02 Ashwin, 2078 / 18 September , 2021

Logo
gautam
Social Icon
Social Icon
Secondary Top

बैदेशिक रोजगार


‘अनअराइभल भिसा’ दिने व्यवस्था मिलाउन माग

‘अनअराइभल भिसा’ दिने व्यवस्था मिलाउन माग


काठमाडौं, १ असोज ।  पर्यटन क्षेत्रका सङ्गठनहरुले कोभिड–१९ विरुद्धको खोप लगाएका पर्यटकलाई क्वारेन्टिनमा नराखी ‘अनअराइभल भिसा’ मा नेपाल आउन दिने व्यवस्था तत्काल मिलाउन सरकारसमक्ष माग गरेका छन् ।

नेपाल एशोसिएशन अफ टुर एन्ड ट्राभल एजेन्ट्स (नाट्टा), ट्रेकिङ एजेन्सिज एशोसिएशन अफ नेपाल (टान), होटल सङ्घ नेपाल (हान), प्यासिफिक एशिया ट्राभल एशोसिएशन (पाटा) नेपाल च्याप्टरलगायत १४ संस्थाले संयुक्त विज्ञप्ति जारी गर्दै व्यवसायीका माग तत्काल सम्बोधन नगरे अर्को सातादेखि सङ्घर्षमा उत्रने चेतावनी दिएका छन् ।

पर्यटक आगमन सहजताका लागि भारतसँगको सीमानाका तत्काल खोल्नुपर्ने, सरकारले घोषणा गरेको पर्यटकलाई एक महिनाको फ्रि भिसा तुरुन्तै लागू गर्न माग गरेका व्यवसायीले कोभिड–१९ सङ्कट व्यवस्थापन केन्द्र (सिसिएमसी) को सट्टा सम्बन्धित जिल्लाका प्रमुख जिल्ला अधिकारीलाई जिल्लाको कोभिड–१९ परिस्थितिअनुसार स्वास्थ्य मापदण्ड पालना गर्न लगाउनुपर्ने सुझाएका छन् ।

पर्यटन क्षेत्रलगायत अन्य क्षेत्रको माग सम्बोधनका लागि व्यवसायीको छाता संस्था नेपाल राष्ट्रिय उद्योग वाणिज्य महासङ्घ (एफएनसिसीआई), नेपाल चेम्बर अफ कमर्श (एनसिसी) र नेपाल उद्योग परिसङ्घ (सिएनआई) सँग सहकार्य गरेर अगाडि बढ्ने नाट्टाका अध्यक्ष अच्युत गुरागाईँले बताए । 
अन्तर्राष्ट्रिय जगत्मा ट्राभल एडभाइजरीमा नेपाललाई ‘रेडजोन’मा राखिएको हुँदा सो रेडजोन हटाउनका लागि पर्यटनकर्मीलाई पूर्णरूपमा कोभिडविरुद्धको खोप लगाइसकेको र कोभिड खोप लगाइसकेका पर्यटकलाई नेपालमा निर्वाधरूपमा आउन दिनुपर्ने उनको भनाइ छ । 

क्वारेन्टिन हटाइएको अन्तर्राष्ट्रिय मिडियामा प्रचारप्रसार गरे मात्र ट्राभल एडभाइजरी रेडजोनबाट सुरक्षित जोनका रूपमा विश्वबजारमा सुरक्षित रहने सन्देश जाने भएकाले सोको अविलम्ब व्यवस्था गर्न व्यवसायीले अनुरोध गरे । 


इजरायली भाषा परीक्षाको नतिजा सार्वजनिक(नतिजासहित)

इजरायली भाषा परीक्षाको नतिजा सार्वजनिक(नतिजासहित)


काठमाडौं, २९ भदौ । वैदेशिक रोजगार विभागले इजरायली भाषा परीक्षाको नतिजा सार्वजनिक गरेको छ ।  इजरायल जान इच्छुक युवाहरूका लागि लिइएको अंग्रेजी भाषा परीक्षाको परीक्षाफल प्रकाशन गरिएको हो । 
विभागले सोमबार लिएको भाषा परीक्षामा १ हजार ३ सय ९५ जना महिला र ६ सय ४४ पुरुष गरी २ हजार ३९ जना पास भएका हुन् । इजरायली भाषा परीक्षाका लागि ४ हजार २ सय महिला र ५ हजार ४ सय ९९ पुरुष गरी ९ हजार ६ सय ९९ नेपालीले आवेदन दिएका थिए । तीमध्ये ६ हजार ३ सय ९७ जना लिखित परीक्षामा सहभागी भएका थिए ।

विभागले १ असोजबाट व्यवसायिक सीप विकास प्रतिष्ठान भैँसेपाटी ललितपुरमा अंग्रेजी भाषा पास गर्नेहरूको उचाइ र तौल परीक्षण तथा अन्तर्वार्ता हुने जनाएको छ । छनोट भएका उम्मेदवारहरूले उचाइ र तौलको परीक्षण तथा अन्तर्वार्ता दिन आउँदा दरखास्त फारम पेस गर्दा अनलाइन प्रणालीमार्फत बुझाएका सक्कल कागजात र प्रवेशपत्र लिएर तोकिएको समयभन्दा एक घण्टा अगावै अनिवार्य उपस्थित हुनुपर्नेछ । 

तोकिएको उचाइ र तौलसम्बन्धी मापदण्ड पूरा नहुने उम्मेदवारलाई अन्तर्वार्तामा सहभागी नगराइने विभागले जनाएको छ । तोकिएको शैक्षिक योग्यता, तालिमका प्रमाणपत्र एवं अनलाइन दरखास्तका साथ पेस गरिएका कागजातहरू प्रमाणित नभएमा दरखास्त रद्द हुनेछ । 

 


बहराइनमा नेपालीसहित आप्रवासी श्रमिकमाथि कुटपिट

बहराइनमा नेपालीसहित आप्रवासी श्रमिकमाथि कुटपिट


काठमाडौं, २७ भदौ । बहराइनमा नेपालीसहित आप्रवासी श्रमिकमाथि कुटपिट भएको छ। विभिन्न मागहरु राखेर आन्दोलन गर्दै आएका ग्यास(तेल प्रशोधन केन्द्रमा कार्यरत श्रमिकलाई काममा नफर्किएको भन्दै कम्पनीको व्यवस्थापन पक्षले कुटपिट गरेको हो। 
कम्पनी व्यवस्थापन पक्षले शनिबार कोठाभित्र बसिरहेका बेला आफूहरुमाथि आक्रमण गरेको त्यहाँ कार्यरत नेपाली श्रमिकहरुले बताएका छन्।
बहराइन सरकारको बाप्को प्रोजेक्ट (प्रमुख ग्यास–तेल प्रशोधन केन्द्र) निर्माणमा संलग्न श्रमिकहरु उचित पारिश्रमिक, सुरक्षा लगायतका माग गर्दै गएको मंगलबारदेखि आन्दोलनमा थिए। उनीहरुको माग पूरा नगरी व्यवस्थापन पक्षले काममा फर्किन दबाब दिँदै आएको थियो।

छलफलमा स्वदेश फिर्न चाहने श्रमिकलाई जान दिने र काम गर्नेहरु ड्यूटीमा जाने सहमति भएको थियो। हिजो ड्यूटीमा नगइ कोठामै बसेका श्रमिकमाथि कम्पनी व्यवस्थापन पक्षले कोठामै गएर कुटपिट गरेको हो। 

कुटपिटबाट केही श्रमिक घाइते भएका छन्। उनीहरुलाई उपचारको व्यवस्था मिलाइएको बहराइनस्थित नेपाली राजदूताबासले जनाएको छ। 

बाप्को प्रोजेक्टमा कार्यरत करिब सात सय नेपाली र केही भारतीय श्रमिकहरु सुरक्षा, स्वस्थकर खाना, उचित पारिश्रमिक लगायतका माग राख्दै ड्यूटी छाडेर नोगा क्याम्पमा बसेका छन्।  श्रमिकमाथि कुटपिट भएको घटनापछि नेपाली दूतावासले बहराइनको श्रम मन्त्रालयको ध्यानाकर्षण गराएको छ। 


 


 एनआरएनए सदस्य संख्या ५ लाख पुर्‍याउने कुल आचार्यको घोषणा

एनआरएनए सदस्य संख्या ५ लाख पुर्‍याउने कुल आचार्यको घोषणा


काठमाडौं, २६ भदौ । गैरआवासीय नेपाली संघ (एनआरएनए) का अध्यक्षका उम्मेदवार कुल आचार्यले आफु निर्वाचित भएमा संघको सदस्य संख्या पाँच लाख पुराउने योजना सार्वजनिक गरेका छन् । संघमा हाल सदस्य संख्या १ लाख बढी रहेको छ। आचार्यले  थप मुलुकहरुमा संघका शाखा विस्तार गरेर तथा राष्ट्रिय समन्वय परिषदहरुलाई क्रियाशील गराएर सदस्य संख्या पाँच गुणा बढाउने बताए । संघका राष्ट्रिय समन्वय परिषद (एनसीसी) हरुको संख्या एक सय पुर्याउने उनको भनाइ छ । हालसम्म ८४ देशमा एनआरएनए पुगेता पनि बीस भन्दा बढी एनसीसी निष्कृय रहेका छन् ।
आचार्यले तेस्रो पुस्ता पछिका गैरआवासीय नेपालीहरुको नेपालमा पैतृक सम्पत्तिको अधिकार सुरक्षित गर्नुका साथै  राहदानी सहित नागरिकताको अधिकार स्थापित गर्ने आफ्नो योजना रहेको बताए।  उनले सुरक्षित र मर्यादित वैदेशिक रोजगारीका लागि अभियान सञ्चालन गर्ने पनि बताए ।
संघका सल्लाहकार तथा पूर्व केन्द्रीय उपाध्यक्ष रही सकेका आचार्यले कोभिडका कारण रोजगारी गुमाएर फर्केका युवाहरुका लागि ‘एक एनआरएन एक रोजगार अभियान’ शुरु गर्ने  घोषणा पनि गरेका छन् । नेपाल सरकार तथा निजी क्षेत्रसंगको सहकार्यमा ‘एनआरएनए सीप विकास केन्द्र’ स्थापना गर्ने र पछि सातै प्रदेशमा ती केन्द्रहरुको विस्तार गर्ने आफ्नो योजना रहेको उनले बताए । 
गैरआवासीय नेपाली तथा नेपालमा रहेका तिनका परिवारलाई  सहुलियत दरमा गुणस्तरीय सेवा उपलब्ध गराउन विभिन्न स्वास्थ्य संस्थाहरुसँग सम्झौता गरिने कार्ययोजना बनाएका आचार्यले विदेशमा हुर्कीरहेका बालबालिकाहरुलाई  नेपाली भाषा सिकाउन पाठ्यपुस्तक र मोबाइल एप निर्माण गर्ने र अनलाइन कक्षाहरु  संचालन गरिने पनि बताए   ।

गैरआवासीय नेपाली खेल प्रतिभाहरुको विकासमा सघाउन एनआरएनए खेलकुद प्रतिष्ठान स्थापना गर्ने पनि उनको योजना छ । आचार्यले हालसम्मको आफ्नो अनुभव र नयाँ कार्ययोजनाका आधारमा संसारभर फैलिएका नेपालीहरुलाई मातृभूमिसँग जोड्दै अगाडि बढ्ने आफ्नो योजना रहेको बताए ।


 यूएईमा भिसा नियम अत्यधिक खुकुलो

यूएईमा भिसा नियम अत्यधिक खुकुलो


काठमाडौं, २१ भदौ । यूएईले अन्य देशबाट रोजगारीमा जानेहरुका लागि अपनाइने भिसा नियम अत्यधिक खुकुलो बनाएको छ । 
अब यूएइमा काम गर्ने कामदार रोजगारदाता कम्पनीले स्पोन्सर नगरिकनै त्यहाँ बस्न र काम गर्न पाउनेछन् । 
यसअघि यूएईले रेसिडेन्सीको दर्जा पूर्ण रुपमा जागिरसँग जोडिएको थियो जसका कारण यदि कुनै व्यक्तिको जागिर छैन भने ती व्यक्तिले देश छोड्नु पर्दथ्यो । नियम परिवर्तन भएपछि विदेशीलाई कम्पनीले स्पोन्सर नगरेपनि बस्न सक्छन् । यसका साथै, उनीहरुले थुप्रै सुविधा पनि पाउनेछन् ।

यस्ता छन् सुविधा ?

– कुनै कर्मचारीको जागिर गुम्यो भने उनीहरु थप तीन महिनासम्म त्यहाँ बसेर अर्को जागिर खोज्न सक्नेछन् ।

–  त्यहाँ बसिरहेका विदेशी आफ्ना आमा–बुवा र २५ वर्षसम्मका सन्तानको भिसा पनि स्पोन्सर गर्न सक्छन् ।

–त्यहाँ बसेर काम गर्ने फ्रिलान्सर, विधवा वा सम्बन्धविच्छेद भएकाहरुलाई भिसा नियममा छुट दिइएको छ ।

 


फिलिपिन्सले नेपालसहित १० एसियाली देशमाथि लगाएको प्रतिबन्ध हटायो 

फिलिपिन्सले नेपालसहित १० एसियाली देशमाथि लगाएको प्रतिबन्ध हटायो 


काठमाडौं, २० भदौ । फिलिपिन्सले नेपालसहित १० एसियाली देशमाथि लगाएको यात्रा प्रतिबन्ध हटाएको छ । सोमबारदेखि लागू हुने गरी यात्रा प्रतिबन्ध हटाइएको त्यहाँको सरकारलाई उदृत गर्दै अन्तर्राष्ट्रिय सञ्चारमाध्यमले जनाएका छन् ।

कोरोना भाइरसको डेल्टा भेरियन्ट देखिन थालेपछि फिलिपिन्सले गएको अप्रिलदेखि नेपालसहित भारत, पाकिस्तान, बङ्गलादेश, श्रीलङ्का, संयुक्त अरब इमिरेट्स (यूएई), ओमान, थाइल्यान्ड, मलेसिया र इन्डोनेसियामाथि प्रतिबन्ध लगाइएको थियो । तर, अहिले अवस्था सुधार हुँदै गएको र खोपको प्रयोग पनि बढेको भन्दै यात्रा प्रतिबन्ध हटाइएको हो ।
 


पर्वतमा पहिरोमा ज्यान गुमाउनेको संख्या १० पुग्यो

पर्वतमा पहिरोमा ज्यान गुमाउनेको संख्या १० पुग्यो


पर्वत, १८ भदौ । पर्वतका विभिन्न स्थानमा शुक्रबार बिहान गएको पहिरोमा परेर मृत्यु हुनेको संख्या १० पुगेको छ । पहिरोमा एक जना एक वृद्धा बेपत्ता छिन् ।

पहिरोमा पुरिएर एकै घरका ५ जनाको मृत्यु भएको छ । गण्डकी प्रदेश प्रहरी कार्यालय पोखराका अनुसार कुश्मा नगरपालिका–३ दुर्लुङमा गएको पहिरोले माधव शर्माको घर पुरिँदा परिवारकै ५ जनाको मृत्यु भएको हो ।  उनकी ७५ वर्षकी आमा कौशिला पौडेल, श्रीमती ३५ वर्षकी भगवती, दुई छोरीहरु १६ वर्षकी बिमला र ११ वर्षकी विनिता र ९ वर्षीय छोरा विनोदको मृत्यु भएको प्रदेश प्रहरीका डीएसपी मिनबहादुर घलेले बताए ।

यसैगरी कुश्मा–११ सिल्मीमा मनिलाल पौडेलको घरमा पहिरो आउँदा पाहुना आएकी पर्वतकै मोदी गाउँपालिका–७ की ३८ वर्षीया दुर्गा पौडेल र उनका ६ वर्षीय छोरा गणेशको पनि मृत्यु भएको छ । साथै कुश्मा–११ पकुवा ताल्चेमा शुक्रबार बिहान ९ बजेतिर आएको पहिरोले घर पुर्दा ४० वर्षीया मायाकुमारी पौडेल र उनका ३ वर्षका छोरा प्रयुशको मृत्यु भएको घलेले बताए । उनका अनुसार मायाकुमारीकी सासू ७० वर्षकी डल्ली पाध्या पौडेल पहिरोमा बेपत्ता भएकी छन् । साथै पर्वतकै मोदी गाउँपालिका–५ आम्बोटमा घरमाथिबाट आएको पहिरोले पुरिएर ५० वर्षकी फूलमाया थापाको मृत्यु भएको छ ।


अमेरिकामा सामुद्रिक आँधी, तीन नेपालीसहित ४५ जनाको निधन

अमेरिकामा सामुद्रिक आँधी, तीन नेपालीसहित ४५ जनाको निधन


काठमाडौं, १८ भदौ । सामुद्रिक आँधीका कारण अमेरिकामा तीन नेपालीसहित ४३ जनाको निधन भएको छ। आँधीका कारण भिषण वर्षा भएको र त्यसपछिको बाढीमा परी उनीहरुको निधन भएको हो। अमेरिकाको उत्तरपूर्वी क्षेत्रमा सामुद्रिक आँधीबाट ठूलो मानवीय भौतिक क्षति पुगेको हो। उक्त आँधीमा परेर एकी परिवारका तीन नेपालीको पनि ज्यान गएको छ। न्यूयोर्क शहरमा ३ नेपालीको निधन भएको हो।

आइडा आँधीले अमेरिकी राज्य लुजियानामा ठूलो भौतिक र मानवीय क्षति गराएको छ। लुजियानाबाट प्रभाव पार्न थालेको आइडाले उत्तरपूर्वका न्यूयोर्क, न्यूजर्सी, पेन्सलभेनियालगायत राज्यमा बढी प्रभाव पारेको छ। आँधीका कारण भिषण वर्षा हुँदा ती क्षेत्रका सडक तथा घरहरु पानीमा डुबेका थिए। ठूलो वर्षापछिको डुबानका कारण ज्यान गुमाउनेको संख्या धेरै भएको अमेरिकी सञ्चारमाध्यमले जनाएका छन्। ज्यान गुमाउनेमा अधिकांश घरको तल्लो तलामा रहनेहरु रहेका समाचारमा उल्लेख छ।

आइडा सामुद्रिक आँधीका कारण अमेरिकामा सन् २०१२ मा स्यान्डी आँधीपछि पछिल्लो ९ वर्षमा सबैभन्दा बढी क्षति भएको समाचारमा जनाइएको छ। आइडा प्रभावित राज्यहरुमा अहिले सडक सञ्जाल बन्द हुन पुगेका र बिजुली प्रसारण काटिएको छ।
राष्ट्रपति जो बाइडेनले जालवायु परिवर्तनले पछिल्लो समय अमेरिकामा प्राकृतिक विपदका घटनामा तीव्रता आएको भन्दै यससँगको लडाइँ ‘जीवन र मृत्युको सवाल’ भएको बताएका छन्। बाइडेनले आइडा आँधीमा उत्तरपूर्वी अमेरिकाका ४५ जनाभन्दा बढीले ज्यान गुमाएपछि यस्तो प्रतिक्रिया दिएका हुन्। 


आबुधाबी जाने यात्रुले क्वरेण्टीन बस्न नपर्ने 

आबुधाबी जाने यात्रुले क्वरेण्टीन बस्न नपर्ने 



काठमाडौं, १७ भदौ । आउँदो आइतबार अर्थात सेप्टेम्बर ५ देखि कोरोना विरुद्धको पूरा खोप लगाएर यूएईको आबुधाबी जाने यात्रुले क्वरेण्टीन बस्न नपर्ने भएको छ ।

आफ्नो नीतिलाई परिवर्तन गर्दै यूएईको इमर्जेन्सी, क्राइसिस एण्ड डिजास्टर कमिटीले खोप लगाएर आएका यात्रुले क्वरेण्टीन बस्न नपर्ने नियम ल्याएको हो । 

यो नियम अन्तर्राष्ट्रिय उडान मार्फत आउने सबै यात्रुका लागि लागू हुने खबर गल्फ न्युजले लेखेको छ ।

खोप लगाएका र यूएईले ग्रिन लिष्टमा राखेका देशबाट आउने यात्रुले प्रस्थानभन्दा ४८ घण्टा अगाडिको पीसीआर नेगेटिभ रिपोर्ट देखाउन पर्छ । यस्तै आबुधाबी पुग्नासाथ पीसीआर परीक्षण गर्नुपर्छ भने त्यहाँ पुगेको ६ दिनपछि पुनः पीसीआर परीक्षण गर्नुपर्छ ।

 


 इजरायल रोजगारः परीक्षा भदौ अन्तिम साता

 इजरायल रोजगारः परीक्षा भदौ अन्तिम साता


काठमाडौं, १५ भदौ । इजरायलमा रोजगारीका लागि जानेहरूको भाषा परीक्षा भदौ अन्तिम साता हुने भएको छ। रोजगारीका लागि आवेदन दिई वैदेशिक रोजगार विभागबाट स्वीकृत भएकाहरूको  भदौ २८ गते अंग्रेजी भाषाको लिखित परीक्षा हुने वैदेशिक रोजगार विभागले जनाएको छ ।
‘परीक्षा काठमाडौंका विभिन्न केन्द्रमा भौतिक उपस्थितिमा हुनेछ । 
केन्द्रका सम्बन्धमा परीक्षार्थीहरूको प्रवेश-पत्र तथा विभागको वेवसाइट https://dofe.gov.np मार्फत जानकारी गराइने विभागले जानकारी दिएको छ। प्रवेश-पत्र अनलाइनमार्फत् उपलब्ध हुनेछ।

भाषा परीक्षा तोकिएका विज्ञ व्यक्तिको सहयोगमा गरिनेछ। भाषा परीक्षापछि परीक्षार्थीले प्राप्त गरेको अंक सम्बन्धित व्यक्तिको अनलाइन प्रोफाइलमा विज्ञले प्रविष्ट गरिदिने व्यवस्था छ। सोही प्राप्तांकका आधारमा छनोट समितिले योग्यताक्रम कायम गरी इजरायलबाट प्राप्त मागअनुसारभन्दा २५ प्रतिशत बढी उम्मेद्वारको नामवाली तयार गर्ने विभागले जनाएको छ।



Prabhu Side Bar



Sidebar Middle
Sidebar Bottom


Maruti