24 Baishak, 2081 / 6 May , 2024
काठमाडौं, २१ फागुन । नेकपा एमाले सम्मिलित नयाँ सत्ता गठबन्धनमा साना दललाई पनि समेटेर सरकारलाई पूर्णता दिनेबारे सहमति जुटेको छ । गठबन्धनका प्रमुख घटक नेकपा एमालेका अध्यक्ष केपी शर्मा ओली, नेकपा माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्ड, राष्ट्रिय स्वतन्त्र पार्टी (रास्वपा) सभापति रवि लामिछाने र जनता समाजवादी पार्टी (जसपा) अध्यक्ष उपेन्द्र यादवबीच भएको छलफलमा साना दललाई पनि गठबन्धनमा समेट्ने सहमति जुटेको छ ।
नयाँ गठबन्धनप्रति सकारात्मक अन्य दलहरूसँग संवाद गर्दै अरु दललाई समेत सहभागी गराएर सरकारलाई पूर्णता दिने विषयमा सहमति भएको उच्च स्रोतले जनाएको छ ।
नयाँ गठबन्धन बनेपछि राष्ट्रपति रामचन्द्र पौडेलले नवनियुक्त ३ मन्त्रीलाई पद तथा गोपनीयताको शपथ गराएका छन् । सोमबार साँझ शितलनिवासमा विना विभागीय मन्त्रीहरू हितबहादुर तामाङ, पदम गिरी र डोरप्रसाद अर्यालको शपथ ग्रहण गरेका छन् ।
तामाङ माओवादी केन्द्र, गिरी नेकपा एमाले र अर्याल राष्ट्रिय स्वतन्त्र पार्टी (रास्वपा) बाट मन्त्री बनेका हुन् ।
