतावासको फेसबुक पेज नियमित हेर्नुहुन पनि अनुरोध छ ।
-------------------------
नेपालीराजदूतावास
रियाद ।
२०७७।४।१०

 



Prabhu Side Bar



Sidebar Middle
Sidebar Bottom


Maruti