News ????
काठमाडौं, असार ८ । राष्ट्रिय प्रजातन्त्र पार्टी (राप्रपा)ले सरकार सर्वसत्तावादतर्फ उन्मुख भएको आरोप लगाएको छ । राप्रपाको आज काठमाडौंमा सकिएको केन्द्रीय कार्यसमितिको विस्तारित बैठकले यस्तो आरोप लगाएको हो ।
पार्टी प्रचार विभाग प्रमुख मोहन श्रेष्ठद्वारा जारी विज्ञप्तिमा, ‘सरकारको कार्यशैली सर्वसत्तावादतर्फ उन्मुख हुँदै गएकोमा राप्रपा बैठकले चिन्ता व्यक्त गरेको छ । संवैधानिक निकाय, राष्ट्रियस्तरका आयोग, प्रशासन, शैक्षिक संस्था, कुटनीतिक नियोग र सुरक्षा संयन्त्रमा समेत पार्टीप्रति आस्था राख्ने व्यक्तिहरु छानीछानी राख्ने कार्य भईरहकोछ, शक्ति पृथकीकरणको मान्यतालाई आघात पुर्याउँदै न्यायपालिकालाई समेत पार्टीकरण गर्ने प्रयास भइरहेको छ । भ्रष्टाचारको माध्यमबाट अकुत सम्पत्ति जोडने काम अनवरत जारी रहेको छ । अनुसन्धान र कारवाही गर्ने निकायहरुलाई प्रधानमन्त्री कार्यालय अन्तर्गत केन्द्रिकृत गरिएको छ’, उल्लेख छ । राप्रपाले राज्यको चौथो अंग आमसंचार माध्यमलाई मिडिया काउन्सिल विधेयकमार्फत नियन्त्रण गर्ने दुष्प्रयास भएको पनि जनाएको छ ।
यसैगरी, राप्रपाले केन्द्रीय महाधिवेशन एक वर्षपछि अर्थात २०७७ जेठ महिनामा गर्ने निर्णय गरेको छ । राप्रपाले पृथ्वीनारायण शाहको दिव्य उपदेश, महेन्द्रको राष्ट्रवाद र बीपी कोइरालाको राष्ट्रिय मेलमिलापको नीतिलाई मार्गदर्शक सिद्धान्तका रूपमा अंगिकार गर्ने निर्णय पनि गरेको छ ।
पार्टीलाई कांग्रेस र कम्युनिष्टको विकल्पका रुपमा देशको बलियो राष्ट्रवादी प्रजातान्त्रिक शक्ति बनाउने संकल्प पनि गरेको श्रेष्ठले जानकारी दिए । बैठकले राप्रपा (संयुक्त)सहित समान विचारधारा भएका शक्तिहरुसँग पार्टी एकता गर्न पहल गर्ने, २०७६ लाई ‘संगठन निर्माण वर्ष’ का रुपमा कार्यान्वयन गर्नेलगायतका निर्णय पनि गरेको छ । साथै, दुई चरणमा ४२ जिल्लामा सम्पन्न गरेको राष्ट्रिय स्वाभिमान यात्रालाई विभिन्न चरणमा ७७ वटै जिल्लामा सञ्चालन गर्ने निर्णयसमेत भएको छ ।
पार्टी अध्यक्ष कमल थापाको अध्यक्षतामा सम्पन्न बैठकमा पार्टीका पदाधिकारी तथा केन्द्रीय सदस्यहरु, प्रदेश कार्य समितिका अध्यक्षहरु, भातृ संगठनका अध्यक्षहरु र ७७ वटै जिल्लाका जिल्ला अध्यक्षको सहभागीता रहेको थियो ।
