17 Baishak, 2081 / 29 April , 2024
काठमाडौँ: इन्टरनेटका बहुपक्षीय सरोकार भएकाका बीचमा अन्तर्राष्ट्रियस्तरमा मात्र हुने गरेको इन्टरनेटसम्बन्धी सेमीनार 'इन्टरनेट गभर्नेन्स फोरम' नेपालमा पहिलो पटक शुक्रबारदेखि सुरु भएको छ।
इन्टरनेटको नीति, कानूनी प्रयोग र अन्य सरोकारका विषयमा सम्बन्धित सबै पक्षको अनुभव र सुझाव लिने उदेश्यले आयोजना गरिएको सो सेमीनारको महिला, बालबालिका तथा समाज कल्याणमन्त्री आशा कोइरालाले उद्घाटन गरे।
इन्टरनेटसँग सरोकार राख्ने नेपालका झण्डै ५० वटा सरकारी तथा गैरसरकारी र व्यापारिक संघसंस्थाको सहकार्यमा भइरहेको कार्यक्रममा विभिन्न क्षेत्रका २०० जनाको सहभागिता रहेको छ। दुई दिनसम्म चल्ने कार्यक्रममा इन्टरनेटसँग सम्बन्धित विभिन्न १२ वटा विषयमा छुट्टाछुट्टै विषयमा कार्यपत्र र समूहगत छलफल हुनेछ।
कार्यक्रमको पहिलो दिन महिला र सूचना प्रविधि, युवा र सूचना प्रविधिको प्रयोग, गोपनियता, तथ्यांक संरक्षण र राष्ट्रिय सुरक्षा, इन्टरनेट इकोसिष्टम तथा प्रकोप न्यूनीकरणमा सूचना तथा सञ्चार प्रविधिको प्रयोगजस्ता विषयमा छलफल भएको छ।
इन्टरनेट गभर्नेन्स फोरमको दोस्रो दिन नेपालमा स्मार्ट सिटीको सम्भाव्यता र प्रवद्र्धन, अनलाइन भुक्तानी र इन्टरनेटको पहुँचमा समावेशिता, साइबर सुरक्षालगायत विषयमा छलफल हुने बताइएको छ।
नेपाल इन्टरनेट गभर्नेन्स फोरम २०१७ को संयोजन तथा अध्यक्षता नेपाल सरकारको सूचना तथा प्रविधि विभागले गरिरहेको छ। कार्यक्रमको समन्वय र व्यवस्थापन इन्टरनेट सोसाइटी नेपालले गरेको छ। रासस
