News ????
बथनाहा (भारत) : बाढीले लिक नै भत्काएपछि विराटनगरलाई भारतको राजधानी नयाँ दिल्ली र अन्य प्रमुख सहरसँग जोड्ने रेल्वे सेवा अनिश्चित समयका लागि बन्द भएको छ।
विराटनगरको सीमावर्ती भारतको जोगबनीबाट बथनाहासम्म करिब ६ किलो मिटर क्षेत्रमा अघिल्लो साता आएको बाढीका कारण रेल्वे ट्राक तथा अन्य भौतिक संरचना क्षतिग्रस्त भएका छन्। रेल सेवा ठप्प हुँदा भारतमा पढ्न जाने नेपाली विद्यार्थी, उताबाट सरसामान आयात गर्ने उद्योगी-व्यवसायी र उपचारमा जाने नेपाली मर्कामा परेका छन्।
नेपाली सीमासम्म चल्ने नर्थ इस्ट रेल्वे अन्तर्गतका रेल सेवा सञ्चालन हुने ठाउँको लिक, कल्भर्ट र पुल नै बगाएको स्थानीयले बताएका छन्। बथनाहा मिरगञ्जका स्थानीय मोहम्मद नाजले भने, ‘बाढी पसेर लिक भएको ठाउँमा एक मान्छेसम्मका गहिरा खाल्डा परेका छन्। लिक त सतहभन्दा ६ फिट माथिसम्म झुन्डिएको छ। यो मर्मत गर्न कति समय लाग्ने हो ? फेरि कहिलेदेखि रेल चल्ने हो निश्चित छैन।’
नाजका अनुसार बथनाहा र त्यस दक्षिणको भारतीय बजार फारबिसगञ्जसम्म धेरै ठाउँमा रेल्वे ट्रक बिच्छाइएको बाँध नै बाढीले भत्काएर फलामको लिक र त्यसलाई अड्याउन जोडिएको पक्की पिलर खाल्डोमाथि झुन्डिएका छन्।
जोगबनी रेल्वे कार्यालयका अनुसार नेपाली सीमाबाट भारतको राजधानी दिल्लीका लागि दैनिक एउटा बातानुकुलित सीमाञ्चल एक्सप्रेसले सेवा दिँदै आएको थियो। कलकत्ताका लागि हप्तामा तीनवटा र कटिहारका लागि दैनिक ५ रेल विराटनगर सीमाबाट छुट्ने तथा आउने गरेका थिए। ‘तर, बाढीको क्षतिका कारण रेल सेवा विगत ११ दिनदेखि बन्द छ’,जोगबनी भन्सार कार्यालयका सहायक आयुक्त पवन कुमारले भने, ‘रेल सेवा सुरु कहिले हुने भन्ने अनिश्चित नै छ। क्षतिको विवरण संकलन गर्ने कामसमेत सुरु नभएकोले यसै भन्न गाह्रो छ।’ बाढीले रेल्वे सेवाका कतिपय कल्भर्ट र लिक नै भत्काएको सेवा सुचारु हुन समय लाग्ने उनले बताए।
बथनाहामा बाढीले लिग भएको बाँध भत्काएपछि जमिनको सतह भन्दामाथि झुन्डिएको भारतीय रेल्वेको लिक।
रेल्वे सेवा बन्द हुँदा त्यसले औद्योगिक कच्चा पदार्थ र अन्य उपभोग्य वस्तुको आयातसमेत रोकिने उद्योग संगठन मोरङका पूर्वअध्यक्ष शिवशंकर अग्रवालले बताएका छन्। अग्रवाल भन्छन्,‘रेलबाट आउने सामान अब मालवाहक ट्रकबाट ल्याइनु पर्ने बाध्यता भएको छ।’ उनले रेलबाट एकै पटक ठूलो परिमाणमा सामान आउने गरेकोमा ट्रकबाट पटक पटक ल्याउनु पर्ने बाध्यता हुने बताए।
जोगबनीका पत्रकार बरुण मिश्रका अनुसार त्यो क्षेत्रमा बाढीका कारण रेल्वे स्टेशनसहितका क्षेत्र डुबानबाट प्रभावित बनेको थियो। उनले भने, ‘नभत्किएको लिक सफाई गर्ने र भत्किएको पुर्ननिर्माण गर्ने काम पूरा नहुञ्जेल सेवा सुरु हुन निकै कठिन छ।’
मोरङ व्यापार संघका महासचिव नविन रिजालले नेपाल–भारत सीमावर्ती सहरका बासिन्दाका लागि लाइफलाइनको रुपमा हेरिने गरेको रेल्वे सेवा बन्द हुँदा त्यसले नेपाली उद्योगी, व्यवसायी तथा सर्वसाधारणलाई निकै सास्ती हुने गरेको बताए। उनले भने, ‘सीमासम्म आउने रेलका कारण सबैलाई निकै सहज थियो अब भारतको भित्री क्षेत्रसम्म गएर रेलको सेवा लिनुपर्ने बाध्यता हुन्छ।’ रिजालले रेल्वे मर्मत गरी पुनः सञ्चालन गर्ने व्यवस्था गर्न उद्योगी तथा व्यवसायीले नेपालस्थित भारती दूतावासमार्फत भारत सरकारको ध्यानाकर्षण गरिएको बताए।
