तीन विधेयक फिर्ताको माग, फिर्ता नभए सरकारलाई घेराउ गर्ने देउवाको चेतावनी 

काठमाडौं, जेठ १ । नेपाली कांग्रेसले सरकारलाई मिडिया काउन्सिल सम्बन्धि विधेयक, मानव अधिकारसम्बन्धि विधेयक र राष्ट्रिय सुरक्षा परिषद्सम्बन्धि विधेयक फिर्ता लिन माग गरेको छ । आज बसेको कांग्रेस संसदीय दलको बैठकले सरकारलाई तीनवटै विधेयक संविधान प्रतिकूल रहेका कारण फिर्ता लिन माग गर्ने निर्णय गरेको हो । 

कांग्रसले उक्त विधेयकहरुले मुलुकमा विचार अभिव्यक्ति र प्रेस स्वतन्त्रता कुण्ठित हुने, मानवअधिकार कमजोर हुने, राष्ट्रिय सुरक्षा निष्प्रयोजन, नेपाली सेना निष्प्रयोजन हुने जनाएको छ । साथै, मुलुकको सुरक्षा नै गम्भीर खतरामा पर्ने, गम्भीर प्रतिफल ल्याउने विधेयकलाई सरकारले फिर्ता लिनुपर्ने अडान कांग्रेसले लिएको छ । 

त्यसैगरी, सिंहदरबारस्थित संसदीय दलको कार्यालयमा नेपाल पत्रकार महासंघ र नेपाल प्रेस यूनियनका प्रतिनिधिहरुसँगको छलफलमा प्रमुख प्रतिपक्षी दल कांग्रेसका सभापति शेरबहादुर देउवाले मिडिया काउन्सिल विधेयक फिर्ता नलिए सरकारलाई संसद् र सडकबाट घेराउ गर्ने बताएका छन् । 

संसदीय दलकै बैठकमै पनि महासंघ, यूनियनका पदाधिकारी र पूर्वपदाधिकारीलाई सहभागी गराएर देउवाले प्रेस तथा अभिव्यक्ति स्वतन्त्रता कुण्ठित हुने कुनै पनि कार्य कांग्रेसलाई स्वीकार्य नहुने बताए । छलफलका क्रममा उनले प्रेस तथा अभिव्यक्ति स्वतन्त्रताको लडाइँमा आफू सधैं नेपाली प्रेस जगतको साथमा रहने प्रतिवद्धतासमेत जनाए । 

छलफलका क्रममा सभापति देउवाले मानवअधिकार सम्बन्धि विधेयक र सुरक्षा परिषद् सम्बन्धि विधेयकमा पनि आपत्ति जनाएका थिए । पत्रकार महासंघका उपाध्यक्ष विपुल पोखरेल, महासचिव रमेश विष्ट, पूर्व अध्यक्ष हरिहर विरही, डा.सुरेश आचार्य र प्रेस यूनियनका अध्यक्ष सिग्देल छलफलमा सहभागी थिए । उनीहरुले प्रेस स्वतन्त्रताको लडाइँमा नेपाली पत्रकारितालाई साथ र सहयोग दिन कांग्रेस सभापति देउवासँग आग्रह गरेका थिए । 

महासंघ र यूनियनका पदाधिकारीहरुले सरकारले विधेयक जबर्जस्ती ल्याउने प्रयास गरे देशैभरी सशक्त रुपमा आन्दोलन गर्ने चेतावनीसमेत छलफलका क्रममा दिएका थिए । 

राजधानीको नामाकरणलाई लिएर प्रदेश ३ बैठक कांग्रेसद्वारा अवरोध 

मकवानपुर, बैशाख ३० । प्रमुख प्रतिपक्षी दल नेपाली कांग्रेसले प्रदेश नं.३ को संसद बैठक अवरुद्ध गरेको छ । कांग्रेस सांसदहरुले राजधानी नामाकरणको प्रक्रिया सुरु नगरेसम्म अन्य प्रक्रिया अघि बढाउन नदिने भन्दै आजको बैठक अवरोध गरेका हुन् । 

बैठकको सुरुमा सभामुख सानुकुमार श्रेष्ठले अधिवेशन आह्वानसम्बन्धी प्रदेश प्रमुख अनुराधा कोइरालाले पठाएको पत्र पढेर सुनाएकी थिइन् । अधिवेशन सुरु भएको अवसरमा सबै दलका तर्फबाट शुभकामना मन्तव्य दिएपछि सभामुखले नियमित प्रक्रिया अघि बढाउने क्रममा कांग्रेस सांसदहरुले अवरोध गरेका हुन् । कांग्रेसका सांसदहरुले उभिएर विरोध जनाएपछि सभामुख श्रेष्ठले बैठक स्थगित गरेका थिए । 

कांग्र्रेसका प्रदेश नं.३ का संसदीय दलका नेता इन्द्रबहादुर बानियाँले राजधानी नामाकरणको प्रक्रिया सुरु नगरेसम्म संसद चल्न नदिने बताए । 

विप्लव र वैद्यका विद्यार्थी संगठनले लगाए त्रिविमा ताला 

काठमाडौं, बैंशाख ३० । नेत्र विक्रम चन्द(विप्लव) र मोहन वैद्य किरणको पार्टी निकट विद्यार्थी संगठनहरूले त्रिभुवन विश्वविद्यालय सेवा आयोगको कार्यालयमा ताला लगाएका छन् । त्रिभुवन विश्वविद्यालय सेवा आयोगको नतिजा प्रकाशनमा अनियमितता भएको भन्दै आज उनीहरुले आयोगका अध्यक्ष चैतन्य शर्माको कार्यकक्षमा तालबन्दी गरेका हुन् । 

कार्यालयमा उत्तीर्ण भएकाहरूको अन्तवार्ता हुँदै गर्दा अखिल क्रान्तिकारीका नेताहरू दाहाल, कुमार बर्तौला र शुलभ वैद्यले तालाबन्दी गरेका हुन् । प्रहरीको सुरक्षा घेरामा अन्तर्वार्ता भइरहेका बेला सेवा आयोगको कार्यालयभित्र प्रवेश गरेर उनीहरूले तालाबन्दी गरेका हुन् ।

नतिजा प्रकाशनमा भएको अनियमितताविरुद्ध अखिल क्रान्तिकारीले संयुक्त रूपमा तालाबन्दी गरेको हो । तालाबन्दी गर्ने समुहहरुले हालै प्रकाशित गरिएको नतिजा खारेज गर्नुपर्ने, अनियमितता गर्ने पदाधिकारी तथा कर्मचारीलाई तत्काल निलम्बन गरी कारबाही गर्नुपर्ने माग रहेको छ ।

नेविसंघद्वारा त्रिवि सेवा आयोगका अध्यक्षको कुर्सीमा आगजनी

काठमाडौं, बैशाख २९ । नेपाल विद्यार्थी संघले त्रिभुवन विश्वविद्यालय सेवा आयोगका अध्यक्ष चैतन्य शर्माको कुर्सी जलाएको छ । संघका अनुसार खुला प्रतिस्पर्धाका आधारमा लिइएको परीक्षामा शर्माका आफन्त र आसपासका व्यक्तिहरू नै उत्तीर्ण भएपछि नेविसंघले त्रिवि पुगेर शर्माको कुर्सी जलाएको हो ।

त्यसैगरी, नेविसंघले त्रिवि सेवा आयोगको कार्यालमा तोडफोड समेत गरेको छ । तोडफोड र आगजनीमा संलग्न नेविसंघ सचिव योगेन्द्र रावलसहित पाँच जनालाई प्रहरीले नियन्त्रणमा लिएको छ । 

आयोगले लिएको परीक्षाको नतिजामा उत्तीर्ण भएका मध्ये अधिकांश अध्यक्ष शर्मासहित पदाधिकारी र नेताका आफन्त तथा आसेपासे रहेको समाचार सार्वजनिक भएसँगै नेविसंघले विरोध गरेको हो । 

सरकारकै कारण मुलुक विखण्डनतिर ढल्किराखेको छ : नेता भण्डारी

♦ रामनारायण यादव

राजविराज, बैशाख २९ । राष्ट्रिय जनता पार्टी नेपालका संयोजक सरतसिंह भण्डारीले सरकारकै कारण मुलुक विखण्डनतिर ढल्किराखेको बताएका छन् । राजपा नेपालद्वार सदरमुकाम राजविराजमा शनिबार आयोजित पत्रकार सम्मेलनमा उनले सो कुरा बताएका हुन् । 

नेपालबाट मधेशलाई छुटै राज्य बनाउने मुद्दा बोकेका डा.सीके राउतको मुद्दा सरकारले समाप्त परेको आरोपसमेत संयोजक भण्डारीले लगाएका छन् । डा.राउतका कारण मुलुक विखण्डनवादी आन्दोलनको अन्त्य नभएको भन्दै त्यो मुद्दा नै सरकारले स्वयम् बोकेको उनको आरोप छ ।

मधेशीमाथि विभेद अन्त्यका लागि संविधान संशोधन आवश्यक रहेको र सरकार संविधान संशोधन गर्ने मानसिकतामै नरहेकाले राजपा नेपालले उक्त मुद्दा उठाउदै आईरहेको बताए । अहिले दुई तिहाइको कम्युनिष्ट सरकारले काम कम र कुरा बढि गर्दै आएको उनको आरोप छ । त्यस्तै नेता भण्डारीले मधेशी, आदिवासी, जनजाति तथा अल्पसंख्यकको अधिकार प्राप्ति तथा संविधान संशोधनका विषयमा समाजवादी पार्टीको धारणा स्पष्ट नभएकाले र तत्कालीन फोरम नेपालले पनि संविधान संशोधनको मुद्दा बोकिर सरकारमा रहेकोमा आपत्ति जनाएका थिए । 

संचारकर्मीहरुको जिज्ञासाको जवाफ दिदै भण्डारीले भ्रष्टाचार र अनियमिततामा संलग्न भएकालाई पार्टीको नेता कार्यकर्ता भएकै आधारमा राजपाले बोकेर नहिँड्ने बताए । सप्तरीमा राजपा नेपालका केन्द्रीय सदस्य नै कीर्ते प्रकरणमा मुछिएको र प्रहरी हिरासतमा रहेको भन्दै दोषी जोकोहि भएपनि कानून सबैका लागि बराबर भएकोले उनीहरुलाई कारवाही हुने नेता भण्डारीले बताए । 

नयाँशक्तिका केन्द्रीय सदस्य धमाधम जान थाले नेकपामा

गोरखा, बैशाख २९ । पूर्व नयाँशक्ति पार्टीका केन्द्रीय सदस्यहरु नेपाल कम्युनिष्ट पार्टी (नेकपा)मा धमाधम जान थालेका छन् । पूर्व नयाँशक्ति पार्टीका केन्द्रीय परिषद् सदस्यसहित ४० कार्यकर्ता नेकपामा शनिबार प्रवेश गरेका हुन् । उक्त पार्टी र उपेन्द्र यादव नेतृत्वको सङ्घीय समाजवादी फोरम नेपालबीच पार्टी एकीकरण भएसँगै जिल्लाका नयाँशक्ति पार्टीमा आबद्ध युवाले असन्तुष्टि जनाएर नेकपामा प्रवेश गरेका हुन् ।

केन्द्रीय परिषद् सदस्य दिनेश तमुसहित जिल्ला पार्टी सदस्य सुमेन्द्र श्रेष्ठ, नरेश नराल, रवि राना, धनबहादुर तामाङ, सनक उपकोटीलगायत नेता/कार्यकर्ता पार्टी परित्याग गरी नेकपामा प्रवेश गरेका छन् । देशमा राजनीतिक क्रान्ति सफल भइसकेपछि पूर्वप्रधानमन्त्री डा.बाबुराम भट्टराईले नेतृत्व गरेको नयाँशक्ति पार्टीले देशको आर्थिक सामाजिक क्रान्तिको नेतृत्व गर्लाभन्दा झन् स्खलित हुँदै गएकोले पार्टी परित्यागको घोषणा गरेको उनीहरूले बताएका छन् । 

पार्टी परित्याग गरी नेकपामा प्रवेश गर्नेहरूमा जङ्ग गुरुङ, प्रकाश कुँवर, नारान पुलामी, नरेश बराम, लेसन तामाङ, अमर गुरुङ, राजकुमार गुरुङलगायत रहेका छन् । त्यस्तै जिल्लाको सिराचोक गाउँपालिकामा क्रियाशील नयाँशक्ति पार्टीका अशोक गुरुङ, बिकल गुरुङ, अनुप गुरुङ राजकुमार गुरुङ, साजन गुरुङ, विजय गुरुङ, मनिलाल गुरुङ र शिव गुरुङलगायत पनि पार्टी परित्याग गरी नेकपामा प्रवेश गरेका छन् । पार्टी परित्याग गर्ने अन्य नेता कार्यकर्तामा ताङलीचोकका दीपक सुनार, सुमिन गुरुङ, सागर गुरुङलगायत छन् । 

नवप्रवेशी नेता तथा कार्यकर्तालाई नेकपाका केन्द्रीय सदस्य कृष्ण धितालले स्वागत गरेका थिए । 

नयाँ शक्तिबाट नेकपामा प्रवेश गरेकी विकलाई स्वागत गरे प्रचण्डले

काठमाडौं, बैशाख २५ । तत्कलीन नयाँ शक्तिकी केन्द्रीय सदस्य सीमा विक नेकपा प्रवेश गरेकी छन् । धुम्बराहीस्थित नेकपाको मूख्यालयमा आयोजित कार्यक्रममा विकलाई अध्यक्ष पुष्पकमल दाहाल (प्रचण्ड) र महासचिव विष्णु पौडेलले स्वागत गरेका हुन् । 

संघीय समाजवादी फोरमसँगको एकताप्रति असन्तुष्टि जनाउँदै तत्कालीन नयाँ शक्ति पार्टीकी केन्द्रीय सदस्य विक नेकपा प्रवेश गरेकी हुन् । नयाँ शक्ति छाडेर नेकपा प्रवेश गरेकी विक राष्ट्रिय जनमुक्ती पार्टीको तर्फबाट संविधानसभा सदस्य समेत थिइन् । विकलाई पार्टीमा स्वागत गर्दै नेकपा अध्यक्ष प्रचण्डले पार्टीको एकता प्रक्रिया एक कदम अगाडि बढेको बताए । साथै उनले विकलाई उपयुक्त जिम्मेवारी दिइने पनि बताए ।

‘कम्युनिष्ट शासन आए रून पनि पाइँदैन’ सत्य सावित भएको देउवाको दाबी

काठमाडौं, बैशाख २५ । प्रमुख प्रतिपक्षी दल नेपाली कांग्रेसका सभापति शेरबहादुर देउवाले ‘कम्युनिष्ट शासन आए रून पनि पाइँदैन’ भन्ने कुरा सत्य सावित भएको दाबी गरेका छन् । राष्ट्रिय जागरण अभियानको बुधबार काठमाडौंमा उद्घाटन गर्दै सभापति देउवाले यस्तो बताएका हुन् । 

डेढ वर्षअघि प्रदेश र संघको चुनाव हुनुअघि देउवाले कम्युनिष्टले जिते रून पनि नपाइने बताएपछि उनको अभिव्यक्तिलाई लिएर त्यसबेला निकै आलोचना भएको थियो । त्यतिबेला आफूले भनेको कुरा यतिबेला मिल्दै गएको देउवाले दाबी गरेका छन् । 

प्रधानमन्त्रीले मंगलबार संसदमा गैरसंसदीय भाषा बोलेको र आफूहरूले विरोध गरे पनि सभामुखले रेकर्डबाट नहटाएको प्रसंग निकाल्दै देउवाले सभामुखको भूमिकाप्रति समेत प्रश्न उठाए । ‘सभामुख निरिह भइसके । प्रधानमन्त्री जे पायो त्यही बोल्ने भए । मैले त्यही भएर भनेको, कम्युनिष्ट शासन आएपछि यस्तै हुन्छ भनेर । हिजो संसदमा तपाईंहरूले देखिहाल्नु भयो, प्रधानमन्त्रीले गैरसंसदीय भाषा बोले । हामीले डिलिट गर्नुपर्छ भन्यौं । विरोध गर्यौ’, देउवाले भने, ‘सभामुखले डिलिट गर्न सकेनन् ।’ 

सभामुखले प्रतिपक्षलाई भन्दा सत्तापक्षलाई महत्व दिएको उनको भनाइ रहेको छ । नेपालको संसदीय इतिहासमै यति कमजोर, डरपोक र काँतर सभामुख देखेकै छैन भन्दै देउवाले संसद प्रतिपक्षको भन्ने भनाइ भएपनि प्रतिपक्षलाई सभामुखले भूमिका नदिएको बताए ।

त्यसैगरी, राष्ट्रपतिले नीति तथा कार्यक्रम पढ्दा मेरो सरकार भनेकोमा पनि देउवाले बेलायती महारानीजस्तो किन हुनुपर्यो भनेर प्रश्न गरे । ‘गणतन्त्र आएपछि नेपाल सरकार भन्ने परम्परा नै बसिसकेको थियो । अहिले किन बेलायती महारानी शैलीमा मेरो सरकार भन्नुपर्यों ?’, देउवाले भने । 
 

कांग्रेसको जागरण अभियान शुरु, देशलाई सही बाटोमा हिँडाउन जागरण अभियान गरेको पौडेलको दाबी

काठमाडौं, बैशाख २५ । नेपाली कांग्रेसको पहिलो चरणको जागरण अभियान आजदेखि शुरु गरेको छ । कांग्रेसले आजदेखि देशैभर राष्ट्रिय अभियान शुरु गरेको हो । 

सोही क्रममा नेपाली कांग्रेसका वरिष्ठ नेता रामचन्द्र पौडेलले पार्टीलाई सुधार गर्ने र देशलाई सही बाटोमा हिडाउन अहिले जागरण अभियान चलाइएको बताएका छन् । नेपाल प्रेस युनियन सिन्धुलीले आज सिन्धुलीमाढीमा गरेको पत्रकार भेटघाट कार्यक्रममा उनले पार्टीभित्रका विवाद पूरै समाधान नभए पनि यसलाई सही बाटामा हिँडाउन पनि सबै एक भएर लाग्ने र जागरण अभियान सफल बनाइने बताए । उनले भने, ‘गलत प्रवृत्तिका विरुद्धमा अभियान चल्नेछ, अभियानले आफैंभित्र रहेको धुलो पनि टक्टक्याएर देशलाई स्वच्छ राजनीतिक दिशा दिने संकल्प लिएको छ, यसै संकल्पका साथ जिल्ला जिल्लामा अभियान चलाइएको छ ।’

सो अवसरमा कांग्रेसका नेता रामशरण महतले संक्रमणकालीन अवस्था नसकिएको, संविधान पूरा कार्यान्वयनको संक्रमण अझ बाँकी रहेको, तीनथरिका सरकारको कार्यविभाजन र शान्तिसुरक्षाका विषयमा विवाद भएको र कर्मचारी प्राविधिक क्षमतामा कमी भएको विचार व्यक्त गरे ।

उक्त जागरण अभियान तीन चरणको हुने जनाइएको छ । ७७ जिल्ला र विदेशस्थित ३३ जनसम्पर्क समितिले एक साथ जागरण अभियान सुरु गर्ने पनि जनाइएको छ । आजदेखि जेठ महिनासम्म पहिलो चरण, भदौ २४ (बिपी जयन्ती अवसर पारि सुरु)देखि असोज १० सम्म दोस्रो चरण र अन्तिम चरणको अभियान पुस ७ देखि १६ सम्म हुनेछ । 

पार्टीले सञ्चालन गरेको अभियानमा भ्रातृ संस्था भिन्न–भिन्न मुद्दा लिएर अभियान सञ्चालन गर्ने पार्टी प्रवक्ता विश्वप्रकाश शर्माले जानकारी गराए । परम्परागत शैलीलाई परिवर्तन गरी वक्ता तीन जना मात्रै हुने गरी कार्यक्रमको प्रारुप बनाइएको छ । यसअघि बनाइएको प्रारुपमा महिला वक्ताहरुलाई महत्व कम दिइएको भन्दै महिला सदस्यहरुले आपत्ति जनाएपछि उनीहरुलाई पनि स्थान दिने गरी कार्यक्रम तय गरिएको छ । 

जागरण अभियानमा स्वागत र विसर्जनबाहेक केवल तीन वक्ताले सम्बोधन गर्ने गरी छिटोछरितो बनाइएको शर्माले जानकारी दिए । जागरण अभियानलाई मध्यनजर गरी पार्टीले मैथिली, मगर, नेवारी, तामाङ, गुरुङ, भोजपुरी, राई, लिम्बू, थारू, राजवंशी, देउडा भाका र नेपाली गरी १२ भाषामा जागरण गीत बनाएको छ । 

समाजवादी पार्टीका पदाधिकारीले खाए सपथ

काठमाडौं, बैशाख २४ । आज नवगठित समाजवादी पार्टी, नेपालका अध्यक्ष उपेन्द्र यादवले पदाधिकारी र केन्द्रीय सदस्यहरुलाई पद तथा गोपनियताको सपथ गराएका छन् । राजधानीमा आयोजित एक कार्यक्रमकाबीच अध्यक्ष यादवले केन्द्रीय पदाधिकारी तथा केन्द्रीय सदस्यहरुलाई सपथ गराएका हुन् । 

त्यसअघि उनले पार्टीका जेष्ठ सदस्य प्रेम कृष्ण पाठकबाट पद तथा गोपनियताको सपथ लिएका थिए । सपथग्रहणपछि आज नै पार्टीको केन्द्रीय समितिको पहिलो पूर्ण बैठक बसेको छ । बैठकले प्रक्रिया पूरा गरेर निर्वाचन आयोगमा दल दर्ता गर्ने र सबै प्रदेशमा जागरण सन्देश अभियान सञ्चालन गर्ने निर्णय गरेको सहअध्यक्ष राजेन्द्र श्रेष्ठले जानकारी दिए ।

नयाँ शक्ति पार्टी र संघीय समाजवादी पार्टी सोमबार एकिकरण भएर समाजवादी पार्टी नेपाल बनेको हो । एकिकरणपछि संघीय परिषदका अध्यक्ष डा.बाबुराम भट्टराईलाई पार्टी अध्यक्ष उपेन्द्र यादवले पद तथा गोपनियताको सपथ गराएका थिए ।